[๑๙๑๗] ขตฺติยา พฺราหฺมณา เวสฺสา สุทฺทา จณฺฑาลปุกฺกุสา
สพฺเพว โสรตา ทนฺตา สพฺเพว ปรินิพฺพุตา
สพฺเพสํ สีติภูตานํ อตฺถิ เสยฺโยถ ๓ ปาปิโย ฯ

[๑๙๑๘] ขตฺติยา พฺราหฺมณา เวสฺสา สุทฺทา จณฺฑาลปุกฺกุสา
สพฺเพว โสรตา ทนฺตา สพฺเพว ปรินิพฺพุตา
สพฺเพสํ สีติภูตานํ นตฺถิ เสยฺโยถ ๓ ปาปิโย ฯ

[๑๙๑๙] ขตฺติยา พฺราหฺมณา เวสฺสา สุทฺทา จณฺฑาลปุกฺกุสา
สพฺเพว โสรตา ทนฺตา สพฺเพว ปรินิพฺพุตา
สพฺเพสํ สีติภูตานํ นตฺถิ เสยฺโยถ ๓ ปาปิโย
ปสตฺถํ ๔ จรสิ พฺรหฺมญฺญํ โสตฺถิยกุลวํสตํ ฯ

[๑๙๒๐] นานารตฺเตหิ วตฺเถหิ วิมานํ ภวติ ฉาทิตํ
น เตสํ ฉายา วตฺถานํ โส ราโค อนุปชฺชถ
#๑ ม. น ขนฺตี นาปิ โสรจฺจํ ฯ ๒ ม. โส ฯ ๓ สี. ยุ. เสยฺโยว ฯ ๔ ม. ปนตฺถํ ฯ
เอวเมว มนุสฺเสสุ ยทา สุชฺฌนฺติ มาณวา
น เตสํ ชาตึ ปุจฺฉนฺติ ๑ ธมฺมมญฺญาย สุพฺพตาติ ฯ
อุทฺทาลกชาตกํ จตุตฺถํ ฯ
____________
๕ ภิสชาตกํ

[๑๙๒๑] อสฺสํ ควํ รชตํ ชาตรูปํ
ภริยญฺจ โส อิธ ลภตํ มนาปํ
ปุตฺเตหิ ทาเรหิ สมงฺคิ โหตุ
ภิสานิ เต พฺราหฺมณ โย อหาสิ ฯ

[๑๙๒๒] มาลญฺจ โส กาสิกจนฺทนญฺจ
ธาเรตุ ปุตฺตสฺส พหู ภวนฺตุ
กาเมสุ ติพฺพํ กุรุตํ อเปกฺขํ
ภิสานิ เต พฺราหฺมณ โย อหาสิ ฯ

[๑๙๒๓] ปหูตธญฺโญ กสิมา ยสสฺสี
ปุตฺเต คิหี ธนิมา สพฺพกาเม
วยํ อปสฺสํ ฆรมาวสาตุ
ภิสานิ เต พฺราหฺมณ โย อหาสิ ฯ

[๑๙๒๔] โส ขตฺติโย โหตุ ปสยฺหการี
ราชาธิราชา พลวา ยสสฺสี
#๑ เต สชาตึ ปมุญฺจนฺตีติปิ ฯ
ส จาตุรนฺตํ มหิมาวสาตุ
ภิสานิ เต พฺราหฺมณ โย อหาสิ ฯ

[๑๙๒๕] โส พฺราหฺมโณ โหตุ อวีตราโค
มุหุตฺตนกฺขตฺตปเถสุ ยุตฺโต
ปูเชตุ นํ รฏฺฐปตี ยสสฺสี
ภิสานิ เต พฺราหฺมณ โย อหาสิ ฯ

[๑๙๒๖] อชฺฌายกํ สพฺพสมนฺตเวทํ ๑
ตปสฺสินํ มญฺญตุ สพฺพโลโก
ปูเชนฺตุ นํ ชานปทา สเมจฺจ
ภิสานิ เต พฺราหฺมณ โย อหาสิ ฯ