[๙๒] เตน โข ปน สมเยน ภิกฺขูนํ กิสฺมิญฺจิ กิสฺมิญฺจิ ฐาเน
กุกฺกุจฺจํ อุปฺปชฺชติ กินฺนุ โข ภควตา อนุญฺญาตํ กึ
อนนุญฺญาตนฺติ ฯ ภควโต เอตมตฺถํ อาโรเจสุํ ฯ ยํ ภิกฺขเว มยา
อิทํ น กปฺปตีติ อปฺปฏิกฺขิตฺตํ ตญฺจ อกปฺปิยํ อนุโลเมติ
กปฺปิยํ ปฏิพาหติ ตํ โว น กปฺปติ ยํ ภิกฺขเว มยา อิทํ
น กปฺปตีติ อปฺปฏิกฺขิตฺตํ ตญฺเจ กปฺปิยํ อนุโลเมติ อกปฺปิยํ
ปฏิพาหติ ตํ โว กปฺปติ ยํ ๑ ภิกฺขเว มยา อิทํ กปฺปตีติ
อนนุญฺญาตํ ตญฺเจ อกปฺปิยํ อนุโลเมติ กปฺปิยํ ปฏิพาหติ ตํ
#๑ ม. ยญฺเญ จ ฯ ยุ. ยญฺจ ฯ
โว น กปฺปติ ยํ ภิกฺขเว มยา อิทํ กปฺปตีติ อนนุญฺญาตํ
ตญฺเจ กปฺปิยํ อนุโลเมติ อกปฺปิยํ ปฏิพาหติ ตํ โว กปฺปตีติ ฯ

[๙๓] อถโข ภิกฺขูนํ เอตทโหสิ กปฺปติ นุ โข ยาวกาลิเกน
ยามกาลิกํ น นุ โข กปฺปติ กปฺปติ นุ โข ยาวกาลิเกน
สตฺตาหกาลิกํ น นุ โข กปฺปติ กปฺปติ นุ โข ยาวกาลิเกน
ยาวชีวิกํ น นุ โข กปฺปติ กปฺปติ นุ โข ยามกาลิเกน
สตฺตาหกาลิกํ น นุ โข กปฺปติ กปฺปติ นุ โข ยามกาลิเกน
ยาวชีวิกํ น นุ โข กปฺปติ กปฺปติ นุ โข สตฺตาหกาลิเกน
ยาวชีวิกํ น นุ โข กปฺปตีติ ฯ ภควโต เอตมตฺถํ อาโรเจสุํ ฯ
ยาวกาลิเกน ภิกฺขเว ยามกาลิกํ ตทหุปฏิคฺคหิตํ กาเล กปฺปติ วิกาเล
น กปฺปติ ยาวกาลิเกน ภิกฺขเว สตฺตาหกาลิกํ ตทหุปฏิคฺคหิตํx
กาเล กปฺปติ วิกาเล น กปฺปติ ยาวกาลิเกน ภิกฺขเว ยาวชีวิกํ
ตทหุปฏิคฺคหิตํ กาเล กปฺปติ วิกาเล น กปฺปติ ยามกาลิเกน
ภิกฺขเว สตฺตาหกาลิกํ ตทหุปฏิคฺคหิตํ ยาเม กปฺปติ ยามาติกฺกนฺเต
น กปฺปติ ยามกาลิเกน ภิกฺขเว ยาวชีวิกํ ตทหุปฏิคฺคหิตํ ยาเม
กปฺปติ ยามาติกฺกนฺเต น กปฺปติ สตฺตาหกาลิเกน ภิกฺขเว ยาวชีวิกํ
ตทหุปฏิคฺคหิตํ สตฺตาหํ กปฺปติ สตฺตาหาติกฺกนฺเต น กปฺปตีติ ฯ
เภสชฺชกฺขนฺธกํ นิฏฺฐิตํ ฉฏฺฐํ ฯ
