[๑๔๖๗] น ปณฺฑิตา อตฺตสุขสฺส เหตุ
ปาปานิ กมฺมานิ สมาจรนฺติ
ทุกฺเขน ผุฏฺฐา ขลิตาปิ สนฺตา
ฉนฺทา จ โทสา น ชหนฺติ ธมฺมํ ฯ

[๑๔๖๘] เยนเกนจิ วณฺเณน มุทุนา ทารุเณน วา
อุทฺธเร ทีนมตฺตานํ ปจฺฉา ธมฺมํ สมาจเร ฯ

[๑๔๖๙] ยสฺส รุกฺขสฺส ฉายาย นิสีเทยฺย สเยยฺย วา
น ตสฺส สาขํ ภญฺเชยฺย มิตฺตทุพฺโภ หิ ปาปโก ฯ

[๑๔๗๐] ยสฺสาปิ ๑ ธมฺมํ ปุริโส ๒ วิชญฺญา
เย จสฺส กงฺขํ วินยนฺติ สนฺโต
#๑ สี. ยสฺส หิ ฯ ๒ สี. มนุโช ฯ
ตํ หิสฺส ทีปญฺจ ปรายนญฺจ
น เตน เมตฺตึ ชิรเยถ ๑ ปญฺโญ ฯ

[๑๔๗๑] อลโส คิหี กามโภคี น สาธุ
อสญฺญโต ปพฺพชิโต น สาธุ
ราชา น สาธุ อนิสมฺมการี
โย ปณฺฑิโต โกธโน ตํ น สาธุ ฯ

[๑๔๗๒] นิสมฺม ขตฺติโย กยิรา นานิสมฺม ทิสมฺปติ
นิสมฺมการิโน ราช ยโส กิตฺตี จ วฑฺฒตีติ ฯ
ภูริปญฺหาชาตกํ จุทฺทสมํ ฯ
_______________
๑๕ มหามงฺคลชาตกํ

[๑๔๗๓] กึสุ นโร ชปฺปมธิจฺจ กาเล
กํ วา วิชฺชํ กตมํ วา สุตานํ
โส มจฺโจ อสฺมึ จ ปรมฺหิ โลเก
กถํกโร โสตฺถาเนน คุตฺโต ฯ

[๑๔๗๔] ยสฺส เทวา ปิตโร จ สพฺเพ
สิรึสปา ๒ สพฺพภูตานิ จาปิ
เมตฺตาย นิจฺจํ อปจิตานิ โหนฺติ
ภูเตสุ เว โสตฺถานํ ตทาหุ ฯ

[๑๔๗๕] โย สพฺพโลกสฺส นิวาตวุตฺติ
#๑ ม. ชรเยถ ฯ ๒ ม. สรีสปา ฯ
อิตฺถีปุมานํ สหทารกานํ
ขนฺตา ทุรุตฺตานํ อปฺปฏิกูลวาที
อธิวาสนํ โสตฺถานํ ตทาหุ ฯ

[๑๔๗๖] โย นาวชานาติ สหายมิตฺเต ๑
สิปฺเปน กุลฺยาภิ ธเนน ชจฺจา
รุจิปญฺโญ อตฺถกาเล ๒ มตีมา ๓
สหาเยสุ เว โสตฺถานํ ตทาหุ ฯ