[๗๙๖] อญฺญมญฺเญหิ พฺยารุทฺเธติ อญฺญมญฺญํ สตฺตา วิรุทฺธาG
ปฏิวิรุทฺธา อาหตา ปจฺจาหตา อาฆาติตา ปจฺจาฆาติตา ราชาโนปิ
ราชูหิ วิวทนฺติ ขตฺติยาปิ ขตฺติเยหิ วิวทนฺติ พฺราหฺมณาปิ
พฺราหฺมเณหิ วิวทนฺติ คหปตีปิ คหปตีหิ วิวทนฺติ มาตาปิ
ปุตฺเตน วิวทติ ปุตฺโตปิ มาตรา วิวทติ ปิตาปิ ปุตฺเตน
วิวทติ ปุตฺโตปิ ปิตรา วิวทติ ภาตาปิ ภาตรา วิวทติ ภคินีปิ
ภคินิยา วิวทติ ๑ ภาตาปิ ภคินิยา วิวทติ ภคินีปิ ภาตรา
วิวทติ สหาโยปิ สหาเยน วิวทติ ฯ เต ตตฺถ กลหวิคฺคหวิวาทาปนฺนา
อญฺญมญฺญํ ปาณีหิปิ อุปกฺกมนฺติ เลฑฺฑูหิปิ
อุปกฺกมนฺติ ทณฺเฑหิปิ อุปกฺกมนฺติ สตฺเถหิปิ อุปกฺกมนฺติ ฯ
เต ตตฺถ มรณมฺปิ คจฺฉนฺติ ๒ มรณมตฺตมฺปิ ทุกฺขนฺติ
อญฺญมญฺเญหิ พฺยารุทฺเธ ฯ

[๗๙๗] ทิสฺวา มํ ภยมาวิสีติ ทิสฺวาติ ทิสฺวา ปสฺสิตฺวา
ตุลยิตฺวา ตีรยิตฺวา วิภาวยิตฺวา วิภูตํ กตฺวา ภยํ ปีฬนํ ฆฏฺฏนํ
อุปทฺทโว อุปสคฺโค อาวิสตีติ ๓ ทิสฺวา มํ ภยมาวิสิ ฯ เตนาห ภควา
#๑ โป. ยุ. อิเม ปาฐา นตฺถิ ฯ ๒ ม. นิคจฺฉนฺติ ฯ ๓ โป. ม. อาวิสีติ ฯ
ผนฺทมานํ ปชํ ทิสฺวา มจฺเฉ อปฺโปทเก ยถา
อญฺญมญฺเญหิ พฺยารุทฺเธ ทิสฺวา มํ ภยมาวิสีติ ฯ

