[๑๙๔๗] จาตุทฺทสึ ปญฺจทสึ ยา จ ปกฺขสฺส อฏฺฐมี ๓
ปาฏิหาริยปกฺขญฺจ อฏฺฐงฺคสุสมาหิตํ ๔
อุโปสถํ อุปวสามิ สทา สีเลสุ สํวุตา ฯ
เอเตน สจฺจวชฺเชน ปุตฺโต อุปฺปชฺชตํ อิเส
มุสา เม ภณมานาย มุทฺธา ผลตุ สตฺตธา ฯ

[๑๙๔๘] สพฺเพว เต ธมฺมคุณา ราชปุตฺติ ยสสฺสินิ
สํวิชฺชนฺติ ตยิ ภทฺเท เย ตฺวํ กิตฺเตสิ อตฺตนิ ฯ
ขตฺติโย ชาติสมฺปนฺโน อภิชาโต ยสสฺสิมา
ธมฺมราชา เวเทหานํ ๕ ปุตฺโต อุปชฺชเต ตว ฯ

[๑๙๔๙] ทุมฺมิ ๖ รโชชลฺลธโร อเฆ เวหายสณฺฐิโต
มนุญฺญํ ภาสเส วาจํ ยํ มยฺหํ หทยงฺคมํ ฯ
#๑ ม. เปสฺเส ฯ ๒ ม. เปเสมิ ฯ ๓ สี. ยุ. อฏฺฐมึ ฯ ๔ ม. อฏฺฐงฺคสุสมาคตํ ฯ
#๕ ม. วิเทหานํ ฯ ๖ รุมฺหีติปิ ฯ สี. ยุ. รุมฺมี ฯ ม. ทุมฺมี ฯ
เทวตา นุสิ สคฺคมฺหา อิสิ วาปิ ๑ มหิทฺธิโก
โก วาสิ ตฺวํ อนุปฺปตฺโต อตฺตานํ เม ปเวทย ฯ

[๑๙๕๐] ยํ เทวสงฺฆา วนฺทนฺติ สุธมฺมาย สมาคตา
โสหํ สกฺโก สหสฺสกฺโข อาคโตสฺมิ ตวนฺติเก ฯ
อิตฺถิโย ชีวโลกสฺมึ ยา โหนฺติ ๒ สมจารินี
เมธาวินี สีลวตี สสฺสุเทวา ปติพฺพตา ฯ
ตาทิสาย สุเมธาย สุจิกมฺมาย นาริยา
เทวา ทสฺสนมายนฺติ มานุสิยา อมานุสา ฯ
ตฺวญฺจ ภทฺเท สุจิณฺเณน ปุพฺเพ สุจริเตน จ
อิธ ราชกุเล ชาตา สพฺพกามสมิทฺธินี ฯ
อยญฺจ เต ราชปุตฺติ อุภยตฺถ กฏคฺคโห
เทวโลกูปปตฺติ จ กิตฺติ จ อิธ ชีวิเต ฯ
จิรํ สุเมเธ สุขินี ธมฺมมตฺตนิ ปาลย
เอสาหํ ติทิวํ ยามิ ปิยํ เม ตว ทสฺสนนฺติ ฯ
สุรุจิชาตกํ ฉฏฺฐํ ฯ
_________________
๗ ปญฺจุโปสถิกชาตกํ

[๑๙๕๑] อปฺโปสฺสุกฺโกทานิ ตุวํ กโปต
วิหงฺคม น ตว โภชนตฺโถ
ขุทฺทํ ปิปาสํ อธิวาสยนฺโต
#๑ ม. วาสิ ฯ ๒ ม. โหติ ฯ
กสฺมา ภวํโปสถิโก กโปต ๑ ฯ

[๑๙๕๒] อหํ ปุเร คิทฺธิคโต กโปติยา
ตสฺมึ ปเทสมฺหิ อุโภ ๒ รมาม
อถคฺคหี สากุณิโก กโปตึ
อกามโก ตาย วินา อโหสึ ฯ
นานาภาวา ๓ วิปฺปโยเคน ตสฺสา
มโนมยํ เวทน เวทยามิ ๔
ตสฺมา อหํโปสถ ๕ ปาลยามิ
ราโค มมํ มา ปุนราคมาสิ ฯ

[๑๙๕๓] อนุชฺชุคามิ อุรค ทุชิวฺห
ทาฐาวุโธ โฆรวิโสสิ สปฺป
ขุทฺทํ ปิปาสํ อธิวาสยนฺโต
กสฺมา ภวํโปสถิโก นุ ทีฆ ๖ ฯ

[๑๙๕๔] อุสโภ อหุ พลวา คามิกสฺส
จลกฺกกู วณฺณพลูปปนฺโน
โส มํ อกฺกมิ ตํ กุปิโต อฑํสึ
ทุกฺขาภิตุนฺโน มรณํ อุปาคา ๗ ฯ
ตโต ชนา นิกฺขมิตฺวาน คามา
กนฺทิตฺวา โรทิตฺวา อปกฺกมึสุ
ตสฺมา อหํโปสถ ปาลยามิ
#๑ สี. ยุ. กโปโต ฯ ๒ ม. อสฺมึ ปเทสสฺมิมุโภ ฯ ๓ ม. นานาภวา ฯ
#๔ สี. ยุ. เวทนํ เวทิยามิ ฯ ๕ ม. อหํ โปสถํ ฯ เอวมุปริปิ ฯ ๖ สี. ยุ. ทีโฆ ฯ
#๗ สี. ยุ. อุปาคมิ ฯ
โกโธ มมํ มา ปุนราคมาสิ ฯ

[๑๙๕๕] มตาน มํสานิ พหู สุสาเน
มนุญฺญรูปํ ตว โภชเนตํ
ขุทฺทํ ปิปาสํ อธิวาสยนฺโต
กสฺมา ภวํโปสถิโก สิคาล ๑ ฯ

[๑๙๕๖] ปวิสฺส ๒ กุจฺฉึ มหโต คชสฺส
กุณเป รโต หตฺถิมํเสสุ คิทฺโธ ๓
อุโณฺห จ วาโต ติขิณา จ รสฺมิโย
เต โสสยุํ ตสฺส กรีสมคฺคํ ฯ
กีโส จ ปณฺฑู จ อหํ ภทนฺเต
น เม อหุ นิกฺขมนาย มคฺโค
มหา จ เมโฆ สหสา ปวสฺสิ
โส เตมยิ ตสฺส กรีสมคฺคํ ฯ
ตโต อหํ นิกฺขมิสํ ภทนฺเต
จนฺโท ยถา ราหุมุขา ปมุตฺโต
ตสฺมา อหํโปสถ ปาลยามิ
โลโภ มมํ มา ปุนราคมาสิ ฯ