[๑๐๔๗] กามํ รุปฺปตุ วา มา วา ภูสํ วา วิกิริยฺยตุ
ธมฺมํ เม ภณมานสฺส น ปาปมุปลิมฺปติ ฯ

[๑๐๔๘] โน เจ อสฺส สกา พุทฺธิ วินโย วา สุสิกฺขิโต
วเน อนฺธมหึโสว ๓ จเรยฺย พหุโก ชโน ฯ

[๑๐๔๙] ยสฺมา จ ปนิเธกจฺเจ อาเจรมฺหิ ๔ สุสิกฺขิตา
ตสฺมา วินีตวินยา ธีรา ๕ จรนฺติ สุสมาหิตาติ ฯ
คนฺธารชาตกํ ปฐมํ ฯ
___________
#๑ สี. ยุ. ปหุตธนธานิยํ ฯ ม. ปหูตธนธาริยํ ฯ ๒ ม. ปสาสนโต ฯ
#๓ สี. ยุ. อนฺธมหิโส ว ฯ ๔ สี. ยุ. อาจารมฺหิ ฯ ๕ ม. ยุ. อยํ ปาโฐ นตฺถิ ฯ
๒ มหากปิชาตกํ

[๑๐๕๐] อตฺตานํ สงฺกมํ กตฺวา โย โสตฺถึ สมตารยิ
กึ ตฺวํ เตสํ กึเม ๑ ตุยฺหํ โหนฺติ เหเต ๒ มหากปิ ฯ

[๑๐๕๑] ราชาหํ อิสฺสโร เตสํ ยูถสฺส ปริหารโก
เตสํ โสกปเรตานํ ภึตานนฺเต อรินฺทม ฯ

[๑๐๕๒] อุลฺลงฺฆยิตฺวา อตฺตานํ วิสฺสฏฺฐธนุโน สตํ
ตโต อปรปาเทสุ ทฬฺหํ พนฺธํ ลตาคุลํ ๓ ฯ

[๑๐๕๓] ฉินฺนพฺภมิว วาเตน นุณฺโณ รุกฺขมุปาคมึ
โสหํ อปฺปภวํ ตตฺถ สาขํ หตฺเถหิ อคฺคหึ ฯ

[๑๐๕๔] ตํ มํ วีณายตํ สนฺตํ สาขาย จ ลตาย จ
สมนุกฺกมนฺตา ปาเทหิ โสตฺถึ สาขมิคา คตา ฯ

[๑๐๕๕] ตํ มํ น ตปฺปตี ๔ พนฺโธ วโธ ๕ เม น ตเปสฺสติ่
สุขมาหริตํ เตสํ เยสํ รชฺชมการยึ ฯ

[๑๐๕๖] เอสา เต อุปมา ราช ตํ สุณาหิ อรินฺทมํ ๖
รญฺญา รฏฺฐสฺส โยคฺคสฺส พลสฺส นิคมสฺส จ
สพฺเพสํ สุขเมตพฺพํ ขตฺติเยน ปชานตาติ ฯ
มหากปิชาตกํ ทุติยํ ฯ
___________
#๑ ม. กิเม ฯ สี. ยุ. กิโม ฯ ๒ ม. เอเต ฯ ๓ ม. ลตาคุนํ ฯ ๔ ม. ตปเต ฯ
#๕ ม. มโต ฯ ๖ สี. ยุ. อตฺถสนฺทสฺสนี กตา ฯ
๓ กุมฺภการชาตกํ