อิมมฺหิ ขนฺธเก วตฺถุ เอกสตํ ฉวตฺถุ ฯ
__________
ตสฺสุทฺทานํ

[๙๔] สารทิเก วิกาเลปิ วสํ มูเล ปิฏฺเฐหิ จ ๑
กสาเวหิ ปณฺณํ ผลํ ชตุ โลณํ จ ฉกฺกณํ ๒
จุณฺณํ จาลินี มํสญฺจ อญฺชนํ อุปปึสนํ ๓
อญฺชนี อุจฺจาปารุตฺตา ๔ สลากา สลาโกธนี ๕
ถวิกํ วทฺธกํ ๖ สุตฺตํ มุทฺธนิเตลนตฺถุ จ ๗
นตฺถุกรณี ธูมญฺจ เนตฺตญฺจาปิธนตฺถวิ ๘
เตลปาเกสุ มชฺชญฺจ อติกฺขิตฺตํ อพฺภญฺชนํ
ตุมฺพํ เสทํ สมฺภารญฺจ มหาภงฺโคทกํ ตถา ๙
ทกโกฏฺฐํ ๑๐โลหิตญฺจ วิสาณํ ปาทพฺภญฺชนํ
มชฺชํ ๑๑ สตฺถํ กสาวญฺจ ติลกกฺกกพฬิกํ ๑๒
โจลํ สาสปกุฑฺฑญฺจ ๑๓ ธูมสกฺขริกาย จ
วณเตลํ วิกาสายํ ๑๔ วิกฏญฺจ ปฏิคฺคหํ
คูถํ กโรนฺโต โลพี จ ๑๕ ขารํ มุตฺตหรีฏกี ๑๖
คนฺธา ๑๗ วิเรจนญฺเจว อจฺฉากฏํ กฏากฏํ
#๑ โป. วสํ มูเลหิ ปิฏฺฐกํ ฯ ๒ ม. ยุ. ชตุ โลณํ ฉกฺกณํ จ ฯ ๓ โป. อุปปึสนี ฯ
#ม. อุปปิสนี ฯ ยุ. อุปปิสนํ ฯ ๔ โป. อญฺชนี จ อุจฺจาวจา ฯ ยุ. อุจฺจปรุตา ฯ
#๕ ม. สลากฐานึ ฯ ๖ ม. ถวิกํ สพทฺธกํ ฯ ๗ โป. -นตฺถุกํ ฯ ๘ ม. -จาปิธนา ถวิ ฯ
#ยุ. จาปิธานํ ถวิ ฯ ๙ โป. -ปิจ ฯ ๑๐ โป. อุท- ฯ ๑๑ ม. ยุ. ปชฺชํ ฯ
#๑๒ โป. -กวลฺลิกํ ฯ ๑๓ โป. โกฏญฺจ ฯ ม. โกฏฺฏญฺจ ฯ ๑๔ โป. วิกาเสกํ ฯ
#ม. ยุ. วิกาสิกํ ฯ ๑๕ โป. โลฬิกํ ฯ ม. ยุ. โลฬิญฺจ ฯ ๑๖ โป. -หริฏกึ ฯ
#ม. หริฏกํ ฯ ๑๗ โป. คนฺธํ ฯ
ปฏิจฺฉาทนี ปพฺภารา อารามี สตฺตเหน จ
คุฬํ มุคฺคํ สุจีรญฺจ ๑ สามปากา ๒ ปุนาปเจ
ปุนานุญฺญาสิ ทุพฺภิกฺเข ผลญฺจ ติลขาทนี
ปุเรภตฺตํ กายทาโห นิพฺพฏฺฏญฺจ ภคนฺทลํ
วตฺถิกมฺมญฺจ สุปฺปี จ ๓ มนุสฺสมํสเมว จ
หตฺถิอสฺสา สุนโข จ อหิ สีหพฺยคฺฆทีปิกํ
อจฺฉตรจฺฉมํสญฺจ ปฏิปาฏิ จ ยาคุ จ
ตรุณํ อญฺญตฺร คุฬํ สุนีธาวสถาครํ ๔
คงฺคา โกฏิสจฺจกถา อมฺพปาลี จ ลิจฺฉวี ๕
อุทฺทิสฺส กตํ สุภิกฺขํ ปุนเรว ๖ ปฏิกฺขิปิ
เมโฆ ยโส ๗ เมณฺฑโก จ โครสํ ปาเถยฺยเกน จ
