[๑๖๐๗] สิเลสูปมา สิขีริว สพฺพภกฺขา
ติกฺขมายา นทีริว สีฆโสตา
เสวนฺติ เหตา ปิยมปฺปิยญฺจ
นาวา ยถา โอรกูลํ ปรญฺจ ฯ

[๑๖๐๘] น ตา เอกสฺส น ทฺวินฺนํ อาปโณว ปสาริโต
โย ตา มยฺหนฺติ มญฺเญยฺย วาตํ ชาเลน พนฺธเย ๑ ฯ

[๑๖๐๙] ยถา นที จ ปนฺโถ จ ปานาคารํ สภา ปปา
เอวํ โลกิตฺถิโย นาม เวลา ตาสํ น วิชฺชติ ฯ

[๑๖๑๐] ฆตาสนสมา เอตา กณฺหสปฺปสิรูปมา
คาโว พหิ ติณสฺเสว โอมสนฺติ วรํ วรํ ฯ

[๑๖๑๑] ฆตาสนํ กุญฺชรํ กณฺหสปฺปํ
มุทฺธาภิสิตฺตํ ปมุทา ๒ จ สพฺพา
เอเต นโร นิจฺจยโต ๓ ภเชถ
เตสํ หเว ทุพฺพิทุ สจฺจภาโว ฯ
#๑ ม พาธเย ฯ ๒ ม. ปมทา ฯ ๓. สี. ยุ. นิจฺจยตฺโต ฯ

[๑๖๑๒] นจฺจนฺตวณฺณา น พหูน กนฺตา
น ทกฺขิณา ปมุทา เสวิตพฺพา
น ปรสฺส ภริยา น ธนสฺส เหตุ
เอติตฺถิโย ปญฺจ น เสวิตพฺพาติ ฯ
จุลฺลกุณาลชาตกํ ปฐมํ ฯ
____________
๒ ภทฺทสาลชาตกํ

[๑๖๑๓] กา ตฺวํ สุทฺเธหิ วตฺเถหิ อเฆ เวหายสณฺฐิตา ๑
เกน ตฺยสฺสูนิ วตฺตนฺติ กุโต ตํ ภยมาคตํ ฯ

[๑๖๑๔] ตเวว เทว วิชิเต ภทฺทสาโลติ มํ วิทู
สฏฺฐิวสฺสสหสฺสานิ ติฏฺฐโต ปูชิตสฺส เม ฯ

[๑๖๑๕] การยนฺตา นครานิ อคาเร จ ทิสมฺปติ
วิวิเธ จาปิ ปาสาเท น มนฺเต อจฺจมญฺญิสุํ
ยเถว มนฺเต ปูเชสุํ ตเถว ตฺวํปิ ปูชย ฯ

[๑๖๑๖] ตญฺจ อหํ ๒ น ปสฺสามิ ถูลํ กาเยน เต ทุมํ
อาโรหปรินาเหน อภิรูโปสิ ชาติยา ฯ