[๗๗๗] ยญฺจ ชญฺญา กุเล ชาตํ คพฺเภ ติตฺตํ อมจฺฉรึ
เตน สขิญฺจ มิตฺตญฺจ ธีโร สนฺธาตุมรหตีติ ฯ
อหิตุณฺฑิกชาตกํ ปญฺจมํ ฯ
_______________
๖ คุมฺพิยชาตกํ

[๗๗๘] มธุวณฺณํ มธุรสํ มธุคนฺธํ วิสํ อหุ
#๑ ม. เสนาโมกฺขปลาเภน ฯ ๒ ม. ชคติปาลา ฯ ๓ สี. วุตฺโตมฺหิ ฯ ๔ สี. ยุ. เสเวหิ ฯ
คุมฺพิโย ฆาสเมสาโน อรญฺเญ โอทหี วิสํ ฯ

[๗๗๙] มธุ อิติ มญฺญมานา เย ตํ วิสมสายิสุํ ๑
เตสนฺตํ กฏุกํ อาสิ มรณํ เตนุปาคมม ฯ

[๗๘๐] เย จ โข ปฏิสงฺขาย วิสนฺติ ๒ ปริวชฺชยุํ
เต อาตุเรสุ สุขิตา ทยฺหมาเนสุ นิพฺพุตา ฯ

[๗๘๑] เอวเมว มนุสฺเสสุ วิสกามา ๓ สโมหิตา
อามิสํ พนฺธนญฺเจตํ มจฺจุวโส ๔ คุหาสโย ฯ

[๗๘๒] เอวเมว อิเม กาเม อาตุรา ปริจาริเก
เย สทา ปริวชฺชนฺติ สงฺคํ โลเก อุปจฺจคุนฺติ ฯ
คุมฺพิยชาตกํ ฉฏฺฐํ ฯ
___________
๗ สาลิยชาตกํ

[๗๘๓] ยฺวายํ สาลิยจฺฉาโปติ กณฺหสปฺปํ อคาหยิ
เตน สปฺเปนยํ ทฏฺโฐ หโต ปาปานุสาสโก ฯ

[๗๘๔] อหนฺตรมหนฺตารํ โย นโร หนฺตุมิจฺฉติ
เอวํ โส นิหโต เสติ ยถายํ ปุริโส หโต ฯ

[๗๘๕] อหนนฺตมฆาเตนฺตํ ๕ โย นโร หนฺตุมิจฺฉติ
เอวํ โส นิหโต เสติ ยถายํ ปุริโส หโต ฯ

[๗๘๖] ยถา ปํสุมุฏฺฐิ ปุริโส ปฏิวาตํ ปฏิกฺขิเป
#๑ ม. วิสมขาทิสุํ ฯ ๒ สี. ม. วิสนฺตํ ฯ ๓ ม. วิสํ กามา ฯ ๔ ม. มจฺจุเวโส ฯ
#๕ ม. อหนฺตารมฆาเตนฺตํ ฯ
ตเมว โส รโช หนฺติ ยถายํ ปุริโส หโต ฯ