เกณี อมฺโพ ชมฺพุ โจจ- โมจมธุมุทฺทิกสาลุกํ ๘
ผารุสกฑากปิฏฺฐํ ๙ อาตุมายํ นหาปิโต
สาวตฺถิยํ ผลํ พีชํ กิสฺมึ ๑๐ฐาเน จ กาลิกาติ ๑๑ ฯ
#๑ ม. ยุ. โสวิรญฺจ ฯ ๒ โป. สามํ ปกฺกํ ฯ ๓ ม. วตฺถิกมฺมํ สุปฺปิยญฺจ ฯ
#๔ โป. สุนีธวสฺสการณกา ฯ ม. -คารํ ฯ ๕ ม. ยุ. อมฺพปาลี จ ลิจฺฉวี คงฺคา
#โกฏิสจฺจกถา ฯ ๖ ม. ยุ. ปุนเทว ฯ ๗ ยุ. ยโสโช ฯ ๘ ยุ. -มุทฺทิกา – ฯ
#๙ ยุ. ผารุสกา ฯ ๑๐ ยุ. กสฺมึ ฯ ๑๑ ม. กาลิเกติ ฯ ยุ. กาลิโกติ ฯ
กฐินกฺขนฺธกํ

[๙๕] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน ตึสมตฺตา
ปาเฐยฺยกา ภิกฺขู สพฺเพ อารญฺญกา สพฺเพ ปิณฺฑปาติกา สพฺเพ
ปํสุกูลิกา สพฺเพ เตจีวริกา สาวตฺถึ คจฺฉนฺตา ภควนฺตํ ทสฺสนาย
อุปกฏฺฐาย วสฺสูปนายิกาย นาสกฺขึสุ สาวตฺถิยํ วสฺสูปนายิกํ
สมฺภาเวตุํ อนฺตรามคฺเค สาเกเต วสฺสํ อุปคจฺฉึสุ ฯ เต
อุกฺกณฺฐิตรูปา วสฺสํ วสึสุ อาสนฺเน ว โน ภควา วิหรติ อิโต
ฉสุ โยชเนสุ น จ มยํ ลภาม ภควนฺตํ ทสฺสนายาติ ฯ
อถโข เต ภิกฺขู วสฺสํ วุตฺถา เตมาสจฺจเยน กตาย ปวารณาย
เทเว วสฺสนฺเต อุทกสงฺคเห อุทกจิกฺขลฺเล โอกปุณฺเณหิ จีวเรหิ
กิลนฺตรูปา เยน สาวตฺถี เชตวนํ อนาถปิณฺฑิกสฺส อาราโม
เยน ภควา เตนุปสงฺกมึสุ อุปสงฺกมิตฺวา ภควนฺตํ อภิวาเทตฺวา
เอกมนฺตํ นิสีทึสุ ฯ อาจิณฺณํ โข ปเนตํ พุทฺธานํ ภควนฺตานํ
อาคนฺตุเกหิ ภิกฺขูหิ สทฺธึ ปฏิสมฺโมทิตุํ ฯ อถโข ภควา เต ภิกฺขู
เอตทโวจ กจฺจิ ภิกฺขเว ขมนียํ กจฺจิ ยาปนียํ กจฺจิ สมคฺคา
สมฺโมทมานา อวิวทมานา ผาสุกํ วสฺสํ วสิตฺถ น จ ปิณฺฑเกน
กิลมิตฺถาติ ฯ ขมนียํ ภควา ยาปนียํ ภควา สมคฺคา จ มยํ
ภนฺเต สมฺโมทมานา อวิวทมานา วสฺสํ วสิมฺหา น จ ปิณฺฑเกน
กิลมิมฺหา อิธ มยํ ภนฺเต ตึสมตฺตา ปาเฐยฺยกา ภิกฺขู สาวตฺถึ
