[๕๕๗] ตสฺส ปุฏฺโฐ วิยากาสิ มาตลิ เทวสารถิ
วิปากํ ปาปกมฺมานํ ชานํ อกฺขาสิชานโต ฯ
โอรพฺภิกา สูกริกา จ มจฺฉิกา
ปสุํ มหึสญฺจ อเชฬกญฺจ
หนฺตฺวาน สูเณสุ ปสารยึสุ
เต ลุทฺทกมฺมา ปสเวตฺว ปาปํ
เตเม ชนา วิลกตา สยนฺติ ฯ

[๕๕๘] รหโท อยํ มุตฺตกรีสปูโร
ทุคฺคนฺธรูโป อสุจิ ปูติ วาติ
ขุทฺทาปเรตา มนุชา อเทนฺติ
ภยํ หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อิเม นุ มจฺจา กิมกํสุ ปาปํ
เยเม ชนา มุตฺตกรีสภกฺขา ฯ

[๕๕๙] ตสฺส ปุฏฺโฐ วิยากาสิ มาตลิ เทวสารถิ
#๑ สี. ยุ. วิกตฺตา ฯ ๒ สี. ยุ. ปุเนเก ฯ
วิปากํ ปาปกมฺมานํ ชานํ อกฺขาสิชานโต ฯ
เยเกจิเม การณิกา วิโรสิกา ๑
ปเรสํ วิหึสาย สทา นิวิฏฺฐา
เต ลุทฺทกมฺมา ปสเวตฺว ปาปํ
มิตฺตทฺทุโน มิฬฺหมเทนฺติ พาลา ฯ

[๕๖๐] รหโท อยํ โลหิตปุพฺพปูโร
ทุคฺคนฺธรูโป อสุจิ ปูติ วาติ
ฆมฺมาภิตตฺตา มนุชา ปิวนฺติ
ภยํ หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อิเม นุ มจฺจา กิมกํสุ ปาปํ
เยเม ชนา โลหิตปุพฺพภกฺขา ฯ

[๕๖๑] ตสฺส ปุฏฺโฐ วิยากาสิ มาตลิ เทวสารถิ
วิปากํ ปาปกมฺมานํ ชานํ อกฺขาสิชานโต ฯ
เย มาตรํ วา ปิตรํ วา ชีวโลเก
ปาราชิกา อรหนฺเต หนนฺติ
เต ลุทฺทกมฺมา ปสเวตฺว ปาปํ
เตเม ชนา โลหิตปุพฺพภกฺขา ฯ

[๕๖๒] ชิวฺหญฺจ ปสฺส พลิเสน วิทฺธํ
วิหตํ ยถา สงฺกุสเกน จมฺมํ
#๑ ม. วิโรสกา ฯ
ผนฺทนฺติ มจฺฉาว ถลมฺหิ ขิตฺตา
มุญฺจนฺติ เขฬํ รุทมานา กิเมเต
ภยํ หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อิเม นุ มจฺจา กิมกํสุ ปาปํ
เยเม ชนา วงฺกฆสฺตา สยนฺติ ฯ

[๕๖๓] ตสฺส ปุฏฺโฐ วิยากาสิ มาตลิ เทวสารถิ
วิปากํ ปาปกมฺมานํ ชานํ อกฺขาสิชานโต ฯ
เยเกจิ สณฺฐานคตา ๑ มนุสฺสา
อคฺเฆน อคฺฆํ กยํ หาปยนฺติ
กูเฏน กูฏํ ธนโลภเหตุ
ฉนฺนํ ยถา วาริจรํ วธาย ฯ
น หิ กูฏการิสฺส ภวนฺติ ตาณา
สเกหิ กมฺเมหิ ปุรกฺขิตสฺส ๒
เต ลุทฺทกมฺมา ปสเวตฺว ปาปํ
เตเม ชนา วงฺกฆสฺตา สยนฺติ ฯ

[๕๖๔] นาริโย อิมา สมฺปริภินฺนคตฺตา
ปคฺคยฺห กนฺทนฺติ ภุเช ทุชจฺจา
สมกฺขิตา โลหิตปุพฺพลิตฺตา
คาโว ยถา อาฆาตเน วิกนฺตา
#๑ ม. สนฺธานคตา ฯ สี. ยุ. สนฺถานคตา ฯ ๒ ม. ปุรกฺขตสฺส ฯ อิโต ปรํ
#อีทิสเมว ฯ
ตา ภูมิภาคสฺมึ สทา นิขาตา
ขนฺธาติวตฺตนฺติ สโชติภูตา ฯ
ภยํ หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
อิมา นุ นาริโย กิมกํสุ ปาปํ
ยา ภูมิภาคสฺมึ สทา นิขาตา
ขนฺธาติวตฺตนฺติ สโชติภูตา ฯ

[๕๖๕] ตสฺส ปุฏฺโฐ วิยากาสิ มาตลิ เทวสารถิ
วิปากํ ปาปกมฺมานํ ชานํ อกฺขาสิชานโต ฯ
โกลิตฺถิยาโย ๑ อิธ ชีวโลเก
อสุทฺธกมฺมา อสตํ ๒ อจารุํ
ตา ทิตฺตรูปา ปติ วิปฺปหาย
อญฺญํ อจารุํ รติขิฑฺฑเหตุ
ตา ชีวโลกสฺมึ รมาปยิตฺวา
ขนฺธาติวตฺตนฺติ สโชติภูตา ฯ

[๕๖๖] ปาเท คเหตฺวา กิสฺสิเม ปุเนเก
อวํสิรา นรเก ปาตยนฺติ
ภยํ หิ มํ วินฺทติ สูต ทิสฺวา
ปุจฺฉามิ ตํ มาตลิ เทวสารถิ
#๑ สี. ยุ. โกลีนิยาโย ฯ ๒ อยุตฺตนฺติปิ ฯ
อิเม นุ มจฺจา กิมกํสุ ปาปํ
เยเม ชนา (อวํสิรา) นรเก ปาตยนฺติ ฯ