[๗๖๗] ปวิเวกรสํ ปิตฺวา รสํ อุปสมสฺส จ
นิทฺทโร โหติ นิปฺปาโป ธมฺมปีติรสํ ปิวนฺติ ฯ
หิริชาตกํ ตติยํ ฯ
__________
๔ ขชฺโชปนกชาตกํ

[๗๖๘] โกนุ สนฺตมฺหิ ปชฺโชเต อคฺคิปริเยสนํ จรํ
อทฺทกฺขิ รตฺตึ ๑ ขชฺโชตํ ชาตเวทํ อมญฺญถ ฯ

[๗๖๙] สฺวาสฺส ๒ โคมยจุณฺณานิ อภิมตฺถํ ติณานิ จ
วิปรีตาย สญฺญาย นาสกฺขิ ปชฺชเลตเว ฯ

[๗๗๐] เอวมฺปิ อนุปาเยน อตฺถํ น ลภเต มูโค ๓
วิสาณโต ควํ โทหํ ยตฺถ ขีรํ น วินฺทติ ฯ

[๗๗๑] วิวิเธหิ อุปาเยหิ อตฺถํ ปปฺโปนฺติ มาณวา
นิคฺคเหน อมิตฺตานํ มิตฺตานํ ปคฺคเหน จ ฯ
#๑ ม. รตฺติ ฯ ๒ ม. สฺวสฺส ฯ ๓ ม. มิโค ฯ

[๗๗๒] เสนีโมกฺขูปลาเภน ๑ วลฺลภานํ นเยน จ
ชคตึ ชคตีปาลา ๒ อาวสนฺติ วสุนฺธรนฺติ ฯ
ขชฺโชปนกชาตกํ จตุตฺถํ ฯ
___________
๕ อหิตุณฺฑิกชาตกํ

[๗๗๓] ธุตฺโตมฺหิ ๓ สมฺม สุมุข ชูเต อกฺขปราชิโต
หเรหิ ๔ อมฺพปกฺกานิ วีริยนฺเต ภกฺขยามเส ฯ

[๗๗๔] อลิกํ วต มํ สมฺม อภูเตน ปสํสสิ
โก เต สุโต วา ทิฏฺโฐ วา สุมุโข นาม มกฺกโฏ ฯ

[๗๗๕] อชฺชาปิ เม ตํ มนสิ ยํ มํ ตฺวํ อหิตุณฺฑิก
ธญฺญาปณํ ปวิสิตฺวา มตฺโต ฉาตํ หนาสิ มํ ฯ

[๗๗๖] ตาหํ สรํ ทุกฺขเสยฺยํ อปิ รชฺชมฺปิ การเย
เนวาหํ ยาจิโต ทชฺชํ ตถาหิ ภยตชฺชิโต ฯ