[๑๙๐๗] ขราชินา ชฏิลา ปงฺกทนฺตา
ทุมฺมกฺขรูปา เย มนฺตํ ๒ ชปนฺติ
กจฺจิ นุ เต มานุสเก ปโยเค
อิทํ วิทู ปริมุตฺตา อปายา ฯ
#๑ ม. มิตฺเต ฯ สี. เมตฺเต ฯ ๒ สี. ยุ. ทุมฺมุขรูปา เย เม ฯ

[๑๙๐๘] ปาปานิ กมฺมานิ กเรยฺย ๑ ราช
พหุสฺสุโต เจ น จเรยฺย ธมฺมํ
สหสฺสเวโทปิ น ตํ ปฏิจฺจ
ทุกฺขา ปมุญฺเจ จรณํ อปตฺวา ฯ

[๑๙๐๙] สหสฺสเวโทปิ น ตํ ปฏิจฺจ
ทุกฺขา ปมุญฺเจ จรณํ อปตฺวา
มญฺญามิ เวทา อผลา ภวนฺติ
สสํยมํ จรณญฺเญว สจฺจํ ฯ

[๑๙๑๐] นเหว เวทา อผลา ภวนฺติ
สสํยมํ จรณญฺเญว สจฺจํ
กิตฺติญฺจ ปปฺโปติ อธิจฺจ เวเท
สนฺตึ ปุเณติ ๒ จรเณน ทนฺโต ฯ

[๑๙๑๑] ภจฺจา มาตา ปิตา พนฺธุ ๓ เยน ชาโต สฺวเยว ๔ โส
อุทฺทาลโก อหํ โภโต โสตฺถิยกุลวํสโต ๕ ฯ

[๑๙๑๒] กถํ โภ พฺราหฺมโณ โหติ กถํ ภวติ เกวลี
กถญฺจ ปรินิพฺพานํ ธมฺมฏฺโฐ กินฺติ วุจฺจติ ฯ

[๑๙๑๓] นิรํ กตฺวา อคฺคิมาทาย พฺราหฺมโณ
อาโปสิญฺจํ ยชํ อุสฺเสติ ยูปํ
เอวงฺกโร พฺราหฺมโณ โหติ เขมี
ธมฺเม ฐิตํ เตน อมาปยึสุ ฯ
#๑ ม. กเรถ ฯ ๒ สี. ปุโนติ ฯ ม. ปุณาติ ฯ ยุ. ปุเนติ ฯ ๓ ม. พนฺธู ฯ
#๔ ม. สเยว ฯ ๕ ม. โสตฺถิยากุลวํสโก ฯ

[๑๙๑๔] น สุทฺธิ เสจเนน อตฺถิ นปิ เกวลี พฺราหฺมโณ
น เจว ขนฺติ โสรจฺจํ ๑ นปิ โส ปรินิพฺพุโต ฯ

[๑๙๑๕] กถํ โภ ๒ พฺราหฺมโณ โหติ กถํ ภวติ เกวลี
กถญฺจ ปรินิพฺพานํ ธมฺมฏฺโฐ กินฺติ วุจฺจติ ฯ

[๑๙๑๖] อเขตฺตพนฺธุ อมโม นิราโส
นิลฺโลภปาโป ภวโลภขีโณ
เอวงฺกโร พฺราหฺมโณ โหติ เขมี
ธมฺเม ฐิตํ เตน อมาปยึสุ ฯ