[๖๒๗] ตสฺมา ปณฺฑิตชาติโย สุเณยฺย อิตรสฺสปิ
อุภินฺนํ วจนํ สุตฺวา ยถา ธมฺโม ตถา กเร ฯ

[๖๒๘] อลโส คิหี กามโภคี น สาธุ
อสญฺญโต ปพฺพชิโต น สาธุ
ราชา น สาธุ อนิสมฺมการี
โย ปณฺฑิโต โกธโน ตํ น สาธุ ฯ

[๖๒๙] นิสมฺม ขตฺติโย กยิรา นานิสมฺม ทิสมฺปติ
นิสมฺมการิโน รญฺโญ ๓ ยโส กิตฺตี จ วฑฺฒตีติ ฯ
รถลฏฺฐิชาตกํ ทุติยํ ฯ
___________
๓ โคธชาตกํ ๔

[๖๓๐] ตเทว เม ตฺวํ วิทิโต วนมชฺเฌ รเถสโภ ๕
ยสฺส เต ขคฺคพนฺธสฺส ๖ สนฺนทฺธสฺส ติรีฏิโน
อสฺสตฺถทุมสาขาย ปกฺกา โคธา ปลายถ ฯ

[๖๓๑] นเม นมนฺตสฺส ภเช ภชนฺตํ
กิจฺจานุกุพฺพสฺส กเรยฺย กิจฺจํ
นานตฺถกามสฺส กเรยฺย อตฺถํ
อสมฺภชนฺตมฺปิ น สมฺภเชยฺย ฯ
#๑ ม. ปุพฺพวกฺขายิโน ฯ ๒ สี. ยุ. เอกทตฺถุ ฯ ม. อญฺญทตฺถุ ฯ ๓ สี. ม.
# ราช ฯ ๔ ม. ปกฺกโคธชาตกํ ฯ ๕ ม. รเถสภ ฯ ๖ ม. ขคฺคพทฺธสฺส ฯ

[๖๓๒] จเช จชนฺตํ วนถํ น กยิรา
อเปตจิตฺเตน น สมฺภเชยฺย
ทิโช ทุมํ ขีณผลํว ๑ ญตฺวา
อญฺญํ สเมกฺเขยฺย มหา หิ โลโก ฯ

[๖๓๓] โส เต กริสฺสามิ ยถานุภาวํ
กตญฺญุตํ ขตฺติโย ๒ เปกฺขมา โน
สพฺพญฺจ เต อิสฺสริยํ ททามิ
ยสฺสิจฺฉสี ตสฺส ตุวํ ททามีติ ฯ
โคธชาตกํ ตติยํ ฯ
___________
๔ ราโชวาทชาตกํ

[๖๓๔] ควญฺเจ ตรมานานํ ชิมฺหํ คจฺฉติ ปุงฺคโว
สพฺพา คาวี ชิมฺหํ ยนฺติ ๓ เนตฺเต ชิมฺหํ คเต สติ ฯ

[๖๓๕] เอวเมว มนุสฺเสสุ โย โหติ เสฏฺฐสมฺมโต
โส เจ อธมฺมํ จรติ ปเคว อิตรา ปชา
สพฺพํ รฏฺฐํ ทุกฺขํ เสติ ราชา เจ โหติ อธมฺมิโก ฯ

[๖๓๖] ควญฺเจ ตรมานานํ อุชุํ คจฺฉติ ปุงฺคโว
สพฺพา คาวี อุชุํ ยนฺติ ๔ เนตฺเต อุชุํ คเต สติ ฯ