อาคจฺฉนฺตา ภควนฺตํ ทสฺสนาย อุปกฏฺฐาย วสฺสูปนายิกาย
นาสกฺขิมฺหา สาวตฺถิยํ วสฺสูปนายิกํ สมฺภาเวตุํ อนฺตรามคฺเค สาเกเต
วสฺสํ อุปคจฺฉิมฺหา เต มยํ ภนฺเต อุกฺกณฺฐิตรูปา วสฺสํ วสิมฺหา
อาสนฺเน ว โน ภควา วิหรติ อิโต ฉสุ โยชเนสุ น จ มยํ
ลภาม ภควนฺตํ ทสฺสนายาติ อถโข มยํ ภนฺเต วสฺสํ วุตฺถา
เตมาสจฺจเยน กตาย ปวารณาย เทเว วสฺสนฺเต อุทกสงฺคเห
อุทกจิกฺขลฺเล โอกปุณฺเณหิ จีวเรหิ กิลนฺตรูปา อทฺธานํ อาคตาติ ฯ

[๙๖] อถโข ภควา เอตสฺมึ นิทาเน เอตสฺมึ ปกรเณ ธมฺมึ
กถํ กตฺวา ภิกฺขู อามนฺเตสิ อนุชานามิ ภิกฺขเว วสฺสํ วุตฺถานํ
ภิกฺขูนํ กฐินํ อตฺถริตุํ ฯ อตฺถตกฐินานํ โว ภิกฺขเว ปญฺจ
กปฺปิสฺสนฺติ อนามนฺตจาโร อสมาทานจาโร คณโภชนํ ยาวทตฺถจีวรํ
โย จ ตตฺถ จีวรุปฺปาโท โส เนสํ ภวิสฺสตีติ ฯ
อตฺถตกฐินานํ โว ภิกฺขเว อิมานิ ปญฺจ กปฺปิสฺสนฺติ ฯ เอวญฺจ
ปน ภิกฺขเว กฐินํ อตฺถริตพฺพํ ฯ พฺยตฺเตน ภิกฺขุนา ปฏิพเลน
สงฺโฆ ญาเปตพฺโพ สุณาตุ เม ภนฺเต สงฺโฆ อิทํ สงฺฆสฺส
กฐินทุสฺสํ อุปฺปนฺนํ ฯ ยทิ สงฺฆสฺส ปตฺตกลฺลํ สงฺโฆ อิมํ
กฐินทุสฺสํ อิตฺถนฺนามสฺส ภิกฺขุโน ทเทยฺย กฐินํ อตฺถริตุํ ฯ เอสา
ญตฺติ ฯ สุณาตุ เม ภนฺเต สงฺโฆ อิทํ สงฺฆสฺส กฐินทุสฺสํ
อุปฺปนฺนํ ฯ สงฺโฆ อิมํ กฐินทุสฺสํ อิตฺถนฺนามสฺส ภิกฺขุโน เทติ
กฐินํ อตฺถริตุํ ฯ ยสฺสายสฺมโต ขมติ อิมสฺส กฐินทุสฺสสฺส
อิตฺถนฺนามสฺส ภิกฺขุโน ทานํ กฐินํ อตฺถริตุํ โส ตุณฺหสฺส ยสฺส
นกฺขมติ โส ภาเสยฺย ฯ ทินฺนํ อิทํ สงฺเฆน กฐินทุสฺสํ
อิตฺถนฺนามสฺส ภิกฺขุโน กฐินํ อตฺถริตุํ ฯ ขมติ สงฺฆสฺส ตสฺมา
ตุณฺหี ฯ เอวเมตํ ธารยามีติ ฯ
เอวํ โข ภิกฺขเว อตฺถตํ โหติ กฐินํ เอวํ อนตฺถตํ

[๙๗] กถญฺจ ภิกฺขเว อนตฺถตํ โหติ กฐินํ ฯ น
อุลฺลิขิตมตฺเตน อตฺถตํ โหติ กฐินํ ฯ น โธวนมตฺเตน อตฺถตํ โหติ
