[๒๓๙๗] อิจฺเจว วากฺยํ วิสชฺชิ สุปณฺโณ
ภูมฺยํ ปติฏฺฐาย ทิโช ทุชิวฺหํ
มุตฺตชฺช ตฺวํ สพฺพภยาติวตฺโต
ถลูทเก โหหิ มยาภิคุตฺโต ฯ
อาตงฺกินํ ยถา กุสโล ภิสกฺโก
ปิปาสิตานํ รหโทว สีโต
เวสฺมํ ยถา หิมสีตฏฺฏิตานํ ๒
เอวมฺปิ เต สรณมหํ ภวามิ ฯ

[๒๓๙๘] สทฺธึ กตฺวา อมิตฺเตน อณฺฑเชน ชลาพุช
วิวริย ทาฐํ ปสฺสสิ ๓ กุโต ตํ ภยมาคตํ ฯ

[๒๓๙๙] สงฺเกเถว อมิตฺตสฺมึ มิตฺตสฺมึปิ น วิสฺสเส
อภยา ภยมุปฺปนฺนํ อปิ มูลานิ กนฺตติ ฯ
กถํ นุ วิสฺสเส ตฺยมฺหิ เยนาสิ กลโห กโต
นิจฺจยตฺเตน ฐาตพฺพํ โส ทิสพฺภิ น รชฺชติ ฯ
วิสฺสาสเย น จ นํ วิสฺสเสยฺย
อสงฺกิโต สงฺกิโต จ ภเวยฺย
#๑ ม. รชฺชสฺสุ ฯ ๒ ยุ. หิมสิสริฏฺฏิตานํ ฯ ๓ ม. เสสิ ฯ
ตถา ตถา วิญฺญู ปรกฺกเมยฺย
ยถา ยถา ภาวํ ปโร น ชญฺญา ฯ

[๒๔๐๐] เต เทววณฺณา ๑ สุขุมาลรูปา
อุโภ สมา สุชยา ปุญฺญกฺขนฺธา
อุปาคมม กรมฺปิยํ ๒ อเจลํ
มิสฺสีภูตา อสฺสวาหาว นาคา ฯ

[๒๔๐๑] ตโต หเว ปณฺฑรโก อเจลํ
สยเมวุปาคมฺม อิทํ อโวจ
มุตฺตชฺชหํ สพฺพภยาติวตฺโต
น หิ นูน ตุยฺหํ มนโส ปิยมฺหา ฯ

[๒๔๐๒] ปิโย หิ เม อาสิ สุปณฺณราชา
อสํสยํ ปณฺฑรเกน สจฺจํ
โส ราครตฺโต จ อกาสิ เอตํ ๓
ปาปกมฺมํ สมฺปชาโน น โมหา ฯ

[๒๔๐๓] น เม ปิยํ อปฺปิยํ วาปิ โหติ
สมฺปสฺสโต โลกมิมํ ปรญฺจ
สุสญฺญตานญฺหิ วิยญฺชเนน
อสญฺญโต โลกมิมํ จราสิ ฯ
อริยาวกาโสสิ อนริโยว โหสิ ๔
อสญฺญโต สญฺญตสนฺนิกาโส
#๑ ยุ. เทววณฺณี ฯ ๒ สี. กาทมฺพิยํ ฯ ยุ. การมฺพิยํ ฯ ๓ ม. -รตฺโตว
#อกาสิเมตํ ฯ ๔ ม. อนริโยวาสิ ฯ
กณฺหาภิชาติโก ๑ อนรียรูโป
ปาปํ พหุํ ทุจฺจริตํ อจาริ ฯ

[๒๔๐๔] อทุฏฺฐสฺส ตุวํ ทุพฺภิ ทุพฺภี จ ปิสุโณ จสิ
เอเตน สจฺจวชฺเชน มุทฺธา เต ผลตุ สตฺตธา ฯ

[๒๔๐๕] ตสฺมา หิ มิตฺตานํ น ทุพฺภิตพฺพํ
มิตฺตทุพฺภา หิ ๒ ปาปิโย นตฺถิ อญฺโญ
อาสิตฺตสตฺโต นิหโต ปฐพฺยา
อินฺทสฺส วาเกฺยน หิ สํวโร หโตติ ฯ
ปณฺฑรกชาตกํ อฏฺฐมํ ฯ
______________________
๙ สมฺพุลาชาตกํ

[๒๔๐๖] กา เวธมานา คิริกนฺทรายํ
เอกา ตุวํ ติฏฺฐสิ สญฺจิตูรุ ๓
ปุฏฺฐาสิ เม ปาณิปเมยฺยมชฺเฌ
อกฺขาหิ เม นามญฺจ พนฺธเว จ ฯ
โอภาสยํ วนํ รมฺมํ สีหพฺยคฺฆนิเสวิตํ
กา วา ตฺวมสิ กลฺยาณี กสฺส วา ตฺวํ สุมชฺฌิเม
อภิวาเทมิ ตํ ภทฺเท ทานวาหํ นมตฺถุ เต ฯ