[๖๗๗] เอกิกา สยเน เสตุ ยา เต อมฺเพ อวาหรีติ ฯ
อมฺพชาตกํ จตุตฺถํ ฯ
___________
๕ คชกุมฺภชาตกํ

[๖๗๘] วนํ ยทคฺคิ ทหติ ปาวโก กณฺหวตฺตนี
กถํ กโรสิ ปจลก เอวํ ทนฺธปรกฺกโม ฯ

[๖๗๙] พหูนิ รุกฺขฉิทฺทานิ ปฐพฺยา วิวรานิ จ
ตานิ เจ นาภิสมฺโภม โหติ โน กาลปริยาโย ฯ

[๖๘๐] โย ทนฺธกาเล ตรติ ตรณีเย จ ทนฺธติ
สุกฺขปณฺณํว อกฺกมฺม อตฺถํ ภญฺชติ อตฺตโน ฯ

[๖๘๑] โย ทนฺธกาเล ทนฺเธติ ตรณีเย จ ตารยิ
สสีว รตฺตึ วิภชํ ตสฺสตฺโถ ปริปูรตีติ ฯ
คชกุมฺภชาตกํ ปญฺจมํ ฯ
___________
#๑ ม. อภิสาริกา ฯ ๒ ม. มา อทฺท ฯ สี. ยุ. มา อทฺทส ฯ
๖ เกสวชาตกํ

[๖๘๒] มนุสฺสินฺทํ ชหิตฺวาน สพฺพกามสมิทฺธินํ
กถํ นุ ภควา เกสิ กปฺปสฺส รมติ อสฺสเม ฯ

[๖๘๓] สาธูนิ ๑ รมณียานิ สนฺติ วกฺขา ๒ มโนรมา
สุภาสิตานิ กปฺปสฺส นารท รมยนฺติ มํ ฯ

[๖๘๔] สาลีนํ โอทนํ ภุญฺเช สุจิมํสูปเสจนํ
กถํ สามากนิวารํ ๓ อโลณํ ฉาทยนฺติ ตํ ฯ

[๖๘๕] สาธธ วา ยทิวาสาธธ ๔ อปฺปํ วา ยทิวา พหุํ
วิสฺสตฺโถ ยตฺถ ภุญฺเชยฺย วิสฺสาสปรมา รสาติ ฯ
เกสวชาตกํ ฉฏฺฐํ ฯ
___________
๗ อยกูฏชาตกํ

[๖๘๖] สพฺพายสํ กูฏมติปฺปมาณํ
ปคฺคยฺห โย ๕ ติฏฺฐสิ อนฺตลิกฺเข
รกฺขาย มํ ตฺวํ วิหิโตนุสชฺช
อุทาหุ เม วายมเส ๖ วธาย ฯ