[๙๖๗] มาตาเปติภโร ๒ อสฺส กุเล เชฏฺฐาปจายิโก
สโณฺห สขิลสมฺภาโส ๓ ส ราชวสตึ วเส ฯ
วินีโต สิปฺปวา ทนฺโต กตตฺโต นิยโต มุทุ
อปฺปมตฺโต สุจิ ทกฺโข ส ราชวสตึ วเส ฯ
นิวาตวุตฺติ วุฑฺเฒสุ สปฺปติสฺโส สคารโว
สุรโต สุขสํวาโส ส ราชวสตึ วเส ฯ
อารกา ปริวชฺเชยฺย สญฺหิตุํ ๔ ปหิตํ ชนํ
ภตฺตารญฺเญวุทิกฺเขยฺย น จ อญฺญสฺส ราชิโน ฯ

[๙๖๘] สมเณ พฺราหฺมเณ จาปิ สีลวนฺเต พหุสฺสุเต
สกฺกจฺจํ ปยิรุปาเสยฺย ส ราชวสตึ วเส ฯ
สมเณ พฺราหฺมเณ จาปิ สีลวนฺเต พหุสฺสุเต
สกฺกจฺจํ อนุวาเสยฺย ส ราชวสตึ วเส ฯ
สมเณ พฺราหฺมเณ จาปิ สีลวนฺเต พหุสฺสุเต
#๑ ม. พลฺยํ ฯ ๒ ม. มาตาเปตฺติภโร ฯ ๓ สี. หิริโอตฺตปฺปสมฺปนฺโน ฯ ๔ ม. สหิตุํ ฯ
ตปฺเปยฺย อนฺนปาเนน ส ราชวสตึ วเส ฯ
สมเณ พฺราหฺมเณ จาปิ สีลวนฺเต พหุสฺสุเต
อาสชฺช ปญฺเญ เสเวถ อากงฺขํ วุฑฺฒิมตฺตโน ฯ

[๙๖๙] ทินฺนปุพฺพํ น หาเปยฺย ทานํ สมณพฺราหฺมเณ
น จ กิญฺจิ นิวาเรยฺย ทานกาเล วนิพฺพเก ฯ
ปญฺญวา พุทฺธิสมฺปนฺโน วิธานวิธิโกวิโท
กาลญฺญู สมยญฺญู จ ส ราชวสตึ วเส ฯ
อุฏฺฐาตา กมฺมเธยฺเยสุ อปฺปมตฺโต วิจกฺขโณ
สุสํวิหิตกมฺมนฺโต ส ราชวสตึ วเส ฯ

[๙๗๐] ขลํ สาลํ ปสุํ เขตฺตํ คนฺตฺวา จสฺส อภิกฺขณํ
มิตํ ธญฺญํ นิธาเปยฺย มิตํ จ ๑ ปาจเย ฆเร ฯ
ปุตฺตํ วา ภาตรํ สํ วา สีเลสุ อสมาหิตํ
อนงฺคาว ๒ หิ เต พาลา ยถา เปตา ตเถว เต ฯ
โจฬญฺจ เนสํ ปิณฺฑญฺจ อาสีนานํ ปทาปเย
ทาเส กมฺมกเร โปเส ๓ สีเลสุ สุสมาหิเต
ทกฺเข อุฏฺฐานสมฺปนฺเน อาธิปจฺจสฺมิ ฐาปเย ฯ

[๙๗๑] สีลวา จ อโลโภ ๔ จ อนุวตฺโต ๕ จ ราชิโน
อาวี รโห หิโต ตสฺส ส ราชวสตึ วเส ฯ
ฉนฺทญฺญู ราชิโน จสฺส จิตฺตฏฺโฐ จสฺส ๖ ราชิโน
อสงฺกุสกวุตฺติสฺส ส ราชวสตึ วเส ฯ
#๑ ม. มิตํ ว ฯ ๒ ม. อนงฺควา ฯ ๓ ม. เปสฺเส ฯ ๔ ม. อโลโล จ ฯ ๕ ม.
#อนุรกฺโข ฯ สี. ยุ. อนุรตฺโต ฯ ๖ ม. อสฺส ฯ
อจฺฉาทเน จ นหาปเน ๑ โธเว ปาเท อโธสิรํ
อาหโตปิ น กุปฺเปยฺย ส ราชวสตึ วเส ฯ