กฐินํ ฯ น จีวรวิจารณมตฺเตน อตฺถตํ โหติ กฐินํ ฯ น
เฉทนมตฺเตน อตฺถตํ โหติ กฐินํ ฯ น พนฺธนมตฺเตน อตฺถตํ โหติ
กฐินํ ฯ น โอวฏฺฏิกกรณมตฺเตน อตฺถตํ โหติ กฐินํ ฯ น
กณฺฑสกรณมตฺเตน อตฺถตํ โหติ กฐินํ ฯ น ทฬฺหีกมฺมกรณมตฺเตน
อตฺถตํ โหติ กฐินํ ฯ น อนุวาตกรณมตฺเตน อตฺถตํ โหติ
กฐินํ ฯ น ปริภณฺฑกรณมตฺเตน อตฺถตํ โหติ กฐินํ ฯ น
โอวฏฺเฏยฺยกรณมตฺเตน ๑ อตฺถตํ โหติ กฐินํ ฯ น กมฺพลมทฺทนมตฺเตน
อตฺถตํ โหติ กฐินํ ฯ น นิมิตฺตกเตน อตฺถตํ โหติ กฐินํ ฯ
น ปริกถากเตน อตฺถตํ โหติ กฐินํ ฯ น กุกฺกุกเตน อตฺถตํ
โหติ กฐินํ ฯ น สนฺนิธิกเตน อตฺถตํ โหติ กฐินํ ฯ
น นิสฺสคฺคิเยน อตฺถตํ โหติ กฐินํ ฯ น อกปฺปกเตน อตฺถตํ โหติ
#๑ สี. ยุ. โอวทฺเธยฺยกรณมตฺเตน ฯ ม. โอวเทยฺยกรณมตฺเตน ฯ
กฐินํ ฯ น อญฺญตฺร สงฺฆาฏิยา อตฺถตํ โหติ กฐินํ ฯ น
อญฺญตฺร อุตฺตราสงฺเคน อตฺถตํ โหติ กฐินํ ฯ น อญฺญตฺร
อนฺตรวาสเกน อตฺถตํ โหติ กฐินํ ฯ น อญฺญตฺร ปญฺจเกน วา
อติเรกปญฺจเกน วา ตทเหว สญฺฉินฺเนน สมณฺฑลีกเตน อตฺถตํ
โหติ กฐินํ ฯ น ๑ อญฺญตฺร ปุคฺคลสฺส อตฺถารา อตฺถตํ โหติ
กฐินํ ฯ น สมฺมา เจว อตฺถตํ โหติ กฐินํ ฯ ตญฺเจ นิสฺสีมฏฺโฐ
อนุโมทติ เอวํปิ อนตฺถตํ โหติ กฐินํ ฯ เอวํ โข ภิกฺขเว
อนตฺถตํ โหติ กฐินํ ฯ

[๙๘] กถญฺจ ภิกฺขเว อตฺถตํ โหติ กฐินํ ฯ อหเตน อตฺถตํ
โหติ กฐินํ ฯ อหตกปฺเปน อตฺถตํ โหติ กฐินํ ฯ ปิโลติกาย
อตฺถตํ โหติ กฐินํ ฯ ปํสุกูเลน อตฺถตํ โหติ กฐินํ ฯ ปาปณิเกน
อตฺถตํ โหติ กฐินํ ฯ อนิมิตฺตกเตน อตฺถตํ โหติ กฐินํ ฯ
อปริกถากเตน อตฺถตํ โหติ กฐินํ ฯ อกุกฺกุกเตน อตฺถตํ โหติ
กฐินํ ฯ อสนฺนิธิกเตน อตฺถตํ โหติ กฐินํ ฯ อนิสฺสคฺคิเยน อตฺถตํ
โหติ กฐินํ ฯ กปฺปกเตน อตฺถตํ โหติ กฐินํ ฯ สงฺฆาฏิยา
อตฺถตํ โหติ กฐินํ ฯ อุตฺตราสงฺเคน อตฺถตํ โหติ กฐินํ ฯ
