[๑๑๗๗] อาทู จาปํ คเหตฺวาน ขคฺคํ พนฺธิย วามโต
อานิสฺสามิ สเก ปุตฺเต ปุตฺตานํ หิ วโธ ทุกฺโข ฯ
อฏฺฐานเมตํ ๕ ทุกฺขรูปํ ยํ กุมารา วิหญฺญเร
สตญฺจ ธมฺมมญฺญาย โก ทตฺวา อนุตปฺปติ ฯ

[๑๑๗๘] สจฺจํ กิเรวมาหํสุ นรา เอกจฺจิยา อิธ
ยสฺส นตฺถิ สกา มาตา ยถา นตฺถิ ๖ ตเถว โส ฯ
เอหิ กเณฺห มริสฺสาม นตฺถตฺโถ ชีวิเตน โน
#๑-๓ ม. กํ นวชุํ ฉาตา ฯ ๒-๔ ม. อุปรุจฺฉนฺติ ฯ ๕ ยุ. อทฺธา หิ เมตํ ฯ
#๖ ปิตา อตฺถีติปิ ฯ
ทินฺนมฺหาปิ ๑ ชนินฺเทน พฺราหฺมณสฺส ธเนสิโน
อจฺจายิกสฺส ลุทฺทสฺส โย โน คาโวว สุมฺภติ ฯ
อิเม เต ชมฺพุกา รุกฺขา เวทิสา สินฺธุวาริตา
วิวิธานิ รุกฺขชาตานิ ตานิ กเณฺห ชหามเส ฯ
อสฺสตฺถา ปนสา เจเม นิโคฺรธา จ กปิตฺถนา
วิวิธานิ ผลชาตานิ ตานิ กเณฺห ชหามเส ฯ
อิเม ติฏฺฐนฺติ อารามา อยํ สีตูทกา นที
ยตฺถสฺสุ ปุพฺเพ กีฬาม ตานิ กเณฺห ชหามเส ฯ
วิวิธานิ ปุปฺผชาตานิ อสฺมึ อุปริ ปพฺพเต
ยานสฺสุ ปุพฺเพ ธาเรม ตานิ กเณฺห ชหามเส ฯ
วิวิธานิ ผลชาตานิ อสฺมึ อุปริ ปพฺพเต
ยานสฺสุ ปุพฺเพ ภุญฺชาม ตานิ กเณฺห ชหามเส ฯ
อิเม โน หตฺถิกา อสฺสา พลิพทฺธา จ โน อิเม
เยหิสฺสุ ปุพฺเพ กีฬาม ตานิ กเณฺห ชหามเส ฯ

[๑๑๗๙] นียมานา กุมารา เต พฺราหฺมณสฺส ปมุญฺจิย
เตน เตน ปธาวึสุ ชาลี กณฺหาชินา จุโภ ฯ

[๑๑๘๐] ตโต โส รชฺชุมาทาย ทณฺฑญฺจาทาย พฺราหฺมโณ
อาโกฏยนฺโต เต เนติ สิวิราชสฺส เปกฺขโต ฯ

[๑๑๘๑] ตํ ตํ กณฺหาชินาโวจ อยํ มํ ตาต พฺราหฺมโณ
ลฏฺฐิยา ปฏิโกเฏติ ฆเร ชาตํว ทาสิยํ ฯ
น จายํ พฺราหฺมโณ ตาต ธมฺมิกา โหนฺติ พฺราหฺมณา
#๑ ม. ทินฺนมฺหาติ ฯ
ยกฺโข พฺราหฺมณวณฺเณน ขาทิตุํ ตาต เนติ โน
นียมาเน ปิสาเจน กินฺนุ ตาต อุทิกฺขสิ ฯ

