[๗๐๗] อิทํ วตฺวา ภูริทตฺโต เปเสสิ จตุโร ชเน
เอถ คจฺฉถ อุฏฺเฐถ ขิปฺปํ ปาเปถ พฺราหฺมณํ ฯ
ตสฺส ตํ วจนํ สุตฺวา อุฏฺฐาย จตุโร ชนา
เปสิตา ภูริทตฺเตน ขิปฺปํ ปาเปสุํ พฺราหฺมณํ ฯ

[๗๐๘] มณึ ปคฺคยฺห มงฺคลฺยํ สาธุ วิตฺตํ ๑ มโนรมํ
เสลํ พฺยญฺชนสมฺปนฺนํ โก อิมํ มณิมชฺฌคา ฯ

[๗๐๙] โลหิตกฺขิสหสฺสาหิ สมนฺตา ปริวาริตํ
อชฺช กาลํ ปถํ ๒ คจฺฉํ อชฺฌคาหํ มณึ อิมํ ฯ

[๗๑๐] สุปจิณฺโณ อยํ เสโล อจฺจิโต มหิโต สทา
สุธาริโต สุนิกฺขิตฺโต สพฺพตฺถมภิสาธเย ฯ
อุปจารวิปนฺนสฺส นิกฺเขเป ธารณาย วา
อยํ เสโล วินาสาย ปริจิณฺโณ อโยนิโส ฯ
นยิมํ อกุสโล ทิพฺยํ มณึ ธาเรตุมารโห
ปฏิปชฺช สตํ นิกฺขํ เทหิมํ รตนํ มม ฯ

[๗๑๑] เนว มายํ ๓ มณิ เกยฺโย โคหิ วา รตเนหิ วา
เสโล พฺยญฺชนสมฺปนฺโน เนว เกยฺโย มณิ มม ฯ

[๗๑๒] โน เจ ตยา มณิ เกยฺโย โคหิ วา รตเนหิ วา
อถ เกน มณิ เกยฺโย ตํ เม อกฺขาหิ ปุจฺฉิโต ฯ

[๗๑๓] โย เม สํเส มหานาคํ เตชสึ ทุรติกฺกมํ
#๑ ยุ. สาธุจิตฺตํ ฯ ๒ สี. ยุ. ปทํ ฯ ๓ ม. น จ มยายํ ฯ
ตสฺส ทชฺชํ อิมํ เสลํ ชลนฺตริว ๑ เตชสา ฯ

[๗๑๔] โก นุ พฺราหฺมณวณฺเณน สุปณฺโณ ปตตํ วโร
นาคํ ชิคึสมเนฺวติ ๒ อเนฺวสํ ภกฺขมตฺตโน ฯ

[๗๑๕] นาหํ ทิชาธิโป โหมิ น ทิฏฺโฐ ครุโฬ มยา
อาสีวิเสน วิตฺโตสฺมิ ๓ เวชฺโช พฺราหฺมณ มํ วิทู ฯ

[๗๑๖] กึ นุ ตุยฺหํ พลํ อตฺถิ กึ สิปฺปํ วิชฺชเต ตว
กิสฺมึ วา ตฺวํ ปรตฺถทฺโธ อุรคํ นาปจายสิ ฯ