อนฺตรวาสเกน อตฺถตํ โหติ กฐินํ ฯ ปญฺจเกน วา อติเรกปญฺจเกน
วา ตทเหว สญฺฉินฺเนน สมณฺฑลีกเตน อตฺถตํ โหติ กฐินํ ฯ
ปุคฺคลสฺส อตฺถารา อตฺถตํ โหติ กฐินํ ฯ สมฺมา เจว อตฺถตํ
โหติ กฐินํ ฯ ตญฺเจ สีมฏฺโฐ อนุโมทติ เอวํปิ อตฺถตํ
#๑ ม. ยุ. นสทฺโท นตฺถิ ฯ
โหติ กฐินํ ฯ เอวํ โข ภิกฺขเว อตฺถตํ โหติ กฐินํ ฯ

[๙๙] กถญฺจ ภิกฺขเว อุพฺภตํ โหติ กฐินํ ฯ อฏฺฐิมา ภิกฺขเว
มาติกา กฐินสฺส อุพฺภาราย ปกฺกมนนฺติกา นิฏฺฐานนฺติกา
สนฺนิฏฺฐานนฺติกา นาสนนฺติกา สวนนฺติกา อาสาวจฺเฉทิกา
สีมาติกฺกนฺติกา สหุพฺภาราติ ฯ

[๑๐๐] ภิกฺขุ อตฺถตกฐิโน กตจีวรํ อาทาย ปกฺกมติ น
ปจฺเจสฺสนฺติ ฯ ตสฺส ภิกฺขุโน ปกฺกมนนฺติโก กฐินุทฺธาโร ฯ
ภิกฺขุ อตฺถตกฐิโน จีวรํ อาทาย ปกฺกมติ ฯ ตสฺส พหิสีมคตสฺส
เอวํ โหติ อิเธวิมํ จีวรํ กาเรสฺสํ น ปจฺเจสฺสนฺติ ฯ โส ตํ
จีวรํ กาเรติ ฯ ตสฺส ภิกฺขุโน นิฏฺฐานนฺติโก กฐินุทฺธาโร ฯ
ภิกฺขุ อตฺถตกฐิโน จีวรํ อาทาย ปกฺกมติ ฯ ตสฺส พหิสีมคตสฺส
เอวํ โหติ เนวิมํ จีวรํ กาเรสฺสํ น ปจฺเจสฺสนฺติ ฯ ตสฺส
ภิกฺขุโน สนฺนิฏฺฐานนฺติโก กฐินุทฺธาโร ฯ ภิกฺขุ อตฺถตกฐิโน จีวรํ
อาทาย ปกฺกมติ ฯ ตสฺส พหิสีมคตสฺส เอวํ โหติ อิเธวิมํ
จีวรํ กาเรสฺสํ น ปจฺเจสฺสนฺติ ฯ โส ตํ จีวรํ กาเรติ ฯ ตสฺส
ตํ จีวรํ กยิรมานํ นสฺสติ ฯ ตสฺส ภิกฺขุโน นาสนนฺติโก
กฐินุทฺธาโร ฯ ภิกฺขุ อตฺถตกฐิโน จีวรํ อาทาย ปกฺกมติ
ปจฺเจสฺสนฺติ ฯ โส พหิสีมคโต ตํ จีวรํ กาเรติ ฯ โส กตจีวโร
สุณาติ อุพฺภตํ กิร ตสฺมึ อาวาเส กฐินนฺติ ฯ ตสฺส ภิกฺขุโน
สวนนฺติโก กฐินุทฺธาโร ฯ ภิกฺขุ อตฺถตกฐิโน จีวรํ อาทาย ปกฺกมติ
ปจฺเจสฺสนฺติ ฯ โส พหิสีมคโต ตํ จีวรํ กาเรติ ฯ โส กตจีวโร
ปจฺเจสฺสํ ปจฺเจสฺสนฺติ พหิทฺธา กฐินุทฺธารํ วีตินาเมติ ฯ ตสฺส
