[๑๑๑๗] ตยา มํ หสิตาปงฺคี ๑ มิหิตานิ ๒ ภณิตานิ จ
กิสํ ปณฺฑฑ กริสฺสติ สาว สาขา ปรนฺตปํ ฯ

[๑๑๑๘] อคมา นูน โส สทฺโท อสํสิ นูน โส ตว
อกฺขาตํ นูน ตํ เตน โย ตํ สาขมกมฺปยิ ฯ

[๑๑๑๙] อิทํ โข ตํ สมาคมฺม มม พาลสฺส จินฺติตํ
ตทา หิ จลิตา สาขา มนุสฺเสน มิเคน วา ฯ

[๑๑๒๐] ตเถว ตฺวํ อเวทสิ อวญฺจิ ปิตรํ มม
หนฺตฺวา สาขาหิ ฉาเทนฺโต อาคมิสฺสติ เต ๓ ภยนฺติ ฯ
ปรนฺตปชาตกํ เอกาทสมํ ฯ
คนฺธารวคฺโค ทุติโย ฯ
_______________
#๑ ม. อสิตาปงฺคิ ฯ ๒ ม. สิตานิ ฯ ๓ ม. เม ฯ
ตสฺสุทฺทานํ
วรคาม มหากปิ ภคฺคว จ
ทฬฺหธมฺม สกุญฺชร เกสวโร
อุรโค วิธูโร ปุน ชาครตํ
อถ โกสลาธิป ปรนฺตป จ ฯ
___________
ตตฺร วคฺคุทฺทานํ ภวติ ฯ
อถ สตฺตนิปาตมฺหิ วคฺคํ เม ภณโต สุณ
กุกฺกุ จ ปุน คนฺธาโร เทฺว จ วุตฺตา มเหสินา ฯ
สตฺตกนิปาตํ นิฏฺฐิตํ ฯ
____________
อฏฺฐกนิปาตชาตกํ
๑ กจฺจานิวคฺโค
๑ กจฺจานิชาตกํ

[๑๑๒๑] โอทาตวตฺถา สุจิ อลฺลเกสา
กจฺจานิ กึ กุมฺภิมธิสฺสยิตฺวา ๑
ปิฏฺฐา ติลา โธวสิ ตณฺฑุลานิ
ติโลทโน เหหิติ กิสฺส เหตุ ฯ

[๑๑๒๒] น โข อยํ พฺราหฺมณ โภชนตฺถํ ๒
ติโลทโน เหหิติ สาธุปกฺโก8
ธมฺโม มโต ตสฺส ปหูนมชฺช ๓
อหํ กริสฺสามิ สุสานมชฺเฌ ฯ

[๑๑๒๓] อนุวิจฺจ กจฺจานิ กโรหิ กิจฺจํ
ธมฺโม มโต โก นุ ตเวตสํสิ ๔
สหสฺสเนตฺโต อตุลานุภาโว
น มิยฺยตี ธมฺมวโร กทาจิ ฯ

[๑๑๒๔] ทฬฺหปฺปมาณํ มม เอตฺถ พฺรหฺเม
ธมฺโม มโต นตฺถิ มเมตฺถ กงฺขา
เย เยวทานิ ปาปา ภวนฺติ
#๑ ยุ. กุมฺภิมปสฺสยิตฺวา ฯ ๒ สี. ม. โภชนตฺถา ฯ ๓ สี. ปหูตมชฺช ฯ
#ม. ปหุตฺตมชฺช ฯ ยุ. พหูตมชฺช ฯ ๔ ม. เตฺวว สํสิ ฯ
เต เตวทานิ สุขิตา ภวนฺติ ฯ
สุณิสา หิ มยฺหํ วชฺฌา อโหสิ
สา มํ วธิตฺวาน วิชายิ ปุตฺตํ
สาทานิ สพฺพสฺส กุลสฺส อิสฺสรา
อหํ วสามิ ๑ อปวิฏฺฐา เอกิกา ฯ

[๑๑๒๕] ชีวามิ โวหํ น มโตหมสฺมิ ๒
ตเวว อตฺถาย อิธาคโตสฺมิ
ยา ตํ วธิตฺวาน วิชายิ ปุตฺตํ
สหาว ปุตฺเตน กโรมิ ภสฺมํ ฯ

[๑๑๒๖] เอวญฺจ เต รุจฺจติ เทวราช
มเมว อตฺถาย อิธาคโตสิ
อหญฺจ ปุตฺโต สุณิสา จ นตฺตา
สมฺโมทมานา ฆรมาวเสม ฯ