[๑๑๘๒] อิเม โน ปาทุกา ทุกฺขา ทีโฆ จทฺธา สุทุคฺคโม
นีเจ โวลมฺพเก สุริเย ๑ พฺราหฺมโณว ตเรติ ๒ โน ฯ
โอกนฺทามฺหเส ๓ ภูตานิ ปพฺพตานิ วนานิ จ
สรสฺส สิรสา วนฺทาม สุปติตฺเถ จ อาปเก ฯ
ติณลตานิ โอสโธฺย ปพฺพตานิ วนานิ จ
อมฺมํ อาโรคฺยํ วชฺชาถ อยํ โน เนติ พฺราหฺมโณ ฯ
วชฺชนฺตุ โภนฺโต อมฺมญฺจ มทฺทึ อสฺมาก มาตรํ
สเจ อนุปฺปติตุกามา ๔ ขิปฺปํ อนุปฺปเตยฺย ๕ โน ฯ
อยํ เอกปที เอติ อุชุํ คจฺฉติ อสฺสมํ
ตเมวานุปฺปเตยฺยาสิ อปิ ปสฺเสสิ โน ๖ ลหุํ ฯ
อโห วต เร ชฏินี วนมูลผลหาริยา ๗
สุญฺญํ ทิสฺวาน อสฺสมํ ตนฺเต ทุกฺขํ ภวิสฺสติ ฯ
อติเวลํ นุ อมฺมาย อุญฺฉาลทฺธํ อนปฺปกํ ๘
ยา โน พนฺเธ น ชานาติ พฺราหฺมเณน ธเนสินา ฯ
อจฺจายิเกน ลุทฺเทน โย โน คาโวว สุมฺภติ
อปชฺช อมฺมํ ปสฺเสมุ สายํ อุญฺฉาโต อาคตํ ฯ
ทชฺชา อมฺมา พฺราหฺมณสฺส ผลํ ขุทฺเทน มิสฺสิตํ
#๑ ม. โจลมฺพเต สูริโย ฯ ๒ ม. พฺราหฺมโณ จ ธาเรติ ฯ ๓ ม. โอกนฺทามเส ฯ
#๔ ม. อนุปติตุกามาสิ ฯ ๕ ม. อนุปติยาสิ ฯ ๖ ม. เน ฯ ๗ ม. …หาริเก ฯ
#๘ ม. อุญฺฉา ลทฺโธ อนปฺปโก ฯ
ตทายํ อสิโต ฉาโต น พาฬฺหํ ตรเยยฺย โน ฯ
สูนา จ วต โน ปาทา พาฬฺหํ ตาเรติ พฺราหฺมโณ
อิติ ตตฺถ วิลปึสุ กุมารา มาตุคิทฺธิโน ฯ
ทารกปพฺพํ นาม ฯ

[๑๑๘๓] เตสํ ลาลปิตํ สุตฺวา ตโย วาฬา วเน มิคา
สีโห พฺยคฺโฆ จ ทีปิ จ อิทํ วจนมพฺรวว ฯ
มา เหว โน ราชปุตฺตี สายํ อุญฺฉาโต อาคมา
มา เหวมฺหาก นิพฺโภเค เหฐยิตฺถ วเน มิคา ฯ
สีโห จ นํ วิเหเฐยฺย พฺยคฺโฆ ทีปิ จ ลกฺขณํ
เนว ชาลิกุมารสฺส กุโต กณฺหาชินา สิยา
อุภเยเนว ชิยฺเยถ ปติปุตฺเต จ ลกฺขณา ฯ

[๑๑๘๔] ขณิตฺติกํ เม ปติตํ ทกฺขิณกฺขิ จ ผนฺทติ
อผลา ผลิโน รุกฺขา สพฺพา มุยฺหนฺติ เม ทิสา ฯ
ตสฺสา สายณฺหกาลมฺหิ อสฺสมาคมนํ ปติ
อตฺถงฺคตมฺหิ สุริเย วาฬา ปนฺเถ อุปฏฺฐหุํ ฯ
นีเจ โวลมฺพเก สุริเย ๒ ทูเร จ วต อสฺสโม
ยญฺจ เนสํ อิโต หิสฺสํ ๓ ตนฺเต ภุญฺเชยฺยุ โภชนํ ฯ
โส นูน ขตฺติโย เอโก ปณฺณสาลาย อจฺฉติ
โตเสนฺโต ทารเก ฉาเต มมํ ทิสฺวา อนายตึ ฯ
เต นูน ปุตฺตกา มยฺหํ กปณาย วรากิยา
#๑ ม. ลาลปฺปิตํ ฯ ๒ ม. โจลมฺพเต สูริโย ฯ ๓ ม. หสฺสํ ฯ
สายํ สํเวสนากาเล ขีรปีตาว อจฺฉเร ฯ
เต นูน ปุตฺตกา มยฺหํ กปณาย วรากิยา
สายํ สํเวสนากาเล วาริปีตาว อจฺฉเร ฯ
เต นูน ปุตฺตกา มยฺหํ กปณาย วรากิยา
ปจฺจุคฺคตา มํ ติฏฺฐนฺติ วจฺฉา พาลาว มาตรํ ฯ
เต นูน ปุตฺตกา มยฺหํ กปณาย วรากิยา
ปจฺจุคฺคตา มํ ติฏฺฐนฺติ หํสาวุปริปลฺลเล ฯ
เต นูน ปุตฺตกา มยฺหํ กปณาย วรากิยา
ปจฺจุคฺคตา มํ ติฏฺฐนฺติ อสฺสมสฺสาวิทูรโต ฯ
เอกายโน เอกปโถ สรา โสพฺภา จ ปสฺสโต
อญฺญํ มคฺคํ น ปสฺสามิ เยน คจฺเฉยฺย อสฺสมํ ฯ
มิคา นมตฺถุ ราชาโน กานนสฺมึ มหพฺพลา
ธมฺเมน ภาตโร โหถ มคฺคํ เม เทถ ยาจิตา ฯ
อวรุทฺธสฺสาหํ ภริยา ราชปุตฺตสฺส สิรีมโต
ตญฺจาหํ นาติมญฺญามิ รามํ สีตาวนุพฺพตา ฯ
ตุเมฺห จ ปุตฺเต ปสฺเสถ ๑ สายํ สํเวสนํ ปติ
อหญฺจ ปุตฺเต ปสฺเสยฺยํ ชาลึ กณฺหาชินํ จุโภ ฯ
พหุญฺจิทํ มูลผลํ ภกฺโข จายํ อนปฺปโก
ตโต อุปฑฺฒํ ทสฺสามิ มคฺคํ เม เทถ ยาจิตา ฯ
ราชปุตฺตี จ โน มาตา ราชปุตฺโต จ โน ปิตา
#๑ ม. ปสฺสถ ฯ
ธมฺเมน ภาตโร โหถ มคฺคํ เม เทถ ยาจิตา ฯ

