[๑๔๘๗] น วาหเมเต ๑ อิจฺฉามิ เย สสา ปฐวึสิตา
จนฺทโต สสมิจฺฉามิ ตมฺเม โอหร เกสว ฯ

[๑๔๘๘] โส นูน มธุรํ ญาติ ชีวิตํ วิชหิสฺสสิ
อปตฺถยํ โย ปตฺถยสิ จนฺทโต สสมิจฺฉสิ ฯ

[๑๔๘๙] เอวญฺเจ กณฺห ชานาสิ ยทญฺญมนุสาสสิ
กสฺมา ปุเร มตํ ปุตฺตํ อชฺชาปิ อนุโสจสิ ฯ

[๑๔๙๐] ยํ น ลพฺภา มนุสฺเสน อมนุสฺเสน วา ปุน
ชาโต เม มา มรี ปุตฺโต กุโต ลพฺภา อลพฺภิยํ ฯ
น มนฺตา มูลเภสชฺชา โอสเธหิ ธเนน วา
สกฺกา อานยิตุํ กณฺห ยํ เปตมนุโสจสิ ฯ

[๑๔๙๑] ยสฺส เอตาทิสา อสฺสุ อมจฺจา ปุริสปณฺฑิตา
ยถา นิชฺฌาปเย อชฺช ฆโต ปุริสปณฺฑิโต ฯ
อาทิตฺตํ วต มํ สนฺตํ ฆตสิตฺตํว ปาวกํ
วารินา วิย โอสิญฺจิ สพฺพํ นิพฺพาปเย ทรํ ฯ
#๑ สี. จาหเมตํ ฯ ม. น จาหเมเต ฯ ยุ. วาหเมตํ ฯ
อพฺพุหิ วต เม สลฺลํ ยมาสิ หทยสฺสิตํ
โย เม โสกปเรตสฺส ปุตฺตโสกํ อปานุทิ ฯ
โสหํ อพฺพูฬฺหสลฺโลสฺมิ วีตโสโก อนาวิโล
น โสจามิ น โรทามิ ตว สุตฺวาน มาณว ฯ

[๑๔๙๒] เอวํ กโรนฺติ สปฺปญฺญา เย โหนฺติ อนุกมฺปกา
นิวตฺตยนฺติ โสกมฺหา ฆโต เชฏฺฐํว ภาตรนฺติ ฯ
ฆตปณฺฑิตชาตกํ โสฬสมํ ฯ
____________
ตสฺสุทฺทานํ
ทฬฺห กณฺห ธนญฺชย สงฺขวโร
ราชา สตฺตาห สสาข ๑ ตกฺกลินา
ธมฺมํ กุกฺกุฏ กุณฺฑลิ โภชนทา
จกฺกวาก สุภูริ สโสตฺถิ ฆโต ฯ
ทสกนิปาตํ นิฏฺฐิตํ ฯ
___________
#๑ ม. รช สตฺตห กสฺส จ ฯ
เอกาทสนิปาตชาตกํ
๑ มาตุโปสกชาตกํ

[๑๔๙๓] ตสฺส นาคสฺส วิปฺปวาเสน
วิรูฬฺหา สลฺลกิโย จ กุฏชา ๑
กุรุวินฺทกรวรา ภิสสามา ๒ จ
นิวาเต ปุปฺผิตา จ กณฺณิการา ๓ ฯ

[๑๔๙๔] โกจิเทว สุวณฺณกายุรา
นาคราชํ ภรนฺติ ปิณฺเฑน
ยตฺถ ราชา ราชกุมาโร วา
กวจมภิเหสฺสติ อสมฺภิโต ๔ ฯ

[๑๔๙๕] คณฺหาหิ นาค กพลํ มา นาค กิสโก ภว
พหูนิ ราชกิจฺจานิ ตานิ ๕ นาค กริสฺสสิ ฯ

[๑๔๙๖] สา นูน สา กปณิกา อนฺธา อปรินายิกา ๖
ขาณณ ปาเทน ฆฏฺเฏติ คิรึ จณฺโฑรณํ ปติ ฯ