[๙๗๒] กุมฺภิญฺหิ ปญฺชลึ กยิรา ๒ จาตํ ๓ จาปิ ปทกฺขิณํ
กิเมว สพฺพกามานํ ทาตารํ ธีรมุตฺตมํ ฯ
โย เทติ สยนํ วตฺถํ ยานํ อาวสถํ ฆรํ
ปชฺชุนฺโนริว ภูตานํ ๔ โภเคหิ อภิวสฺสติ ฯ
เอเสยฺยา ราชวสตี วตฺตมาโน ยถา นโร
อาราธยติ ราชานํ ปูชํ ลภติ ภตฺตุสุ ฯ
ราชวสตี นาม ฯ
[๕]

[๙๗๓] เอวํ สมนุสาสิตฺวา ญาติสงฺฆํ วิจกฺขโณ
ปริกิณฺโณ สุหชฺเชหิ ๖ ราชานมุปสงฺกมิ ฯ
วนฺทิตฺวา สิรสา ปาเท กตฺวา จ นํ ปทกฺขิณํ
วิธุโร อวจ ราชานํ ปคฺคเหตฺวาน อญฺชลึ ฯ
อยํ มํ มาณโว เนติ กตฺตุกาโม ยถามตึ
ญาตีนตฺถํ ปวกฺขามิ ตํ สุโณหิ อรินฺทม ฯ
ปุตฺเต จ เม อุทิกฺเขสิ ยญฺจมญฺญํ ฆเร ธนํ
ยถา ปจฺฉา ๗ น หาเยถ ญาติสงฺโฆ มยี คเต
ยเถว ขลติ ภูมฺยํ ภูมฺยาเยว ปติฏฺฐติ
เอเวตํ ขลิตํ มยฺหํ เอตํ ปสฺสามิ อจฺจยํ ฯ
#๑ ม. อุจฺฉาทเย จ นฺหาปเย ฯ ๒ ม. กุมฺภมฺปญฺชลึ กริยา ฯ ๓ สี. ยุ. วายสํ วา ฯ
#จาโตติ เอกา สกุณชาติ ฯ ๔ ม. ภูตานิ ฯ ๕ ม. อนฺตรเปยฺยาล ฯ ๖ ม. สุหเทหิ ฯ
#๗ ม. เปจฺจ ฯ

[๙๗๔] สกฺกา น คนฺตุํ อิติ มยฺหํ โหติ
เฉตฺวา ๑ วธิตฺวา อิธ กาติยานํ
อิเธว โหหิ อิติ มยฺหํ รุจฺจติ
มา ตฺวํ อคา อุตฺตมภูริปญฺญ ฯ

[๙๗๕] มา เหวธมฺเมสุ ๒ มนํ ปณีทหิ
อตฺเถ จ ธมฺเม จ ยุตฺโต ภวสฺสุ
ธิรตฺถุ กมฺมํ อกุสลํ อนริยํ
ยํ กตฺวา ปจฺฉา นิรยํ วเชยฺย ฯ
เนเวส ธมฺโม น ปุเนติ กิจฺจํ
อยิโร หิ ทาสสฺส ชนินฺท อิสฺสโร
ฆาเตตุ ฌาเปตุ อโถปิ หนฺตุํ
น จ มยฺหํ โกธตฺถิ วชามิ จาหํ ฯ

[๙๗๖] เชฏฺฐปุตฺตํ อุปคุยฺห วิเนยฺย หทเย ทรํ
อสฺสุปุณฺเณหิ เนตฺเตหิ ปาวิสิ โส มหาฆรํ ฯ