[๗๒๗] มมํ ทิสฺวาน อายนฺตํ สพฺพกามสมิทฺธินํ
อินฺทฺริยานิ อหฏฺฐานิ สาวํ ชาตํ มุขํ ตว ฯ
ปทุมํ ยถา หตฺถคตํ ปาณินา ปริมทฺทิตํ
สาวํ ชาตํ มุขํ ตุยฺหํ มมํ ทิสฺวาน เอทิสํ ฯ

[๗๒๘] กจฺจิ นุ เต นาภิสฺสสิ กจฺจิ เต อตฺถิ เวทนา
เยน สาวํ มุขํ ตุยฺหํ มมํ ทิสฺวาน อาคตํ ฯ

[๗๒๙] สุปินํ ตาต อทฺทกฺขึ อิโต มาสํ อโธคตํ
ทกฺขิณํ วิย เม พาหุํ เฉตฺวา รุหิรมกฺขิตํ
ปุริโส อาทาย ปกฺกามิ มม โรทนฺติยา สติ ฯ
ยโตหํ สุปินมทฺทกฺขึ สุทสฺสน วิชานาหิ
ตโต ทิวา วา รตฺตึ วา สุขํ เม โนปลพฺภติ ฯ

[๗๓๐] ยํ ปุพฺเพ ปริวารึสุ ๑ กญฺญา รุจิรวิคฺคหา
เหมชาลปฏิจฺฉนฺนา ภูริทตฺโต น ทิสฺสติ ฯ
ยํ ปุพฺเพ ปริวารึสุ ๑ เนตฺตึสวรธาริโน
กณิการาว สมฺผุลฺลา ภูริทตฺโต น ทิสฺสติ ฯ
หนฺททานิ คมิสฺสาม ภูริทตฺตนิเวสนํ
ธมฺมฏฺฐํ สีลสมฺปนฺนํ ปสฺสาม ตว ภาตรํ ฯ

[๗๓๑] ตญฺจ ทิสฺวาน อายนฺตํ ภูริทตฺตสฺส มาตรํ
พาหา ปคฺคยฺห ปกฺกนฺทุํ ภูริทตฺตสฺส ภริยาโย ฯ
ปุตฺตนฺเตยฺเย น ชานาม อิโต มาสํ อโธคตํ
#๑ สี. ยุ. ปริจารึสุ ฯ
มตํ วา ยทิ วา ชีวํ ภูริทตฺตํ ยสสฺสินํ ฯ

[๗๓๒] สกุณี หตปุตฺตาว สุญฺญํ ทิสฺวา กุลาวกํ
จิรํ ทุกฺเขน ฌายิสฺสํ ภูริทตฺตํ อปสฺสตี ฯ
กุรุรี หตจฺฉาปาว ๑ สุญฺญํ ทิสฺวา กุลาวกํ
จิรํ ทุกฺเขน ฌายิสฺสํ ภูริทตฺตํ อปสฺสตี ฯ
สา นูน จกฺกวกฺกีว ปลฺลลสฺมึ อนูทเก
จิรํ ทุกฺเขน ฌายิสฺสํ ภูริทตฺตํ อปสฺสตี ฯ
กมฺมารานํ ยถา อุกฺกา อนฺโต ฌายติ โน พหิ
เอวํ ฌายามิ โสเกน ภูริทตฺตํ อปสฺสตี ฯ

[๗๓๓] สาลาว สมฺปมทฺทิตา ๒ มาลุเตน ปมทฺทิตา
เสนฺติ ปุตฺตา จ ทารา จ ภูริทตฺตนิเวสเน ฯ

[๗๓๔] เตสํ สุตฺวาน นิคฺโฆสํ ภูริทตฺตนิเวสเน
อริฏฺโฐ จ สุโภโค ๓ จ ปธาวึสุ ๔ อนนฺตรา
อมฺม อสฺสาส มา โสจิ เอวํธมฺมา หิ ปาณิโน
จวนฺติ อุปปชฺชนฺติ เอสาสฺส ปริณามตา ฯ

[๗๓๕] อหํปิ ตาต ชานามิ เอวํธมฺมา หิ ปาณิโน
โสเกน จ ปเรตสฺมึ ภูริทตฺตํ อปสฺสตี
อชฺช เจ เม อิมํ รตฺตึ สุทสฺสน วิชานาหิ
ภูริทตฺตํ อปสฺสนฺตี มญฺเญ หิสฺสามิ ชีวิตํ ฯ

[๗๓๖] อมฺม อสฺสาส มา โสจิ อานยิสฺสาม ภาตรํ
#๑ ม. กุรรี หตฉาปาว ฯ ๒ ม. สมฺปมถิตา ฯ ๓ สี. ยุ. สุภโค ฯ ๔ สี. ยุ.
#อุปธาวึสุ ฯ
ทิโสทิสํ คมิสฺสาม ภาตุปริเยสนํ จรํ
ปพฺพเต คิริทุคฺเคสุ คาเมสุ นิคเมสุ จ
โอเรน สตฺตรตฺตสฺส ๑ ภาตรํ ปสฺส อาคตํ ฯ