[๓๘] ปาวญฺจ โภคนครํ เวสาลึ มาคธํ ปุรํ
ปาสาณกํ เจติยญฺจ รมณียํ มโนรมํ ฯ

[๓๙] ตสิโต วุทกํ สีตํ มหาลาภํว วาณิโช
ฉายํ ฆมฺมาภิตตฺโตว ตุริตา ปพฺพตมารุหุํ ฯ

[๔๐] ภควา จ ๓ ตมฺหิ สมเย ภิกฺขุสงฺฆปุรกฺขโต
ภิกฺขูนํ ธมฺมํ เทเสติ สีโหว นทตี วเน ฯ
#๑ ม. มฬกสฺส ฯ ๒ ม. ปุรมาหิสฺสตึ ฯ ๓ ม. จสทฺโท นตฺถิ ฯ

[๔๑] อชิโต อทฺทส สมฺพุทฺธํ ๑ วีตรํสึว ๒ ภาณุมํ
จนฺทํ ยถา ปณฺณรเส ปาริปูรึ ๓ อุปาคตํ ฯ

[๔๒] อถสฺส คตฺเต ทิสฺวาน ปริปูรญฺจ พฺยญฺชนํ
เอกมนฺตํ ฐิโต หฏฺโฐ มโนปเญฺห อปุจฺฉถ ฯ

[๔๓] อาทิสฺส ชมฺมนํ พฺรูหิ โคตฺตํ พฺรูหิ สลกฺขณํ
มนฺเตสุ ปารมึ พฺรูหิ กติ วาเจติ พฺราหฺมโณ ฯ

[๔๔] วีสํ วสฺสสตํ อายุ โส จ โคตฺเตน พาวรี
ตีณสฺส ๔ ลกฺขณา คตฺเต ติณฺณํ เวทาน ปารคู ฯ

[๔๕] ลกฺขเณ อิติหาเส จ สนิฆณฺฑุสเกฏุเภ
ปญฺจสตานิ วาเจติ สธมฺเม ปารมึ คโต ฯ

[๔๖] ลกฺขณานํ ปวิจยํ พาวริสฺส นรุตฺตม
ตณฺหจฺฉิท ปกาเสหิ มา โน กงฺขายิตํ อหุ ฯ

[๔๗] มุขํ ชิวฺหาย ฉาเทติ อุณฺณาสฺส ภมุกนฺตเร
โกโสหิตํ วตฺถคุยฺหํ เอวํ ชานาหิ มาณว ฯ