[๑๓๙๗] อิมญฺจ ๒ ชมฺมํ เนกติกํ อสปฺปุริสจินฺตกํ
หนนฺตุ สาขํ สตฺตีหิ นาสฺส อิจฺฉามิ ชีวิตํ ฯ

[๑๓๙๘] ขมตสฺส มหาราช ปาณา ทุปฺปฏิอานยา ๓
ขม เทว อสปฺปุริสสฺส นาสฺส อิจฺฉามหํ วธํ ฯ

[๑๓๙๙] นิโคฺรธเมว เสเวยฺย น สาขมุปสํวเส
นิโคฺรธสฺมึ มตํ เสยฺโย ยญฺเจ สาขสฺมิ ชีวิตนฺติ ฯ
นิโคฺรธชาตกํ สตฺตมํ ฯ
___________
๘ ตกฺกลชาตกํ

[๑๔๐๐] น ตกฺกลา สนฺติ น อาลุปานิ ๔
น วิลาลิโย น กลมฺพานิ ตาต
เอโก อรญฺญมฺหิ สุสานมชฺเฌ
กิมตฺถิโก ตาต ขณาสิ กาสุํ ฯ
#๑ ม. มหนฺตตํ ฯ ๒ ม. จสทฺโท นตฺถิ ฯ ๓ ม. นปฏิอานยา ฯ ๔ ม. อาลุวานิ ฯ

[๑๔๐๑] ปิตามโห ตาต สุทุพฺพโล เต
อเนกพฺยาธีหิ ทุกฺเขหิ ผุฏฺโฐ
ตมชฺชหํ นิกฺขณิสฺสามิ โสพฺเภ
น หิสฺส ตํ ชีวิตํ โรจยามิ ฯ

[๑๔๐๒] สงฺกปฺปเมตํ ปฏิลทฺธปาปกํ
อจฺจาหิตํ กมฺมํ กโรสิ ลุทฺทํ
มยาปิ ตาต ปฏิลจฺฉเส ตุวํ
เอตาทิสํ กมฺม ชรูปนีโต
ตํ กูลวตฺตํ อนุวตฺตมาโน
อหมฺปิ ตํ นิกฺขณิสฺสามิ โสพฺเภ ฯ

[๑๔๐๓] ผรุสาหิ วาจาหิ ปกุพฺพมาโน
อาสชฺช มํ ตฺวํ วทเส กุมาร
ปุตฺโต มมํ โอรสโก สมาโน
อหิตานุกมฺปี เม ตฺวํสิ ปุตฺต ฯ

[๑๔๐๔] น ตฺยาหํ ๑ ตาต อหิตานุกมฺปี
หิตานุกมฺปี เต อหญฺหิ ๒ ตาต
ปาปญฺจ ตํ กมฺม ปกุพฺพมานํ
อรหามิ โน วารยิตุํ ตโต หิ ฯ

[๑๔๐๕] โย มาตรํ วา ปิตรํ สวิฏฺฐ ๓
อทูสเก หึสติ ปาปธมฺโม
#๑ ม. น ตาหํ ฯ ๒ ม. อหมฺปิ ฯ ๓ สี. ยุ. มาตรํ ปิตรํ วา วสิฏฺฐ ฯ
กายสฺส เภทา อภิสมฺปรายํ
อสํสยํ โส นิรยํ อุเปติ ๑ ฯ

[๑๔๐๖] โย มาตรํ วา ปิตรํ สวิฏฺฐ
อนฺเนน ปาเนน อุปฏฺฐหาติ
กายสฺส เภทา อภิสมฺปรายํ
อสํสยํ โส สุคตึ อุเปติ ฯ