[๑๒๕๗] ยตฺถ วีชานิ รูหนฺติ สตฺตา ยตฺถ ปติฏฺฐิตา
สา เม สีสํ นิปีเฬติ ชาตํ สรณโต ภยํ ฯ

[๑๒๕๘] เยน ภตฺตานิ ปจฺจนฺติ สีตํ เยน วิหญฺญติ
โส มํ ฑหติ คตฺตานิ ชาตํ สรณโต ภยํ ฯ

[๑๒๕๙] เยน ภตฺเตน ๑ ยาเปนฺติ ปุถู พฺราหฺมณขตฺติยา
โส มํ ภุตฺโต พฺยาปาทิ ชาตํ สรณโต ภยํ ฯ

[๑๒๖๐] คิมฺหานํ ปจฺฉิเม มาเส วาตมิจฺฉนฺติ ปณฺฑิตา
โส มํ ภญฺชติ คตฺตานิ ชาตํ สรณโต ภยํ ฯ

[๑๒๖๑] ยํ นิสฺสิตา ชคติรุหํ (วิหงฺคมา) สฺวายํ อคฺคึ ปมุญฺจติ
ทิสา ภชถ วงฺกงฺคา ชาตํ สรณโต ภยํ ฯ

[๑๒๖๒] ยมานยึ โสมนสฺสํ มาลินึ จนฺทนุสฺสทํ
สา มํ ฆรา นีหรติ ๒ ชาตํ สรณโต ภยํ ฯ

[๑๒๖๓] เยน ชาเตน นนฺทิสฺสํ ยสฺส จ ภวมิจฺฉิสํ
โส มํ ฆรา นีหรติ ๒ ชาตํ สรณโต ภยํ ฯ

[๑๒๖๔] สุณนฺตุ เม ชานปทา เนคมา จ สมาคตา
ยโตทกํ ตทาทิตฺตํ ยโต เขมํ ตโต ภยํ
#๑ ม. ภุตฺเตน ฯ ๒ สี. ม. นิจฺฉุภติ ฯ
ราชา วิลุมฺปเต รฏฺฐํ พฺราหฺมโณ จ ปุโรหิโต
อตฺตคุตฺตา วิหรถ ชาตํ สรณโต ภยนฺติ ฯ
ปทกุสลมาณวชาตกํ ฉฏฺฐํ ฯ
____________
๗ โลมสกสฺสปชาตกํ

[๑๒๖๕] อสฺส อินฺทสโม ราช อจฺจนฺตํ อชรามโร
สเจ ตฺวํ ยญฺญํ ยเชยฺย อิสึ โลมสกสฺสปํ ฯ

[๑๒๖๖] สสมุทฺทปริยายํ มหึ สาครกุณฺฑลํ
น อิจฺเฉ สห นินฺทาย เอวํ เสยฺห ๑ วิชานหิ ฯ