[๘๐๗] น หิ เวเรน เวรานิ สมฺมนฺตีธ กุทาจนํ
อเวเรน จ สมฺมนฺติ เอส ธมฺโม สนนฺตโนติ ฯ
ทีฆีติโกสลชาตกํ ปฐมํ ฯ
____________
๒ มิคโปตกชาตกํ

[๘๐๘] อคารา ปจฺจุเปตสฺส อนาคารสฺส เต สโต
สมณสฺส น ตํ สาธุ ยํ เปตมนุโสจสิ ฯ

[๘๐๙] สํวาเสน หเว สกฺก มนุสฺสสฺส มิคสฺส วา
# ๑ ยุ. วโส ฯ
หทเย ชายเต เปมํ น ตํ สกฺกา อโสจิตุํ ฯ

[๘๑๐] มตํ มริสฺสํ โรทนฺติ เย รุทนฺติ ลปนฺติ จ
ตสฺมา ตฺวํ อิสิ มา โรทิ โรทิตํ โมฆมาหุ สนฺโต ฯ

[๘๑๑] โรทิเตน หเว พฺรเหฺม มโต เปโต สมุฏฺฐเห
สพฺเพ สงฺคมฺม โรทาม อญฺญมญฺญสฺส ญาตเก ฯ

[๘๑๒] อาทิตฺตํ วต มํ สนฺตํ ฆตสิตฺตํว ปาวกํ
วารินา วิย โอสิญฺจํ สพฺพํ นิพฺพาปเย ทรํ
อพฺพูฬฺหํ ๑ วต เม สลฺลํ ยมาสิ หทยสฺสิตํ
โย เม โสกปเรตสฺส ปุตฺตโสกํ อปานุทิ
โสหํ อพฺพูฬฺหสลฺโลสฺมิ วีตโสโก อนาวิโล
น โสจามิ น โรทามิ ตว สุตฺวาน วาสวาติ ฯ
มิคโปตกชาตกํ ทุติยํ ฯ
___________
๓ มูสิกชาตกํ

[๘๑๓] กุหึ คตา กตฺถ คตา อิติ ลาลปฺปตี ชโน
อหเมเวโก ชานามิ อุทปาเน มูสิกา หตา ฯ

[๘๑๔] ยญฺเจตํ อิติ จินฺตี จ ๒ คทฺรโภว นิวตฺตสิ
อุทปาเน มูสิกํ หนฺตฺวา ยวํ ภกฺขิตุมิจฺฉสิ ๓ ฯ

[๘๑๕] ทหโร จาสิ ทุมฺเมธ ปฐมุปฺปตฺติโก ๔ สุสู ๕
#๑ ม. อพฺพหิ ฯ ๒ สี. ยเถตํ อิติจิติ จ ฯ ม. ยญฺเจตํ อิติ จีติ จ ฯ
#๓ ม. ภกฺเขตุมิจฺฉสิ ฯ ๔ สี. ยุ. ปฐมุปฺปตฺติโต ฯ ๕ ม. สุสุ ฯ
ทีฆญฺเจตํ ๑ สมาปชฺช ๒ น เต ทสฺสามิ ชีวิตํ ฯ

[๘๑๖] นานฺตลิกฺขภวเนน นางฺคปุตฺตสิเรน ๓ วา
ปุตฺเตน หิ ปตฺถยิโต สิโลเกหิ ปโมจิโต ฯ