[๗๕๗] น โส มิตฺโต โย สทา อปฺปมตฺโต
เภทาสงฺกี รนฺธเมวานุปสฺสี
ยสฺมิญฺจ เสติ อุรสีว ปุตฺโต
สเว มิตฺโต โย อเภชฺโช ปเรภีติ ฯ
วณฺณาโรหชาตกํ ปฐมํ ฯ
#๑ ม. สุทาฐ ฯ ๒ ม. สทฺทเหยุย ฯ
๒ สีลวีมํสชาตกํ

[๗๕๘] สีลํ เสยฺโย สุตํ เสยฺโย อิติ เม สํสโย อหุ
สีลเมว สุตา เสยฺโย อิติ เม นตฺถิ สํสโย ฯ

[๗๕๙] โมฆา ชาติ จ วณฺโณ จ สีลเมว กิรุตฺตมํ
สีเลน อนุเปตสฺส สุเตนตฺโถ น วิชฺชติ ฯ

[๗๖๐] ขตฺติโย จ อธมฺมฏฺโฐ เวสฺโส จาธมฺมนิสฺสิโต
เต ปริจฺจชฺชุโภ โลเก อุปปชฺชนฺติ ทุคฺคตึ ฯ

[๗๖๑] ขตฺติยา พฺราหฺมณา เวสฺสา สุทฺทา จณฺฑาลปุกฺกุสา
อิธ ธมฺมํ จริตฺวาน ภวนฺติ ติทิเว สมา ฯ

[๗๖๒] น เวทา สมฺปรายาย น ชาติ นปิ ๑ พนฺธวา
สกญฺจ สีลสํสุทฺธํ สมฺปรายสุขาวหนฺติ ๒ ฯ
สีลวีมํสชาตกํ ทุติยํ ฯ
___________
๓ หิริชาตกํ

[๗๖๓] หิรินฺตรนฺตํ วิชิคุจฺฉมานํ
ตวาหมสฺมิ อิติ ภาสมานํ
เสยฺยานิ กมฺมานิ อนาทิยนฺตํ
เนโส มมนฺติ อิติ นํ วิชญฺญา ฯ

[๗๖๔] ยญฺหิ กยิรา ตญฺหิ วเท ยํ น กยิรา น ตํ วเท
#๑ ม. นาปิ ฯ ยุ. โนปิ ฯ ๒ สี. ม. สมฺปรายสุขาย จ ฯ
อกโรนฺตํ ภาสมานํ ปริชานนฺติ ปณฺฑิตา ฯ

[๗๖๕] น โส มิตฺโต โย สทา อปฺปมตฺโต
เภทาสงฺกี รนฺธเมวานุปสฺสี
ยสฺมิญฺจ เสติ อุรสีว ปุตฺโต
สเว มิตฺโต โย อเภชฺโช ปเรภิ ฯ

[๗๖๖] ปาโมชฺชกรณํ ฐานํ ปสํสาวหนํ สุขํ
ผลานิสํโส ภาเวติ วหนฺโต โปริสํ ธุรํ ฯ