[๑๒๓๗] ผลสฺส อุปภุญฺชิมฺหา เนกวสฺสคเณ พหู
อผลมฺปิ วิทิตฺวาน สาว มิตฺติ ๓ ยถา ปุเร ฯ

[๑๒๓๘] สุกฺขญฺจ รุกฺขโกฬาปํ โอปตฺตมผลํ ทุมํ
โอหาย สกุณา ยนฺติ กึ โทสํ มญฺญเส ๔ ทิช ฯ
#๑ สี. ม. สุวสฺส จ วรํ ทตฺวา ฯ เอวมุปริปิ ฯ ๒ ม. หริปตฺตา ฯ ๓ ม. เมตฺติ ฯ
#๔ ม. ปสฺสเส ฯ

[๑๒๓๙] เย ผลตฺถา สมฺภชนฺติ อผโลติ ชหนฺติ นํ
อตฺตตฺถปญฺญา ทุมฺเมธา เต โหนฺติ ปกฺขปาติโน ฯ

[๑๒๔๐] สาธุ ปกฺขิ กตํ โหติ มิตฺติ ๑ สํสติ สนฺถโว
สเจตํ ธมฺม โรเจสิ ปาสํโสสิ วิชานตํ ฯ

[๑๒๔๑] โส เต สุว วรํ ทมฺมิ ปตฺตยาน วิหงฺคม
วรํ วรสฺสุ วงฺกงฺค ยงฺกิญฺจิ มนสิจฺฉสิ ฯ

[๑๒๔๒] อปิ นาม นํ ปุน ปสฺเส ๒ สปตฺตํ สผลํ ทุมํ
ทลิทฺโทว นิธึ ลทฺธา นนฺเทยฺยาหํ ปุนปฺปุนํ ฯ

[๑๒๔๓] ตโต อมตมาทาย อภิสิญฺจิ มหีรุหํ
ตสฺส สาขา วิรูหึสุ สีตจฺฉายา มโนรมา ฯ

[๑๒๔๔] เอวํ สกฺก สุขี โหหิ สห สพฺเพหิ ญาติภิ
ยถาหมชฺช สุขิโต ทิสฺวาน สผลํ ทุมํ ฯ

[๑๒๔๕] สุวสฺส วจนํ สุตฺวา กตฺวาน สผลํ ทุมํ
ปกฺกามิ สห ภริยาย เทวานํ นนฺทนํ วนนฺติ ฯ
จุลฺลสุวกราชชาตกํ จตุตฺถํ ฯ
_______________
๕ หริตจชาตกํ

[๑๒๔๖] สุตเมตํ มหาพฺรเหฺม กาเม ภุญฺชติ หาริโต
กจฺเจตํ วจนํ ตุจฺฉํ กจฺจิ สุทฺโธ อิรียสิ ฯ