[๒๐๙๗] ปรสฺส วา อตฺตโน วาปิ เหตุ
น ภาสติ อลิกํ ภูริปญฺโญ
โส ปูชิโต โหติ สภาย มชฺเฌ
ปจฺฉาปิ โส สุคฺคติคามิ โหติ
เอตมฺปิ ทิสฺวาน อหํ วทามิ9
ปญฺโญว เสยฺโย น ยสสฺสิ พาโล ฯ

[๒๐๙๘] หตฺถิควสฺสา มณิกุณฺฑลา จ
นาริโย ๑ จ อิทฺเธสุ กุเลสุ ชาตา
สพฺพาว ตา อุปโภคา ภวนฺติ
อิทฺธสฺส โปสสฺส อนิทฺธิมนฺโต
เอตมฺปิ ทิสฺวาน อหํ วทามิ
ปญฺโญ นิหีโน สิริมาว เสยฺโย ฯ

[๒๐๙๙] อสํวิหิตกมฺมนฺตํ พาลํ ทุมฺมนฺติมนฺตินํ ๒
สิรี ชหติ ทุมฺเมธํ ชิณฺณํว อุรโค ตจํ
เอตมฺปิ ทิสฺวาน อหํ วทามิ
ปญฺโญว เสยฺโย น ยสสฺสิ พาโล ฯ

[๒๑๐๐] ปญฺจ ปณฺฑิตา มยํ ภทนฺเต
#๑ ม. ถิโย ฯ ๒ ม. ทุมฺเมธมนฺตินํ ฯ
สพฺเพ ปญฺชลิกา อุปฏฺฐิตา ตํ ๑
ตฺวํ โน อภิภุยฺย อิสฺสโรสิ
สกฺโกว ภูตปฺปติ เทวราชา
เอตมฺปิ ทิสฺวาน อหํ วทามิ
ปญฺโญ นิหีโน สิริมาว เสยฺโย ฯ

[๒๑๐๑] ทาโสว ปญฺญสฺส ยสสฺสิ พาโล
อตฺเถสุ ชาเตสุ ตถาวิเธสุ
ยํ ปณฺฑิโต นิปุณํ สํวิเธติ
สมฺโมหมาปชฺชติ ตตฺถ พาโล
เอตมฺปิ ทิสฺวาน อหํ วทามิ
ปญฺโญว เสยฺโย น ยสสฺสิ พาโล ฯ

[๒๑๐๒] อทฺธา หิ ปญฺญาว สตํ ปสตฺถา
กนฺตา สิรี โภครตา มนุสฺสา
ญาณญฺจ พุทฺธานมตุลฺยรูปํ
ปญฺญํ น อจฺเจติ สิรี กทาจิ ฯ

[๒๑๐๓] ยนฺตํ อปุจฺฉิมฺห อกิตฺตยี โน
มโหสธ เกวลธมฺมทสฺสิ
ควํสหสฺสํ อุสภญฺจ นาคํ
อาชญฺญยุตฺเต จ รเถ ทส อิเม
ปญฺหสฺส เวยฺยากรเณน ตุฏฺโฐ
#๑ ม. อยํ ปาโฐ นตฺถิ ฯ
ททามิ เต คามวรานิ โสฬสาติ ฯ
สิริมนฺทชาตกํ จตุตฺถํ ฯ
_______________
๕ โรหนมิคชาตกํ ๑

[๒๑๐๔] เอเต ยูถา ปฏิยนฺติ ภีตา มรณา ๒ จิตฺตก
คจฺฉ ตุวํปิ มา กงฺขิ ชีวิสฺสนฺติ ตยา สห ฯ

[๒๑๐๕] นาหํ โรหน ๓ คจฺฉามิ หทยํ เม อวกสฺสติ
น ตํ อหํ ชหิสฺสามิ อิธ เหสฺสามิ ๔ ชีวิตํ ฯ
เต หิ นูน มริสฺสนฺติ อนฺธา อปริณายกา
คจฺฉ ตุวํปิ มา กงฺขิ ชีวิสฺสนฺติ ตยา สห ฯ
นาหํ โรหน คจฺฉามิ หทยํ เม อวกสฺสติ
น ตํ พนฺธํ ชหิสฺสามิ อิธ เหสฺสามิ ชีวิตํ ฯ

[๒๑๐๖] คจฺฉ ภีรุ ปลายสฺสุ กูเฏ พนฺโธสฺมิ อายเส
คจฺฉ ตุวํปิ มา กงฺขิ ชีวิสฺสนฺติ ตยา สห ฯ