[๙๖๗] สเจปิมํ ปิหยสิ มสฺสุกุตฺตึ สุการิตํ
การยิสฺสามิ เต สมฺม มณึ จาปิ ททามิ เต ฯ

[๙๖๘] ตฺวญฺเญว มณินา ฉนฺโน สุกตาย จ มสฺสุยา
อามนฺต โข ตํ คจฺฉามิ ปิยํ เม ตว ทสฺสนนฺติ ฯ
มณิชาตกํ ทสมํ ฯ
ขุรปุตฺตวคฺโค ๑ ทุติโย ฯ
___________
ตสฺสุทฺทานํ
อถ ปสฺส สสูจิ จ ตุณฺฑิลโก
มิค มยฺหกปญฺจมปกฺขิวโร
อถ ปญฺชลิ วาริช มชฺฌ ปุน
อถ วฏฺฏก กโปฏวเรน ทส ฯ
___________
ตตฺร วคฺคุทฺทานํ ภวติ ฯ
อถ วคฺคํ ปกิตฺติสฺสํ ฉนิปาตํ วรุตฺตเม
อาวาริยา จ สูจิ ๒ จ เทฺว จ วุตฺตา สุพฺยญฺชนา ฯ
ฉกฺกนิปาตํ นิฏฺฐิตํ ฯ
___________
#๑ สี. เสนกวคฺโค ฯ ม. ขรปุตฺตวคฺโค ฯ ๒ ม. อวาริยา จ ขโร จ ฯ สี. เสนกา ฯ
สตฺตกนิปาตชาตกํ
๑ กุกฺกุวคฺโค
๑ กุกฺกุชาตกํ

[๙๖๙] ทิยฑฺฒกุกฺกู อุทเยน กณฺณิกา
วิทตฺถิโย อฏฺฐ ปริกฺขิปนฺติ นํ
สา สีสปา ๑ สารมยา อเผคฺคุกา
กุหึ ฐิตา อุปริโต ๒ น ธํสติ ฯ

[๙๗๐] ยา ตึสติ สารมยา อเผคฺคุกา ๓
ปริกิริย โคปาณสิโย สมฏฺฐิตา ๔
ตาหิ สุสงฺคหิตา ๕ พลสา จ ๖ ปีฬิตา
สมฏฺฐิตา ๔ อุปริโต ๒ น ธํสติ ฯ

[๙๗๑] เอวมฺปิ มิตฺเตหิ ทเฬฺหหิ ปณฺฑิโต
อเภชฺชรูเปหิ สุจีหิ มนฺติภิ
สุสงฺคหีโต สิริยา น ธํสติ
โคปานสีภารวหาว กณฺณิกา ฯ

[๙๗๒] ขรตฺตจํ เพลฺลํ ยถาปิ สตฺถวา
อนามสนฺโตปิ กโรติ ติตฺตกํ
สมาหรํ สาธุกโรติ ปตฺถวา ๗
อสาธุกยิรา ๘ ตนุพนฺธมุทฺธรํ ๙ ฯ
#๑ ม. สา สึสปา ฯ สี. ยุ. สสึสปา ฯ ๒ ม. อุปฺปริโต ฯ ๓ ม. อนุชฺชุกา ฯ
#๔ ม. สมํ ฐิตา ฯ ๕ สี. ตา สงฺคหิตา … ฯ ๖ ม. จสทฺโท นตฺถิ ฯ
#๗ ม. สาทุํ กโรติ ปตฺถิว ฯ ๘ ม. อสาทุํ กยิรา ฯ ๙ สี. ยุ. ตนุวฏฺฏมุทธรํ ฯ

[๙๗๓] เอวมฺปิ คามนิคเมสุ ปณฺฑิโต
อสาหสํ ราช ธนานิ สงฺฆรํ
ธมฺมานุวตฺตี ปฏิปชฺชมาโน
ผาตึ ๑ กยิรา อวิเหฐยํ ปรํ

[๙๗๔] โอทาตมูลํ สุจิวาริสมฺภวํ
ชาตํ ยถา โปกฺขรณีสุ อมฺพุชํ
ปทุมํ ยถา อคฺคินิภาสิผาลิมํ ๒
น กทฺทโม น รโช น วาริ ลิมฺปติ ฯ

[๙๗๕] เอวมฺปิ โวหารสุจึ อสาหสํ
วิสุทฺธกมฺมนฺตมเปตปาปกํ
น ลิมฺปติ กมฺมกิเลส ตาทิโส
ชาตํ ยถา โปกฺขรณีสุ อมฺพุชนฺติ ฯ
กุกฺกุชาตกํ ปฐมํ ฯ
___________
๒ มโนชชาตกํ

[๙๗๖] ยถา จาโป นินฺนมติ ชิยา จาปิ นิกุชฺชติ ๓
หญฺญเต นูน มโนโช มิคราชา สขา มม ฯ