[๑๖๙๗] อสฺสตรีรถญฺจ เอกเมกํ
ผีตํ คามวรญฺจ เอกเมกํ
สพฺเพสํ โว ทมฺมิ ปณฺฑิตานํ
ปรมปฺปตีตมโน สุภาสิเตนาติ ฯ
เมณฺฑกปญฺหาชาตกํ อฏฺฐมํ ฯ
_______________
๙ มหาปทุมชาตกํ

[๑๖๙๘] นาทิฏฺฐา ๒ ปรโต โทสํ อณณถูลานิ สพฺพโส
อิสฺสโร ปณเย ทณฺฑํ สามํ อปฺปฏิเวกฺขิย ฯ

[๑๖๙๙] โย จ อปฺปฏิเวกฺขิตฺวา ทณฺฑํ กุพฺพติ ขตฺติโย
สกณฺฏกํ โส คิลติ ชจฺจนฺโธว สมกฺขิกํ ฯ

[๑๗๐๐] อทณฺฑิยํ ทณฺฑิยติ ๓ ทณฺฑิยญฺจ อทณฺฑิยํ
อนฺโธว วิสมํ มคฺคํ น ชานาติ สมาสมํ ฯ

[๑๗๐๑] โย จ เอตานิ ฐานานิ อณณถูลานิ สพฺพโส
สุทิฏฺฐมนุสาเสยฺย สเว โวหริตุมรหติ ฯ
#๑ ม. เมทิสา ฯ ๒ ม. นาทฏฺฐา ฯ ๓ ม. ฑณฺฑยติ ฯ

[๑๗๐๒] เนกนฺตมุทุนา สกฺกา เอกนฺตติขิเณน วา
อตฺตํ มหตฺเต ฐาเปตุํ ๑ ตสฺมา อุภยมาจเร ฯ

[๑๗๐๓] ปริภูโต มุทุ โหติ อติติกฺโข จ เวรวา
เอตญฺจ อุภยํ ญตฺวา อนุมชฺฌํ สมาจเร ฯ

[๑๗๐๔] พหุมฺปิ รตฺโต ภาเสยฺย ทุฏฺโฐปิ พหุ ภาสติ
น อิตฺถีการณา ราช ปุตฺตํ ฆาเตตุมรหสิ ฯ

[๑๗๐๕] สพฺโพว ๒ โลโก เอกโต ๓ อิตฺถี จ อยเมกิกา
เตนาหํ ปฏิปชฺชิสฺสํ คจฺฉ ๔ ปกฺขิปเถว นํ ฯ

[๑๗๐๖] อเนกตาเล นรเก คมฺภีเร จ ทุรุตฺตเร
ปาติโต คิริทุคฺคสฺมึ เกน ตฺวํ ตตฺถ นามริ ฯ