[๑๓๗] น เม อตฺโถปิ รชฺเชน นคเรน ธเนน วา
อโถปิ ชนปเทน อตฺโถ มยฺหํ น วิชฺชติ ฯ

[๑๓๘] โภโตว รฏฺเฐ วิชิเต อรญฺเญ อตฺถิ อสฺสโม
ปิตา มยฺหํ ชเนตฺตี จ อุโภ สมฺมนฺติ อสฺสเม ฯ
เตสาหํ ปุพฺพาจริเยสุ ปุญฺญํ น ลภามิ กาตเว
ภวนฺตํ อชฺฌาวรํ กตฺวา โสณํ ยาเจมุ สํวรํ ฯ

[๑๓๙] กโรมิ เต ตํ วจนํ ยํ มํ ภณสิ พฺราหฺมณ
เอตญฺจ โข โน อกฺขาหิ กีวนฺโต โหนฺตุ ยาจกา ฯ

[๑๔๐] ปโรสตํ ชานปทา มหาสาลา จ พฺราหฺมณา
อิเม จ ขตฺติยา สพฺเพ อภิชาตา ยสสฺสิโน
ภวญฺจ ราชา มโนโช อลํ เหสฺสนฺติ ยาจกา ฯ

[๑๔๑] หตฺถี อสฺเส จ โยเชนฺตุ รถํ สนฺนยฺห สารถิ
อาพนฺธนานิ คณฺหาถ ปาทาสุสฺสารยทฺธเช ๑
#๑ สี. ปาเทสุสฺสารยํ ธเช ฯ
อสฺสมนฺตํ คมิสฺสามิ ยตฺถ สมฺมติ โกสิโย ฯ

[๑๔๒] ตโต จ ราชา ปายาสิ เสนาย จตุรงฺคินี
อคมาสิ อสฺสมํ รมฺมํ ยตฺถ สมฺมติ โกสิโย ฯ

[๑๔๓] กสฺส กาทมฺพโย กาโช เวหาสํ จตุรงฺคุลํ
อํสํ อสํผุสํ เอติ อุทหารสฺส ๑ คจฺฉโต ฯ

[๑๔๔] อหํ โสโณ มหาราช ตาปโส สหิตพฺพโต
ภรามิ มาตาปิตโร รตฺตินฺทิวมตนฺทิโต ฯ
วนผลญฺจ มูลญฺจ อาหริตฺวา ทิสมฺปติ
โปเสมิ มาตาปิตโร ปุพฺเพกตมนุสฺสรํ ฯ๙

[๑๔๕] อิจฺฉาม อสฺสมํ คนฺตุํ ยตฺถ สมฺมติ โกสิโย
มคฺคํ โน โสณ อกฺขาหิ เยน คจฺเฉมุ ๒ อสฺสมํ ฯ

[๑๔๖] อยํ เอกปที ราช เยเนตํ เมฆสนฺนิภํ
โกวิลาเรหิ สญฺฉนฺนํ เอตฺถ สมฺมติ โกสิโย ฯ