[๗๙๘] สมนฺตมสาโร โลโก ทิสา สพฺพา สเมริตา
อิจฺฉํ ภวนมตฺตโน นาทฺทสาสึ อโนสิตํ ฯ

[๗๙๙] สมนฺตมสาโร โลโกติ นิรยโลโก ติรจฺฉานโยนิโลโก
ปิตฺติวิสยโลโก มนุสฺสโลโก เทวโลโก ขนฺธโลโก ธาตุโลโก
อายตนโลโก อยํ โลโก ปโร โลโก สพฺรหฺมโลโก ๑ สเทวโลโก ๒
อยํ วุจฺจติ โลโก ฯ นิรยโลโก อสฺสาโร นิสฺสาโร สาราปคโต
นิจฺจสารสาเรน วา สุขสารสาเรน วา อตฺตสารสาเรน วา นิจฺเจน
วา ธุเวน วา สสฺสเตน วา อวิปริณามธมฺเมน วา ฯ
ติรจฺฉานโยนิโลโก ปิตฺติวิสยโลโก มนุสฺสโลโก เทวโลโก
ขนฺธโลโก ธาตุโลโก อายตนโลโก อยํ โลโก ปโร โลโก
สพฺรหฺมโลโก สเทวโลโก อสฺสาโร นิสฺสาโร สาราปคโต
นิจฺจสารสาเรน วา สุขสารสาเรน วา อตฺตสารสาเรน วา นิจฺเจน
วา ธุเวน วา สสฺสเตน วา อวิปริณามธมฺเมน วา ฯ ยถา [๓]
นโฬ อสฺสาโร นิสฺสาโร สาราปคโต ยถา เอรณฺโฑ อสฺสาโร
นิสฺสาโร สาราปคโต ยถา อุทุมฺพโร อสฺสาโร นิสฺสาโร
สาราปคโต ยถา เสตคจฺโฉ อสฺสาโร นิสฺสาโร สาราปคโต ยถา
ปาลิภทฺทโก อสฺสาโร นิสฺสาโร สาราปคโต ยถา เผณุปิณฺโฑ
อสฺสาโร นิสฺสาโร สาราปคโต ยถา ปุพฺพุฬกํ อสฺสารํ นิสฺสารํ
#๑-๒ ม. พฺรหฺมโลโก เทวโลโก ฯ ๓ ม. ปน ฯ
สาราปคตํ ยถา มรีจิ อสฺสารา นิสฺสารา สาราปคตา ยถา
กทฺทลิกฺขนฺโธ อสฺสาโร นิสฺสาโร สาราปคโต ยถา มายา อสฺสารา
นิสฺสารา สาราปคตา เอวเมว นิรยโลโก อสฺสาโร นิสฺสาโร
สาราปคโต นิจฺจสารสาเรน วา สุขสารสาเรน วา อตฺตสารสาเรน
วา นิจฺเจน วา ธุเวน วา สสฺสเตน วา อวิปริณามธมฺเมน วา
ติรจฺฉานโยนิโลโก ปิตฺติวิสยโลโก มนุสฺสโลโก ฯเปฯ สเทวโลโก
อสฺสาโร นิสฺสาโร สาราปคโต นิจฺจสารสาเรน วา สุขสารสาเรน
วา อตฺตสารสาเรน วา นิจฺเจน วา ธุเวน วา สสฺสเตน
วา อวิปริณามธมฺเมน วาติ สมนฺตมสาโร โลโก ฯ

[๘๐๐] ทิสา สพฺพา สเมริตาติ เย ปุรตฺถิมาย ทิสาย
สงฺขารา เตปิ เอริตา สเมริตา จลิตา ฆฏฺฏิตา อนิจฺจตาย
ชาติยา อนุคตา ชราย อนุสฏา พฺยาธินา อภิภูตา มรเณน
อพฺภาหตา ทุกฺเข ปติฏฺฐิตา อตาณา อเลณา อสรณา
อสรณีภูตา ฯ เย ปจฺฉิมาย ทิสาย สงฺขารา เย อุตฺตราย ทิสาย
สงฺขารา เย ทกฺขิณาย ทิสาย สงฺขารา เย ปุรตฺถิมาย
อนุทิสาย สงฺขารา เย ปจฺฉิมาย อนุทิสาย สงฺขารา เย อุตฺตราย
อนุทิสาย สงฺขารา เย ทกฺขิณาย อนุทิสาย สงฺขารา เย
เหฏฺฐิมาย ทิสาย สงฺขารา เย อุปริมาย ทิสาย สงฺขารา เย
ทสทิสาสุ สงฺขารา เตปิ เอริตา สเมริตา จลิตา ฆฏฺฏิตา
อนิจฺจตาย ชาติยา อนุคตา ชราย อนุสฏา พฺยาธินา อภิภูตา
มรเณน อพฺภาหตา ทุกฺเข ปติฏฺฐิตา อตาณา อเลณา อสรณา
อสรณีภูตา ฯ ภาสิตมฺปิ เจตํ
กิญฺจาปิ เจตํ ชลตี วิมานํ
โอภาสยํ อุตฺตริยํ ทิสาย
รูเป รณํ ทิสฺวา สทา ปเวธิตํ
ตสฺมา น รูเป รมตี สุเมโธ
มจฺจุนาพฺภาหโต โลโก ชราย ปริวาริโต
ตณฺหาสลฺเลน โอติณฺโณ อิจฺฉาธุมายิโก ๑ สทา
สพฺโพ อาทีปิโต โลโก สพฺโพ โลโก ปโชปิโต ๒
สพฺโพ ปชฺชลิโต โลโก สพฺโพ โลโก ปกมฺปิโตติ ฯ
ทิสา สพฺพา สเมริตา ฯ

