[๑๑๔๗] ยโต จ ชาเนยฺย ปสาทมตฺตโน
อตฺถํ นิยุญฺเชยฺย ปรสฺส ทุกฺกฏํ
ตทายมตฺโถติ สยํ อเวกฺขิย
อถสฺส ทณฺฑํ สทิสํ นิเวสเย ฯ

[๑๑๔๘] น จาปิ ฌาเปติ ปรํ น อตฺตนํ
อมุจฺฉิโต โย นยเต นยานยํ
#๑ ม. ปุณฺณายเตเนว ฯ ๒ ม. โย จ ฯ
โย ทณฺฑธาโร ภวตีธ อิสฺสโร
ส วณฺณคุตฺโต สิริยา น ธํสติ ฯ

[๑๑๔๙] เย ขตฺติยาเส อนิสมฺมการิโน
ปเนนฺติ ทณฺฑํ สหสา ปมุจฺฉิตา
อวณฺณสํยุตฺตา ๑ ชหนฺติ ชีวิตํ
อิโต วิมุตฺตาปิจ ยนฺติ ทุคฺคตึ ฯ

[๑๑๕๐] ธมฺเม จ เย อริยปฺปเวทิเต รตา
อนุตฺตรา เต วจสา มนสา กมฺมุนา จ
เต ขนฺติโสรจฺจสมาธิสณฺฐิตา ๒
วชนฺติ โลกํ ทุภยํ ตถาวิธา ฯ

[๑๑๕๑] ราชาหมสฺมิ นรปมุทานมิสฺสโร
สเจปิ กุชฺฌามิ ฐเปมิ อตฺตนํ
นิเสธยนฺโต ชนตํ ตถาวิธํ
ปเนมิ ทณฺฑํ อนุกมฺป โยนิโส ฯ

[๑๑๕๒] สิรี จ ลกฺขี จ ตเวว ขตฺติย
ชนาธิป มา วิชหิ กุทาจนํ
อกฺโกธโน นิจฺจปสนฺนจิตฺโต
อนิโฆ ตุวํ วสฺสสตานิ ปาลย ฯ

[๑๑๕๓] คุเณหิ เอเตหิ อุเปหิ ๓ ขตฺติย
ฐิตมริยวุตฺติ ๔ สุวโจ อโกธโน
#๑ ม. อวณฺณสํยุตา ฯ ๒ ม. สนฺติ … ฯ ๓ ม. อุเปถ ฯ ๔ ม. ฐิตมริยวตฺตี ฯ
สุขี อนุปฺปีฬ ปสาส เมทนึ
อิโต วิมุตฺโตปิ วชาหิ สุคฺคตึ ฯ

[๑๑๕๔] เอวํ สุนีเตน ๑ สุภาสิเตน
ธมฺเมน ญาเยน อุปายโส นยํ
นิพฺพาปเย สงฺขุภิตํ มหาชนํ
มหาว เมโฆ สลิเลน เมทนินฺติ ๒ ฯ
สุมงฺคลชาตกํ จตุตฺถํ ฯ
___________
๕ คงฺคมาลชาตกํ

[๑๑๕๕] องฺคารชาตา ปฐวี กุกฺกุลานุคตา มหี
อถ คายสิ วตฺตานิ น ตํ ตปติ อาตโป ฯ
อุทฺธํ ตปติ อาทิจฺโจ อโธ ตปติ วาลุกา
อถ คายสิ วตฺตานิ น ตํ ตปติ อาตโป ฯ

[๑๑๕๖] น มํ ตปติ อาตโป อาตปฺปา ตปยนฺติ มํ
อตฺถา หิ วิวิธา ราช เต ตปนฺติ น อาตโป ฯ