[๑๘๑๗] วรญฺเจ เม อโท สกฺก สพฺพภูตานมิสฺสร
ธีรํ ปสฺเส สุเณ ธีรํ ธีเรน สห สํวเส
ธีเรนลฺลาปสลฺลาปํ ตํ กเร ตญฺจ โรจเย ฯ

[๑๘๑๘] กินฺนุ เต อกรํ ธีโร วท กสฺสป การณํ
เกน กสฺสป ธีรสฺส ทสฺสนํ อภิกงฺขสิ ฯ

[๑๘๑๙] นยํ นยติ เมธาวี อธุรายํ น ยุญฺชติ
สุนโย เสยฺยโส โหติ สมฺมา วุตฺโต น กุปฺปติ
วินยํ โส ปชานาติ สาธุ เตน สมาคโม ฯ

[๑๘๒๐] เอตสฺมึ เต สุลปิเต ปฏิรูเป สุภาสิเต
วรํ กสฺสป เต ทมฺมิ ยงฺกิญฺจิ มนสิจฺฉสิ ฯ

[๑๘๒๑] วรญฺเจ เม อโท สกฺก สพฺพภูตานมิสฺสร
ตโต รตฺยา วิวสเน ๑ สุริยสฺสุคฺคมนํ ปติ
ทิพฺพา ภกฺขา ปาตุภเวยฺยุํ สีลวนฺโต จ ยาจกา
ททโต เม น ขีเยถ ทตฺวา นานุตเปยฺยหํ
ททํ จิตฺตํ ปสาเทยฺยํ เอตํ สกฺก วรํ วเร ฯ

[๑๘๒๒] เอตสฺมึ เต สุลปิเต ปฏิรูเป สุภาสิเต
วรํ กสฺสป เต ทมฺมิ ยงฺกิญฺจิ มนสิจฺฉสิ ฯ

[๑๘๒๓] วรญฺจ เม อโท สกฺก สพฺพภูตานมิสฺสร
น มํ ปุน อุเปยฺยาสิ เอตํ สกฺก วรํ วเร ฯ

[๑๘๒๔] พหูหิ วตฺตจริยาหิ นรา จ อถ นาริโย
ทสฺสนํ อภิกงฺขนฺติ กินฺนุ เม ทสฺสเน ภยํ ฯ

[๑๘๒๕] ตํ ตาทิสํ เทววณฺณํ ๒ สพฺพกามสมิทฺธินํ
ทิสฺวา ตโป ปมชฺเชยฺยํ ๓ เอตํ เต ทสฺสเน ภยนฺติ ฯ
อกิตฺติชาตกํ สตฺตมํ ฯ
___________
๘ ตกฺการิยชาตกํ

[๑๘๒๖] อหเมว ทุพฺภาสิตํ ภาสิ พาโล
เภโกวรญฺเญ อหิมวฺหายมาโน
ตกฺการิเย โสพฺภมิมํ ปตามิ
#๑ ม. วิวสาเน ฯ ๒ ยุ. เทววณฺณึ ฯ ๓ ม. ปมชฺเชยฺย ฯ
น กิเรว สาธุ อติเวลภาณี ฯ