[๑๑๙๗] สา ตตฺถ ปริเทวิตฺวา ปพฺพตานิ วนานิ จ
ปุนเทวสฺสมํ คนฺตฺวา สามิกสฺสนฺติ โรทติ ๒ ฯ
น โข โน เทว ปสฺสามิ เยน เต นีหฏา มตา
กาโกลาปิ น วสฺสนฺติ มตา เม นูน ทารกา ฯ
น โข โน เทว ปสฺสามิ เยน เต นีหฏา มตา
สกุณาปิ น วสฺสนฺติ มตา เม นูน ทารกา ฯ
น โข โน เทว ปสฺสามิ เยน เต นีหฏา มตา
#๑ ม. สโม เม ฯ ๒ ม. โรทิ สามิกสนฺติเก ฯ สามิกสนฺติเก โรทิ อิติปิ ฯ
วิจรนฺตี รุกฺขมูเลสุ ปพฺพเตสุ คุหาสุ จ ฯ
อิติ มทฺที วราโรหา ราชปุตฺตี ยสสฺสินี
พาหา ปคฺคยฺห กนฺทิตฺวา ตตฺเถว ปติตา ฉมา ฯ

[๑๑๙๘] ตมชฺฌปตฺตํ ราชปุตฺตึ อุทเกนาภิสิญฺจถ
อสฺสตฺถํ นํ วิทิตฺวาน อถ นํ เอตทพฺรวิ ฯ
อาทิเยเนว เต มทฺทิ ทุกฺขํ นกฺขาตุมิจฺฉิสํ
ทลิทฺโท ยาจโก วุฑฺโฒ พฺราหฺมโณ ฆรมาคโต ฯ
ตสฺส ทินฺนา มยา ปุตฺตา มทฺทิ มา ภายิ อสฺสุํ
มํ ปสฺส มทฺทิ มา ปุตฺเต มา พาฬฺหํ ปริเทวยิ
ลจฺฉาม ปุตฺเต ชีวนฺตา อโรคา จ ภวามเส ฯ
ปุตฺเต ปสุญฺจ ธญฺญญฺจ ยญฺจ อญฺญํ ฆเร ธนํ
ทชฺชา สปฺปุริโส ทานํ ทิสฺวา ยาจกมาคเต
อนุโมทาหิ เม มทฺทิ ปุตฺตเก ทานมุตฺตมํ ฯ

[๑๑๙๙] อนุโมทามิ เต เทว ปุตฺตเก ทานมุตฺตมํ
ทตฺวา จิตฺตํ ปสาเทหิ ภิยฺโย ทานํ ทโท ภว ฯ
โย ตฺวํ มจฺเฉรภูเตสุ มนุสฺเสสุ ชนาธิป
พฺราหฺมณสฺส อทา ทานํ สิวีนํ รฏฺฐวฑฺฒโน ฯ

[๑๒๐๐] นินฺนาทิตา เต ปฐวี สทฺโท เต ติทิวงฺคโต
สมนฺตา วิชฺชุตา อาคู ๒ คิรีนํว ปฏิสฺสุตา ฯ

[๑๒๐๑] ตสฺส เต อนุโมทนฺติ อุโภ นารทปพฺพตา
#๑ ม. ปริเทวสิ ฯ ๒ ม. อาคุํ ฯ
อินฺโท จ พฺรหฺมา จ ปชาปตี จ
โสโม ยโม เวสฺสวโณ จ ราชา
สพฺเพ เทวานุโมทนฺติ ตาวตึสา สอินฺทกา ฯ
อิติ มทฺที วราโรหา ราชปุตฺตี ยสสฺสินี
เวสฺสนฺตรสฺส อนุโมทิ ปุตฺตเก ทานมุตฺตมํ ฯ
มทฺทีปพฺพํ นาม ฯ

[๑๒๐๒] ตโต รตฺยา วิวสเน ๑ สุริยสฺสุคฺคมนํ ปติ
สกฺโก พฺราหฺมณวณฺเณน ปาโต เนสํ อทิสฺสถ ฯ

[๑๒๐๓] กจฺจิ นุ โภโต กุสลํ กจฺจิ โภโต อนามยํ
กจฺจิ อุญฺเฉน ยาเปถ กจฺจิ มูลผลา พหู ฯ
กจฺจิ ฑํสา มกสา จ อปฺปเมว สิรึสปา
วเน วาฬมิคากิณฺเณ กจฺจิ หึสา น วิชฺชติ ฯ

[๑๒๐๔] กุสลญฺเจว โน พฺรหฺเม อโถ พฺรหฺเม อนามยํ
อโถ อุญฺเฉน ยาเปม อโถ มูลผลา พหู ฯ
อโถ ฑํสา มกสา จ อปฺปเมว สิรึสปา
วเน วาฬมิคากิณฺเณ หึสา มยฺหํ น วิชฺชติ ฯ
สตฺต โน มาเส วสตํ อรญฺเญ ชีวิโสกินํ
อิทํปิ ทุติยํ ปสฺสาม พฺราหฺมณํ เทววณฺณินํ
อาทาย เวลุวํ ทณฺฑํ ธาเรนฺตํ อชินกฺขิปํ ฯ
สฺวาคตนฺเต มหาพฺรเหฺม อโถ เต อทุราคตํ
#๑ ม. วิวสาเน ฯ สพฺพตฺถ อีทิสเมว ฯ
อนฺโต ปวิส ภทฺทนฺเต ปาเท ปกฺขาลยสฺสุ เต ฯ
ติณฺฑุกานิ ปิยาลานิ มธุเก กาสมาริโย
ผลานิ ขุทฺทกปฺปานิ ภุญฺเช พฺรเหฺม วรํ วรํ ฯ
อิทํปิ ปานิยํ สีตํ อาภตํ คิริคพฺภรา
ตโต ปิว มหาพฺรเหฺม สเจ ตฺวํ อภิกงฺขสิ ฯ
อถ ตฺวํ เกน วณฺเณน เกน วา ปน เหตุนา
อนุปฺปตฺโตสิ พฺรหารญฺญํ ตํ เม อกฺขาหิ ปุจฺฉิโต ฯ

[๑๒๐๕] ยถา วาริวโห ปูโร สพฺพกาลํ น ขียติ
เอวนฺตํ ยาจิตาคจฺฉึ ภริยํ เม เทหิ ยาจิโต ฯ

[๑๒๐๖] ททามิ น วิกมฺปามิ ยํ มํ ยาจสิ พฺราหฺมณ
สนฺตํ นปฺปฏิคูหามิ ๑ ทาเน เม รมเต มโน ฯ