[๑๐๑๗] อาทาย ทณฺฑํ ปริสุมฺภ ภสฺตํ
ปสฺเสลมูคํ อุรคํ ทุชิวฺหํ
ฉินฺทชฺช กงฺขํ วิจิกิจฺฉิตานิ
ภุชงฺคมํ ปสฺส ปมุญฺจ ภสฺตํ ฯ
#๑ ม. อติโภติ ฯ ๒ สี. ม. สตฺตุภสฺตชาตกํ ฯ ๓ ม. ตทิงฺฆ ฯ

[๑๐๑๘] สํวิคฺครูโป ปริสาย มชฺเฌ
โส พฺราหฺมโณ สตฺตุภสฺตํ ปมุญฺจิ
อถ นิกฺขมิ อุรโค อุคฺคเตโช
อาสีวิโส สปฺโป ผณํ กริตฺวา ฯ

[๑๐๑๙] สุลทฺธลาภา ชนกสฺส รญฺโญ
โย ปสฺสติ เสนกํ สาธุปญฺญํ
วิวฏฺฏจฺฉโท ๑ นุสิ สพฺพทสฺสี
ญาณํ นุ เต พฺราหฺมณ ภึสรูปํ
อิมานิ เม สตฺตสตานิ อตฺถิ
คณฺหาหิ สพฺพานิ ททามิ ตุยฺหํ
ตยา หิ เม ชีวิตมชฺช ลทฺธํ
อโถปิ ภริยายมกาสิ โสตฺถึ ฯ

[๑๐๒๐] น ปณฺฑิตา เวตฺตนมาทิยนฺติ
จิตฺราหิ คาถาหิ สุภาสิตาหิ
อิโตปิ เต พฺราหฺมณ ททนฺตุ วิตฺตํ
อาทาย ตฺวํ คจฺฉ สกํ นิเกตนฺติ ฯ
เสนกชาตกํ สตฺตมํ ฯ
___________
#๑ ม. วิวฏฺฏฉทฺโท ฯ สี. วิวตฺตจฺฉทฺโท ฯ ยุ. วิวตฺตจฺฉทฺทา ฯ
๘ อฏฺฐิเสนชาตกํ ๑

[๑๐๒๑] เยเม อหํ น ชานามิ อฏฺฐิเสน วนิพฺพเก
เต มํ สงฺคมฺม ยาจนฺติ กสฺมา มํ ตฺวํ น ยาจสิ ฯ

[๑๐๒๒] ยาจโก อปฺปิโย โหติ ยาจํ อททมปฺปิโย
ตสฺมาหนฺตํ น ยาจามิ มา เม วิทฺเทสฺสนา อหุ ฯ

[๑๐๒๓] โย จ ๒ ยาจนชีวาโน กาเล ยาจํ น ยาจติ
ปรญฺจ ปุญฺญํ ๓ ธํเสติ อตฺตนาปิ น ชีวติ ฯ

[๑๐๒๔] โย จ ยาจนชีวาโน กาเล ยาจํปิ ๔ ยาจติ
ปรญฺจ ปุญฺญํ ลพฺเภติ อตฺตนาปิ จ ชีวติ ฯ

[๑๐๒๕] น เว ทุสฺสนฺติ ๕ สปฺปญฺญา ทิสฺวา ยาจกมาคเต
พฺรหฺมจารี ปิโย เมสิ วร ภญฺญิตมิจฺฉสิ ๖ ฯ

[๑๐๒๖] น เว ยาจนฺติ สปฺปญฺญา ธีโร จ วิทิตุมรหติ
อุทฺทิสฺส อริยา ติฏฺฐนฺติ เอสา อริยาน ยาจนา ฯ