[๔๑๗] น โส มูโค น โส ปกฺโข วิสฏฺฐวจโน จ โส
รชฺชสฺส กิร โส ภีโต อกรา ๑ อาลเย พหู ฯ
ปุริมํ สรติ โส ชาตึ ยตฺถ รชฺชมการยิ
การยิตฺวา ตหึ รชฺชํ ปาปตฺถํ นิรยํ ภุสํ ฯ
วีสติ เจว วสฺสานิ ตหึ รชฺชมการยิ
อสีติวสฺสสหสฺสานิ นิรยมฺหิ อปจฺจิ โส ฯ
ตสฺส รชฺชสฺส โส ภีโต มา มํ รชฺเชภิเสจยุํ
ตสฺมา ปิตุ จ มาตุ จ สนฺติเก น ภณี ตทา ฯ
องฺคปจฺจงฺคสมฺปนฺโน อาโรหปริณาหวา
วิสฺสฏฺฐวจโน ปญฺโญ มคฺเค สคฺคสฺส ติฏฺฐติ ฯ
สเจ ตฺวํ ทฏฺฐุกามาสิ ราชปุตฺตํ ตวตฺรชํ
เอหิ ตํ ปาปยิสฺสามิ ยตฺถ สมฺมติ เตมิโย ฯ

[๔๑๘] โยชยนฺตุ รเถ อสฺเส กจฺฉํ นาคานิ ๒ พนฺธถ
อุทีรยนฺตุ สงฺขปณฺฑวา นทนฺตุ เอกโปกฺขรา ฯ
นทนฺตุ เภรี สนฺนทฺธา วคฺคู นทนฺตุ ๓ ทุนฺทุภี
เนคมา จ มํ อเนฺวนฺตุ คจฺฉํ ปุตฺตนิวาทโก ๔ ฯ
โอโรธา จ กุมารา จ เวสิยานา จ พฺราหฺมณา
ขิปฺปํ ยานานิ โยเชนฺตุ คจฺฉํ ปุตฺตนิวาทโก ฯ
หตฺถาโรหา อนีกฏฺฐา รถิกา ปตฺติการกา
#๑ สี. ยุ. อกรี ฯ ๒ ม. นาคาน ฯ ๓ ม. วาทนฺตุ ฯ ๔ ม. นิเวทโก ฯ อิโต ปรํ
#อีทิสเมว ฯ
ขิปฺปํ ยานานิ โยเชนฺตุ คจฺฉํ ปุตฺตนิวาทโก ฯ
สมาคตา ชานปทา เนคมา จ สมาคตา
ขิปฺปํ ยานานิ โยเชนฺตุ คจฺฉํ ปุตฺตนิวาทโก ฯ

[๔๑๙] อสฺเส จ สารถี ยุตฺเต สินฺธเว สีฆวาหเน
ราชทฺวารํ อุปาคญฺฉฉ ยุตฺตา เทว อิเม หยา ฯ

[๔๒๐] ถูลา ชเวน หายนฺติ กีสา หายนฺติ ถามสา
กีเส ถูเล วิวชฺชิตฺวา ๑ สํสฏฺฐา โยชิตา หยา ฯ

[๔๒๑] ตโต ราชา ตรมาโน ยุตฺตมารุยฺห สนฺทนํ
อิตฺถาคารํ อชฺฌภาสิ สพฺพาว อนุยาถ มํ ฯ
วาลวีชนิมุณฺหีสํ ขคฺคํ ฉตฺตญฺจ ปณฺฑรํ
อุปาธี รถมารุยฺห สุวณฺเณหิ อลงฺกตา ฯ
ตโต จ ราชา ปายาสิ ปุรกฺขิตฺวาน สารถึ
ขิปฺปเมว อุปาคญฺฉิ ยตฺถ สมฺมติ เตมิโย ฯ

[๔๒๒] ตญฺจ ทิสฺวาน อายนฺตํ ชลนฺตมิว เตชสา
ขตฺตสงฺฆปริพฺยูฬฺหํ เตมิโย เอตทพฺรวิ ฯ
กจฺจิ นุ ตาต กุสลํ กจฺจิ ตาต อนามยํ
สพฺพา จ ราชกญฺญาโย อโรคา มยฺห มาตโร ฯ

[๔๒๓] กุสลญฺเจว เม ปุตฺต อโถ ปุตฺต อนามยํ
สพฺพา จ ราชกญฺญาโย อโรคา ตุยฺห มาตโร ฯ

[๔๒๔] กจฺจิ อมชฺชโป ๒ ตาต กจฺจิ เต สุรมปฺปิยํ
#๑ ม. วิวชฺเชตฺวา ๒ สี. กจฺจิสฺสมชฺชโป ฯ
กจฺจิ สจฺเจ จ ธมฺเม จ ทาเน เต รมตี มโน ฯ

[๔๒๕] อมชฺชโป อหํ ปุตฺต อโถ เม สุรมปฺปิยํ
อโถ สจฺเจ จ ธมฺเม จ ทาเน เม รมตี มโน ฯ

[๔๒๖] กจฺจิ อโรคํ โยคฺคนฺเต กจฺจิ วหติ วาหนํ
กจฺจิ เต พฺยาธิโย ๑ นตฺถิ สรีรสฺสุปตาปิยา ฯ