ภิกฺขุโน สีมาติกฺกนฺติโก กฐินุทฺธาโร ฯ ภิกฺขุ อตฺถตกฐิโน จีวรํ
อาทาย ปกฺกมติ ปจฺเจสฺสนฺติ ฯ โส พหิสีมคโต ตํ จีวรํ
กาเรติ ฯ โส กตจีวโร ปจฺเจสฺสํ ปจฺเจสฺสนฺติ สมฺภุณาติ
กฐินุทฺธารํ ฯ ตสฺส ภิกฺขุโน สห ภิกฺขูหิ กฐินุทฺธาโร ฯ
อาทายสตฺตกํ นิฏฺฐิตํ ปฐมํ ฯ

[๑๐๑] ภิกฺขุ อตฺถตกฐิโน กตจีวรํ สมาทาย ปกฺกมติ น
ปจฺเจสฺสนฺติ ฯ ตสฺส ภิกฺขุโน ปกฺกมนนฺติโก กฐินุทฺธาโร ฯ
ภิกฺขุ อตฺถตกฐิโน จีวรํ สมาทาย ปกฺกมติ ฯ ตสฺส พหิสีมคตสฺส
เอวํ โหติ อิเธวิมํ จีวรํ กาเรสฺสํ น ปจฺเจสฺสนฺติ ฯ โส ตํ
จีวรํ กาเรติ ฯ ตสฺส ภิกฺขุโน นิฏฺฐานนฺติโก กฐินุทฺธาโร ฯ
ภิกฺขุ อตฺถตกฐิโน จีวรํ สมาทาย ปกฺกมติ ฯ ตสฺส พหิสีมคตสฺส
เอวํ โหติ เนวิมํ จีวรํ กาเรสฺสํ น ปจฺเจสฺสนฺติ ฯ ตสฺส
ภิกฺขุโน สนฺนิฏฺฐานนฺติโก กฐินุทฺธาโร ฯ ภิกฺขุ อตฺถตกฐิโน
จีวรํ สมาทาย ปกฺกมติ ฯ ตสฺส พหิสีมคตสฺส เอวํ โหติ อิเธวิมํ
จีวรํ กาเรสฺสํ น ปจฺเจสฺสนฺติ ฯ โส ตํ จีวรํ กาเรติ ฯ ตสฺส
ภิกฺขุโน ตํ จีวรํ กยิรมานํ นสฺสติ ฯ ตสฺส ภิกฺขุโน นาสนนฺติโก
กฐินุทฺธาโร ฯ ภิกฺขุ อตฺถตกฐิโน จีวรํ สมาทาย ปกฺกมติ
ปจฺเจสฺสนฺติ ฯ โส พหิสีมคโต ตํ จีวรํ กาเรติ ฯ โส กตจีวโร
สุณาติ อุพฺภตํ กิร ตสฺมึ อาวาเส กฐินนฺติ ฯ ตสฺส ภิกฺขุโน
สวนนฺติโก กฐินุทฺธาโร ฯ ภิกฺขุ อตฺถตกฐิโน จีวรํ สมาทาย
ปกฺกมติ ปจฺเจสฺสนฺติ ฯ โส พหิสีมคโต ตํ จีวรํ กาเรติ ฯ
โส กตจีวโร ปจฺเจสฺสํ ปจฺเจสฺสนฺติ พหิทฺธา กฐินุทฺธารํ
วีตินาเมติ ฯ ตสฺส ภิกฺขุโน สีมาติกฺกนฺติโก กฐินุทฺธาโร ฯ ภิกฺขุ
อตฺถตกฐิโน จีวรํ สมาทาย ปกฺกมติ ปจฺเจสฺสนฺติ ฯ โส
พหิสีมคโต ตํ จีวรํ กาเรติ ฯ โส กตจีวโร ปจฺเจสฺสํ ปจฺเจสฺสนฺติ
สมฺภุณาติ กฐินุทฺธารํ ฯ ตสฺส ภิกฺขุโน สห ภิกฺขูหิ กฐินุทฺธาโร ฯ
สมาทายสตฺตกํ นิฏฺฐิตํ ทุติยํ ฯ