[๕๖๗] ตสฺส ปุฏฺโฐ วิยากาสิ มาตลิ เทวสารถิ
วิปากํ ปาปกมฺมานํ ชานํ อกฺขาสิชานโต ฯ
เย ชีวโลกสฺมึ อสาธุกมฺมิโน
ปรสฺส ทารานิ อติกฺกมนฺติ
เต ตาทิสา อุตฺตมภณฺฑเถนา
เตเม ชนา (อวํสิรา) นรเก ปาตยนฺติ ฯ
เต วสฺสปูคานิ พหูนิ ตตฺถ
นิรเยสุ ทุกฺขํ เวทนํ เวทยนฺติ
น หิ ปาปการิสฺส ภวนฺติ ตาณา
สเกหิ กมฺเมหิ ปุรกฺขิตสฺส
เต ลุทฺทกมฺมา ปสเวตฺว ปาปํ
เตเม ชนา (อวํสิรา) นรเก ปาตยนฺติ ฯ

[๕๖๘] อุจฺจาวจาเม วิวิธา อุปกฺกมา
นิรเยสุ ทิสฺสนฺติ สุโฆรรูปา
ภยํ หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อิเม นุ มจฺจา กิมกํสุ ปาปํ
เยเม ชนา อธิมตฺตา ทุกฺขา ติปฺปา ๑
#๑ ม. ติพฺพา ฯ อิโต ปรํ อีทิสเมว ฯ
ขรา กฏุกา เวทนา เวทยนฺติ ฯ

[๕๖๙] ตสฺส ปุฏฺโฐ วิยากาสิ มาตลิ เทวสารถิ
วิปากํ ปาปกมฺมานํ ชานํ อกฺขาสิชานโต ฯ
เย ชีวโลกสฺมึ สุปาปทิฏฺฐิโน
วิสฺสาสกมฺมานิ กโรนฺติ โมหา
ปรญฺจ ทิฏฺฐีสุ สมาทเปนฺติ
เต ปาปทิฏฺฐี ๑ ปสเวตฺว ปาปํ
เตเม ชนา อธิมตฺตา ทุกฺขา ติปฺปา
ขรา กฏุกา เวทนา เวทยนฺติ ฯ

[๕๗๐] วิทิตานิ เต มหาราช อาวาสํ ปาปกมฺมินํ
ฐานานิ ลุทฺทกมฺมานํ ทุสฺสีลานญฺจ ยา คติ
อุยฺยาหิทานิ ราชิสิ เทวราชสฺส สนฺติเก ฯ

[๕๗๑] ปญฺจถูปํ ทิสฺสติทํ วิมานํ
มาลาปิลนฺธา สยนสฺส มชฺเฌ
ตตฺถจฺฉตี นาริ มหานุภาวา
อุจฺจาวจํ อิทฺธิ วิกุพฺพมานา
วิตฺตี หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อยํ นุ นารี กิมกาสิ สาธุํ
ยา โมทตี สคฺคปฺปตฺตา วิมาเน ฯ
#๑ ยุ. ปาปทิฏฺฐีสุ ฯ

[๕๗๒] ตสฺส ปุฏฺโฐ วิยากาสิ มาตลิ เทวสารถิ
วิปากํ ปุญฺญกมฺมานํ ชานํ อกฺขาสิชานโต ฯ
ยทิ เต สุตา พิรณี ๑ ชีวโลเก
อามายทาสี อหุ พฺราหฺมณสฺส
สา ปตฺตกาลํ ๒ อติถึ วิทิตฺวา
มาตาว ปุตฺตํ สกิมาภินนฺที
สญฺญมา สํวิภาคา จ สา วิมานสฺมิ โมทติ ฯ

[๕๗๓] ททฺทลฺลมานา อาภนฺติ ๓ วิมานา สตฺต นิมฺมิตา
ตตฺถ ยกฺโข มหิทฺธิโก สพฺพาภรณภูสิโต
สมนฺตา อนุปริยายติ นารีคณปุรกฺขิโต ฯ
วิตฺตี หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อยํ นุ มจฺโจ กิมกาสิ สาธุํ
โย โมทติ สคฺคปฺปตฺโต วิมาเน ฯ

[๕๗๔] ตสฺส ปุฏฺโฐ วิยากาสิ มาตลิ เทวสารถิ
วิปากํ ปุญฺญกมฺมานํ ชานํ อกฺขาสิชานโต ฯ
โสณทินฺโน คหปติ เอส ทานปตี อหุ
เอส ปพฺพชิตุทฺทิสฺส วิหาเร สตฺต การยิ ฯ
สกฺกจฺจนฺเต อุปฏฺฐาสิ ภิกฺขโว ตตฺถ วาสิเก
อจฺฉาทนญฺจ ภตฺตญฺจ เสนาสนํ ปทีปยํ
#๑ วรุณีติปิ ฯ ๒ ม. ปตฺตกาเล ฯ ๓ ม. อาเภนฺติ ฯ
อทาสิ อุชุภูเตสุ วิปฺปสนฺเนน เจตสา ฯ
จาตุทฺทสึ ปญฺจทสึ ยา จ ปกฺขสฺส อฏฺฐมี
ปาฏิหาริยปกฺขญฺจ อฏฺฐงฺคสุสมาหิตํ
อุโปสถํ อุปวสิ สทา สีเลสุ สํวุโต
สญฺญโม สํวิภาโค จ โส วิมานสฺมิ โมทติ ฯ

[๕๗๕] ปภาสติมิทํ พฺยมฺหํ ผลิกาสุ สุนิมฺมิตํ
นารีวรคณากิณฺณํ กูฏาคารวิโรจิตํ
อุเปตํ อนฺนปาเนหิ นจฺจคีเตหิ จูภยํ ฯ
วิตฺตี หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อิมา นุ นารี ๑ กิมกํสุ สาธุํ
ยา ๒ โมทเร สคฺคปฺปตฺตา วิมาเน ฯ

[๕๗๖] ตสฺส ปุฏฺโฐ วิยากาสิ มาตลิ เทวสารถิ
วิปากํ ปุญฺญกมฺมานํ ชานํ อกฺขาสิชานโต ฯ
ยากาจิ นารี อิธ ชีวโลเก
สีลวนฺติโย อุปาสิกา
ทาเน รตา นิจฺจปสนฺนจิตฺตา
สจฺเจ ฐิตา อุโปสเถ อปฺปมตฺตา
สญฺญมา สํวิภาคา จ ตา วิมานสฺมิ โมทเร ฯ