[๑๒๒๗] จร จาริกํ โลหิตตุณฺฑ มา มริ
กึ ตฺวํ สุว สุกฺขทุมมฺหิ ฌายสิ
ตทิงฺฆ [๑] พฺรูหิ วสฺสนฺตสนฺนิภ
กสฺมา สุว สุกฺขทุมํ น ริญฺจสิ ฯ

[๑๒๒๘] เย เว สขีนํ สขาโร ภวนฺติ
ปาณาจฺจเย สุขทุกฺเขสุ หํส
ขีณํ อขีณนฺติ น ตํ ชหนฺติ
สนฺโต สตํ ธมฺมมนุสฺสรนฺตา ฯ

[๑๒๒๙] โสหํ สตํ อญฺญตโรสฺมิ หํส
ญาตี จ เม โหติ สขา จ รุกฺโข
ตํ นุสฺสเห ชีวิกตฺโถ ปหาตุํ
ขีณนฺติ ญตฺวาน น เอส ธมฺโม ฯ

[๑๒๓๐] สาธุ ปกฺขิ ๒ กตํ โหติ เมตฺติ สํสติ สนฺถโว
สเจตํ ธมฺมํ โรเจสิ ปาสํโสสิ วิชานตํ ฯ

[๑๒๓๑] โส เต สุว วรํ ทมฺมิ ปตฺตยาน วิหงฺคม
วรํ วรสฺสุ วงฺกงฺค ยงฺกิญฺจิ มนสิจฺฉสิ ฯ

[๑๒๓๒] วรญฺจ เม หํส ตุวํ ทเทยฺย
อยญฺจ รุกฺโข ปุนรายุํ ลเภถ
#๑ ม. มํ ฯ ๒ สี. ม. สกฺขิ ฯ
โส สาขวา ผลิมา สํวิรูโฬฺห
มธุตฺถิโก ติฏฺฐตุ โสภมาโน ฯ

[๑๒๓๓] ตํ ปสฺส สมฺม ผลิมํ อุฬารํ
สหาว เต โหตุ อุทุมฺพเรน
โส สาขวา ผลิมา สํวิรูโฬฺห
มธุตฺถิโก ติฏฺฐตุ โสภมาโน ฯ

[๑๒๓๔] เอวํ สกฺก สุขี โหหิ สห สพฺเพหิ ญาติภิ
ยถาหมชฺช สุขิโต ทิสฺวาน สผลํ ทุมํ ฯ

[๑๒๓๕] สุวสฺส วจนํ สุตฺวา ๑ กตฺวาน สผลํ ทุมํ
ปกฺกามิ สห ภริยาย เทวานํ นนฺทนํ วนนฺติ ฯ
มหาสุวราชชาตกํ ตติยํ ฯ
_______________
๔ จุลฺลสุวกราชชาตกํ

[๑๒๓๖] สนฺติ รุกฺขา หริตปตฺตา ๒ ทุมาเนกผลา พหู
กสฺมา นุ สุกฺเข โกฬาเป สุวสฺส นิรโต มโน ฯ