[๘๐๑] อิจฺฉํ ภวนมตฺตโนติ อตฺตโน ภวํ ๓ ตาณํ เลณํ สรณํ
คตึ ปรายนํ อิจฺฉนฺโต สาทิยนฺโต ปตฺถยนฺโต ปิหยนฺโต
อภิชปฺปนฺโตติ อิจฺฉํ ภวนมตฺตโน ฯ

[๘๐๒] นาทฺทสาสึ อโนสิตนฺติ อนชฺโฌสิตํ น อทฺทสํ
อชฺโฌสิตญฺเญว อทฺทสํ ฯ สพฺพํ โยพฺพญฺญํ ชราย โอสิตํ สพฺพํ
อาโรคฺยํ พฺยาธินา โอสิตํ สพฺพํ ชีวิตํ มรเณน โอสิตํ สพฺพํ
ลาภํ อลาเภน โอสิตํ สพฺพํ ยสํ อยเสน โอสิตํ สพฺพํ ปสํสํ
นินฺทาย โอสิตํ สพฺพํ สุขํ ทุกฺเขน โอสิตํ ฯ
#๑ ม. อิจฺฉาธูมายิโต ฯ ๒ ม. ปธูปิโต ฯ ๓ โป. ม. ภวนํ ฯ
ลาโภ อลาโภ ยโส อยโส จ
นินฺทา จ ปสํสา จ สุขทุกฺขญฺจ
เอเต อนิจฺจา มนุเชสุ ธมฺมา
อสสฺสตา วิปริณามธมฺมาติ ฯ
นาทฺทสาสึ อโนสิตํ ฯ เตนาห ภควา
สมนฺตมสาโร โลโก ทิสา สพฺพา สเมริตา
อิจฺฉํ ภวนมตฺตโน นาทฺทสาสึ อโนสิตนฺติ ฯ

[๘๐๓] โอสาเนเตฺวว พฺยารุทฺเธ ทิสฺวา เม อรตี อหุ
อเถตฺถ สลฺลํ อทฺทกฺขึ ทุทฺทสํ หทยสฺสิตํ ฯ

[๘๐๔] โอสาเนเตฺวว พฺยารุทฺเธติ โอสาเนเตฺววาติ สพฺพํ
โยพฺพญฺญํ ชรา โอสาเปติ สพฺพํ อาโรคฺยํ พฺยาธิ โอสาเปติ
สพฺพํ ชีวิตํ มรณํ โอสาเปติ สพฺพํ ลาภํ อลาโภ โอสาเปติ
สพฺพํ ยสํ อยโส โอสาเปติ สพฺพํ ปสํสํ นินฺทา โอสาเปติ สพฺพํ
สุขํ ทุกฺขํ โอสาเปตีติ โอสาเนเตฺวว ฯ พฺยารุทฺเธติ โยพฺพญฺญกามา
สตฺตา ชราย ปฏิวิรุทฺธา อาโรคฺยกามา สตฺตา พฺยาธินา
ปฏิวิรุทฺธา ชีวิตุกามา สตฺตา มรเณน ปฏิวิรุทฺธา ลาภกามา
สตฺตา อลาเภน ปฏิวิรุทฺธา ยสกามา สตฺตา อยเสน ปฏิวิรุทฺธา
ปสํสกามา สตฺตา นินฺทาย ปฏิวิรุทฺธา สุขกามา สตฺตา ทุกฺเขน
วิรุทฺธา ปฏิวิรุทฺธา อาหตา ปจฺจาหตา อาฆาติตา ปจฺจาฆาติตาติ
โอสาเนเตฺวว พฺยารุทฺเธ ฯ

[๘๐๕] ทิสฺวา เม อรตี อหูติ ทิสฺวาติ ทิสฺวา ปสฺสิตฺวา
ตุลยิตฺวา ตีรยิตฺวา วิภาวยิตฺวา วิภูตํ กตฺวาติ ทิสฺวา ฯ เม
อรตีติ ยา อรติ ยา อนภิรติ ยา อนภิรมนา ยา อุกฺกณฺฐิยา ๑
ยา ปริตสิตา อหูติ ทิสฺวา เม อรตี อหุ ฯ