[๑๒๗๗] น อณฺณเว สนฺติ ผลานิ ธงฺก
มํสํ กุโต ขาทิตุํ จกฺกวาเก
เสวาลภกฺขมฺห อปาณโภชนา
(น ฆาสเหตุปิ กโรม ปาปํ)
อภีตรูปา วิจราม อณฺณเว ๒ ฯ

[๑๒๗๘] น เม อิทํ รุจฺจติ จกฺกวาเก ๓
อสฺมึ ภเว โภชนสนฺนิกาโส
อโหสิ ปุพฺเพ ตโต เม อญฺญถา
อิจฺเจว เม วิมติ เอตฺถ ชาตา ฯ

[๑๒๗๙] อหมฺปิ มํสานิ ผลานิ ภุญฺเช
อนฺนานิ จ โลณิกเตลิกานิ
รสํ มนุสฺเสสุ ลภามิ โภตฺตุํ
สูโรว สงฺคามมุขํ วิเชตฺวา
น จ เม ตาทิโส วณฺโณ จกฺกวาก ยถา ตว ฯ

[๑๒๘๐] อสุทฺธภกฺโขสิ ขณานุปาตี
กิจฺเฉน เต ลพฺภติ อนฺนปานํ
น ตุสฺสสิ รุกฺขผเลหิ ธงฺก
มํสานิ วา ยานิ สุสานมชฺเฌ ฯ

[๑๒๘๑] โย สาหเสน อธิคมฺม โภเค
#๑ ม. อนปฺปรูปา ฯ ๒ ม. อิเม ปาฐา นตฺถิ ฯ ๓ ม. จกฺกาวาก ฯ
ปริภุญฺชติ ธงฺก ขณานุปาตี
ตโต อุปกฺโกสติ นํ สภาโว
อุปกฺกุฏฺโฐ วณฺณพลํ ชหาติ ฯ

[๑๒๘๒] อปฺปมฺปิ เจ นิพฺพุตึ ภุญฺชติ ยทิ
อสาหเสน อปรูปฆาตี
พลญฺจ วณฺโณ จ ตทสฺส โหติ
น หิ สพฺโพ อาหารมเยน วณฺโณติ ฯ
จกฺกวากชาตกํ อฏฺฐมํ ฯ
___________
๙ หลิทฺทราคชาตกํ

[๑๒๘๓] สุติติกฺขํ อรญฺญมฺหิ ปนฺตมฺหิ สยนาสเน
เย จ คาเม ติติกฺขนฺติ เต อุฬารตรา ตยา ฯ

[๑๒๘๔] อรญฺญา คามมาคมฺม กึสีลํ กึวตํ อหํ
ปุริสํ ตาต เสเวยฺยํ ตํ เม อกฺขาหิ ปุจฺฉิโต ฯ

[๑๒๘๕] โย ตํ ๑ วิสฺสาสเย ตาต วิสฺสาสญฺจ ขเมยฺย เต
สุสฺสูสี จ ติติกฺขี จ ตํ ภเชหิ อิโต คโต ฯ

[๑๒๘๖] ยสฺส กาเยน วาจาย มนสา นตฺถิ ทุกฺกฏํ
อุรสีว ปติฏฺฐาย ตํ ภเชหิ อิโต คโต ฯ