[๑๐๙๗] สรภา สรเท กาเล ปหีนมกเส วเน
ปาวึสุ คิริทุคฺคานิ นทีนํ ปภวานิ จ ฯ

[๑๐๙๘] สรเภ จ คเต ทิสฺวา อชา จ วิภวํ คตา
กีโส จ วิวณฺโณ อาสิ ปณฺฑุโรคี จ พฺราหฺมโณ ฯ

[๑๐๙๙] เอวํ โย สนฺนิรงฺกตฺวา อาคนฺตุํ กุรุเต ปิยํ
โส เอโก พหุ โสจติ ธูมการีว พฺราหฺมโณติ ฯ
ธูมการิชาตกํ อฏฺฐมํ ฯ
#๑ สี. พหุเตโช ฯ ม. พหูเตโช ฯ ๒ ยุ. มกสฏฺฏิตา ฯ ๓ สี. วินสฺสุํ ฯ
๙ ชาครชาตกํ

[๑๑๐๐] โกธ ชาครตํ สุตฺโต โกธ สุตฺเตสุ ชาคโร
โก เมตํ นุ ๑ วิชานาติ โก ตํ ปฏิภณาติ เม ฯ

[๑๑๐๑] อหํ ชาครตํ สุตฺโต อหํ สุตฺเตสุ ชาคโร
อหเมตํ วิชานามิ อหํ ปฏิภณามิ เต ฯ

[๑๑๐๒] กถํ ชาครตํ สุตฺโต กถํ สุตฺเตสุ ชาคโร
กถํ เอตํ วิชานาสิ กถํ ปฏิภณาสิ เม ฯ

[๑๑๐๓] เย ธมฺมํ นปฺปชานนฺติ สญฺญโมติ ทโมติ จ
เตสุ สุตฺตปฺปมาเทสุ ๒ อหํ ชคฺคามิ เทวเต ฯ

[๑๑๐๔] เยสํ ราโค จ โทโส จ อวิชฺชา จ วิราชิตา
เตสุ ชาครมาเนสุ อหํ สุตฺโตสฺมิ เทวเต ฯ

[๑๑๐๕] เอวํ ชาครตํ สุตฺโต เอวํ สุตฺเตสุ ชาคโร
เอวเมตํ วิชานามิ เอวํ ปฏิภณามิ เต ฯ

[๑๑๐๖] สาธุ ชาครตํ สุตฺโต สาธุ สุตฺเตสุ ชาคโร
สาธุ เมตํ วิชานาสิ สาธุ ปฏิภณาสิ เมติ ฯ
ชาครชาตกํ นวมํ ฯ
___________
๑๐ กุมฺมาสปิณฺฑชาตกํ ๓