[๕๗๖] ทิฏฺฐี หิ สา ตสฺส ตถา สมตฺตาติ ตสฺส สา
ทิฏฺฐิ ตถา สมตฺตา สมาทินฺนา คหิตา ปรามฏฺฐา อภินิวิฏฺฐา
อชฺโฌสิตา อธิมุตฺตาติ ทิฏฺฐี หิ สา ตสฺส ตถา สมตฺตา ฯ
เตนาห ภควา
อตีสรํทิฏฺฐิยา โส สมตฺโต
มาเนน มตฺโต ปริปุณฺณมานี
สยเมว สามํ มนสาภิสิตฺโต
ทิฏฺฐี หิ สา ตสฺส ตถา สมตฺตาติ ฯ

[๕๗๗] ปรสฺส เจ หิ วจสา นิหีโน
ตุโม สหา โหติ นิหีนปญฺโญ
#๑ ม. สพฺพาปิ ทิฏฺฐิโย วุจฺจนฺติ อติสารทิฏฺฐิโย ฯ
อถวา สยํ เวทคู โหติ ธีโร
น โกจิ พาโล สมเณสุ อตฺถิ ฯ

[๕๗๘] ปรสฺส เจ หิ วจสา นิหีโนติ ปรสฺส เจ วาจาย
วจเนน นินฺทิตการณา ครหิตการณา อุปวทิตการณา ปโร พาโล
โหติ หีโน นิหีโน โอมโก ลามโก ชตุกฺโก ปริตฺโตติ ปรสฺส
เจ หิ วจสา นิหีโน ฯ

[๕๗๙] ตุโม สหา โหติ นิหีนปญฺโญติ โสปิ เตเนว สห
โหติ หีนปญฺโญ นิหีนปญฺโญ โอมกปญฺโญ ลามกปญฺโญ ชตุกฺกปญฺโญ
ปริตฺตปญฺโญติ ตุโม สหา โหติ นิหีนปญฺโญ ฯ

[๕๘๐] อถวา สยํ เวทคู โหติ ธีโรติ ธีโร ปณฺฑิโต ปญฺญวา
พุทฺธิมา ญาณี วิภาวี เมธาวีติ อถวา สยํ เวทคู โหติ ธีโร ฯ

[๕๘๑] น โกจิ พาโล สมเณสุ อตฺถีติ สมเณสุ น โกจิ
พาโล หีโน นิหีโน โอมโก ลามโก ชตุกฺโก ปริตฺโต อตฺถิ
สพฺเพว อคฺคปญฺญา เสฏฺฐปญฺญา วิเสฏฺฐปญฺญา ปาโมกฺขปญฺญา
อุตฺตมปญฺญา ปวรปญฺญาติ น โกจิ พาโล สมเณสุ อตฺถิ ฯ
เตนาห ภควา
ปรสฺส เจ หิ วจสา นิหีโน
ตุโม สหา โหติ นิหีนปญฺโญ
อถวา สยํ เวทคู โหติ ธีโร
น โกจิ พาโล สมเณสุ อตฺถีติ ฯ

[๕๘๒] อญฺญํ อิโต ยาภิวทนฺติ ธมฺมํ
อปรทฺธา สุทฺธิมเกวลี เต ๑
เอวมฺปิ ติตฺถฺยา ปุถุโส วทนฺติ
สนฺทิฏฺฐิราเคน หิ ตฺยาภิรตฺตา ฯ

[๕๘๓] อญฺญํ อิโต ยาภิวทนฺติ ธมฺมํ อปรทฺธา สุทฺธิมเกวลี
เตติ อิโต อญฺญํ ธมฺมํ ทิฏฺฐึ ปฏิปทํ มคฺคํ เย อภิวทนฺติ เต
สุทฺธิมคฺคํ วิสุทฺธิมคฺคํ ปริสุทฺธิมคฺคํ โวทาตมคฺคํ ปริโยทาตมคฺคํ
วิรทฺธา อปรทฺธา ขลิตา คฬิตา อญฺญาย อปรทฺธา ๒ อเกวลี
เต อสมตฺตา อปริปุณฺณา เต หีนา นิหีนา โอมกา ลามกา
ชตุกฺกา ปริตฺตาติ อญฺญํ อิโต ยาภิวทนฺติ ธมฺมํ อปรทฺธา
สุทฺธิมเกวลี เต ฯ

[๕๘๔] เอวมฺปิ ติตฺถฺยา ปุถุโส วทนฺตีติ ติตฺถํ วุจฺจติ
ทิฏฺฐิคตํ ฯ ติตฺถฺยา วุจฺจนฺติ ทิฏฺฐิคติกา ฯ ปุถุทิฏฺฐิยา
ปุถุทิฏฺฐิคตานิ วทนฺติ กเถนฺติ ภณนฺติ ทีปยนฺติ โวหรนฺตีติ เอวมฺปิ
ติตฺถฺยา ปุถุโส วทนฺติ ฯ

[๕๘๕] สนฺทิฏฺฐิราเคน หิ ตฺยาภิรตฺตาติ สกาย ทิฏฺฐิยา ราเคน
รตฺตา อภิรตฺตาติ สนฺทิฏฺฐิราเคน หิ ตฺยาภิรตฺตา ฯ เตนาห ภควา
อญฺญํ อิโต ยาภิวทนฺติ ธมฺมํ
อปรทฺธา สุทฺธิมเกวลี เต
#๑ ยุ. สุทฺธิมเกวลีโน ฯ ๒ ญายาปรทฺธาติปิ ปาโฐ ฯ
เอวมฺปิ ติตฺถฺยา ปุถุโส วทนฺติ
สนฺทิฏฺฐิราเคน หิ ตฺยาภิรตฺตาติ ฯ