[๗๘๗] โย อปฺปทุฏฺฐสฺส นรสฺส ทุสฺสติ
สุทฺธสฺส โปสสฺส อนงฺคณสฺส
ตเมว พาลํ ปจฺเจติ ปาปํ
สุขุโม รโช ปฏิวาตํว ขิตฺโตติ ฯ
สาลิยชาตกํ สตฺตมํ ฯ
___________
๘ ตจสารชาตกํ

[๗๘๘] อมิตฺตหตฺถตฺถคตา ตจสารสมปฺปิตา
ปสนฺนมุขวณฺณาตฺถ กสฺมา ตุเมฺห น โสจถ ฯ

[๗๘๙] น โสจนาย ปริเทวนาย
อตฺโถ จ ลพฺภา ๑ อปิ อปฺปโกปิ
โสจนฺตเมนํ ทุขิตํ วิทิตฺวา
ปจฺจตฺถิกา อตฺตมนา ภวนฺติ ฯ

[๗๙๐] ยโต จ โข ปณฺฑิโต อาปทาสุ
น เวธติ อตฺถวินิจฺฉยญฺญู
ปจฺจตฺถิกาสฺส ทุขิตา ภวนฺติ
ทิสฺวา มุขํ อวิการํ ปุราณํ ฯ

[๗๙๑] ชปฺเปน มนฺเตน สุภาสิเตน
อนุปฺปทาเนน ปเวณิยา วา
#๑ ม. อตฺโถว ลพฺโภ ฯ
ยถา ยถา ยตฺถ ลเภถ อตฺถํ
ตถา ตถา ตตฺถ ปรกฺกเมยฺย ฯ

[๗๙๒] ยโต จ ชาเนยฺย อลพฺภเนยฺโย
มยา วา อญฺเญน วา เอส อตฺโถ
อโสจมาโน อธิวาสเยยฺย
กมฺมํ ทฬฺหํ กินฺติ กโรมิทานีติ ฯ
ตจสารชาตกํ อฏฺฐมํ ฯ
___________
๙ มิตฺตวินฺทุกชาตกํ

[๗๙๓] กฺยาหํ เทวานมกรํ กึ ปาปํ ปกตํ มยา
ยํ เม สิรสฺมึ โอหจฺจ จกฺกํ ภมติ มตฺถเก ฯ

[๗๙๔] อติกฺกมฺม รมณกํ สทามตฺตญฺจ ทูภกํ
พฺรหฺมตรญฺจ ปาสาทํ เกนตฺเถน อิธาคโต ฯ

[๗๙๕] อิโต พหุตรา โภคา อตฺร มญฺเญ ภวิสฺสเร
อิติ เอตาย สญฺญาย ปสฺส มํ พฺยสนํ คตํ ฯ

[๗๙๖] จตุพฺภิ อฏฺฐชฺฌคมา อฏฺฐาภิ จาปิ ๑ โสฬส
โสฬสาภิ จ ทฺวตฺตึส อตฺริจฺฉํ จกฺกมาสโท
อิจฺฉาหตสฺส โปสสฺส จกฺกํ ภมติ มตฺถเก ฯ