[๑๓๓๗] เสฺนหสงฺคนฺถิตา ๔ คนฺถา เสนฺติ มโนมยา ปุถู
เต ภุสํ อุปตาเปนฺติ ตสฺมา เสฺนหํ น โรจเย ฯ

[๑๓๓๘] เอตสฺมึ เต สุลปิเต ปฏิรูเป สุภาสิเต
วรํ พฺราหฺมณ เต ทมฺมิ ยงฺกิญฺจิ มนสิจฺฉสิ ฯ

[๑๓๓๙] วรญฺเจ เม อโท สกฺก สพฺพภูตานมิสฺสร
อรญฺเญ เม วิหรโต นิจฺจํ เอกวิหาริโน
อาพาธา น ๕ อุปฺปชฺเชยฺยุํ อนฺตรายกรา ภุสา ฯ

[๑๓๔๐] เอตสฺมึ เต สุลปิเต ปฏิรูเป สุภาสิเต
วรํ พฺราหฺมณ เต ทมฺมิ ยงฺกิญฺจิ มนสิจฺฉสิ ฯ

[๑๓๔๑] วรญฺเจ เม อโท สกฺก สพฺพภูตานมิสฺสร
น มโน วา สรีรํ วา มงฺกุเต ๖ สกฺก กสฺสจิ
#๑ ม. ตฺวํ ฯ ๒ สมฺปสฺสสีติปิ ฯ ๓ สี. ยุ. ปฐมา ฯ ๔ ม. สงฺคถิตา ฯ
#๕ ม. มา ฯ ๖ ม. มํ กเต ฯ
กทาจิ อุปหญฺเญถ เอตํ สกฺก วรํ วเรติ ฯ
กณฺหชาตกํ ทุติยํ ฯ
___________
๓ จตุโปสถชาตกํ

[๑๓๔๒] โย โกปเนยฺเย น กโรติ โกปํ
น กุชฺฌติ สปฺปุริโส กทาจิ
กุทฺโธปิ โส นาวิกโรติ โกปํ
ตํ เว นรํ สมณมาหุ โลเก ฯ

[๑๓๔๓] โอโนทโร โย สหเต ชิฆจฺฉํ
ทนฺโต ตปสฺสี มิตปานโภชโน
อาหารเหตุ น กโรติ ปาปํ
ตํ เว นรํ สมณมาหุ โลเก ฯ

[๑๓๔๔] ขิฑฺฑํ รตึ วิปฺปชหิตฺวาน สพฺพํ
น จาลิกํ ภาสติ กิญฺจิ โลเก
วิภูสนฏฺฐานา วิรโต เมถุนสฺมา
ตํ เว นรํ สมณมาหุ โลเก ฯ

[๑๓๔๕] ปริคฺคหํ โลภธมฺมญฺจ สพฺพํ
โย เว ปริญฺญาย ปริจฺจเชติ
ทนฺตํ ฐิตตฺตํ อมมํ นิราสํ
ตํ เว นรํ สมณมาหุ โลเก ฯ

[๑๓๔๖] ปุจฺฉาม กตฺตารมโนมปญฺญ ๑
กถาสุ โน วิคฺคโห อตฺถิ ชาโต
ฉินฺทชฺช กงฺขํ วิจิกิจฺฉิตานิ
ตทชฺช กงฺขํ วิตเรมุ สพฺเพ ฯ