[๑๑๘๕] ตสฺสา ลาลปฺปมานาย พหุํ การุญฺญสญฺหิตํ
สุตฺวา เนลปตึ วาจํ วาฬา ปนฺถา อปกฺกมม ฯ

[๑๑๘๖] อิมมฺหิ นํ ปเทสมฺหิ ปุตฺตกา ปํสุกุณฺฐิตา
ปจฺจุคฺคตา มํ ติฏฺฐนฺติ วจฺฉา พาลาว มาตรํ ฯ
อิมมฺหิ นํ ปเทสมฺหิ ปุตฺตกา ปํสุกุณฺฐิตา
ปจฺจุคฺคตา มํ ติฏฺฐนฺติ หํสาวุปริปลฺลเล ฯ
อิมมฺหิ นํ ปเทสมฺหิ ปุตฺตกา ปํสุกุณฺฐิตา
ปจฺจุคฺคตา มํ ติฏฺฐนฺติ อสฺสมสฺสาวิทูรโต ฯ
เต ๑ มิคา วิย อุกฺกณฺณา สมนฺตามภิธาวิโน
อานนฺทิโน ปมุทิตา วคฺคมานาว กมฺปเร
ตฺยชฺช ปุตฺเต น ปสฺสามิ ชาลึ กณฺหาชินํ จุโภ ฯ
ฉคิลีว ๒ มิคี ฉาปํ ปกฺขี มุตฺตาว ปญฺชรา
โอหาย ปุตฺเต นิกฺขมฺม ๓ สีหีวามิสคิทฺธินี
ตฺยชฺช ปุตฺเต น ปสฺสามิ ชาลึ กณฺหาชินํ จุโภ ฯ
อิทํ เนสํ ปรกฺกนฺตํ ๔ นาคานมิว ปพฺพเต
จิตกา ปริกิณฺณาโย อสฺสมสฺสาวิทูรโต
ตฺยชฺช ปุตฺเต น ปสฺสามิ ชาลึ กณฺหาชินํ จุโภ ฯ
วาลุกายปิ โอกิณฺณา ปุตฺตกา ปํสุกุณฺฐิตา
สมนฺตามภิธาวนฺติ น เต ปสฺสามิ ทารเก ฯ
#๑ ม. เทฺว ฯ ๒ ม. ฉกลีว ฯ ๓ ม. นิกฺขมึ ฯ ๔ ม. ปทกฺกนฺตํ ฯ
เย มํ ปุเร ปจฺจุเทนฺติ ๑ อรญฺญา ทูรมายตึ
ตฺยชฺช ปุตฺเต น ปสฺสามิ ชาลึ กณฺหาชินํ จุโภ ฯ
ฉคิลีว มิคี ๒ ฉาปา ปจฺจุคฺคนฺตฺวาน มาตรํ
ทูเร มํ ปฏิวิโลเกนฺติ ๓ เต น ปสฺสามิ ทารเก ฯ
อิทญฺจ เนสํ กีฬนํ ๔ ปติตํ ปณฺฑุเวลุวํ
ตฺยชฺช ปุตฺเต น ปสฺสามิ ชาลึ กณฺหาชินํ จุโภ ฯ
ถนา จ มยฺห เม ๕ ปูรา อุโร จ สมฺปทาลติ
ตฺยชฺช ปุตฺเต น ปสฺสามิ ชาลึ กณฺหาชินํ จุโภ ฯ
อุจฺจงฺเก เม โก วิจินติ ๖ ถนา เมกาว ลมฺพติ
ตฺยชฺช ปุตฺเต น ปสฺสามิ ชาลึ กณฺหาชินํ จุโภ ฯ
ยสฺสา ๗ สายณฺหสมยํ ปุตฺตกา ปํสุกุณฺฐิตา
อุจฺจงฺเก ๘ เม วิวตฺตนฺติ เต น ปสฺสามิ ทารเก ฯ
อยํ โส อสฺสโม ปุพฺเพ สมชฺโช ปฏิภาติ มํ
ตฺยชฺช ปุตฺเต อปสฺสนฺตฺยา ภมเต วิย อสฺสโม ฯ
กิมิทํ อปฺปสทฺโทว อสฺสโม ปฏิภาติ มํ
กาโกลาปิ น วสฺสนฺติ มตา เม นูน ทารกา ฯ
กิมิทํ อปฺปสทฺโทว อสฺสโม ปฏิภาติ มํ
สกุณาปิ น วสฺสนฺติ มตา เม นูน ทารกา ฯ