[๕๘๗] เวลุวํ ปติตํ สุตฺวา ทุทฺทุภนฺติ สโส ชวิ
สสสฺส วจนํ สุตฺวา สนฺตตฺตา มิควาหินี ฯ

[๕๘๘] อปฺปตฺวา ปทวิญฺญาณํ ปรโฆสานุสาริโน
ปมาทปรมา ๑ พาลา เต โหนฺติ ปรปตฺติยา ฯ

[๕๘๙] เย จ สีเลน สมฺปนฺนา ปญฺญายูปสเม รตา
อารกา วิรตา ธีรา น โหนฺติ ปรปตฺติยาติ ฯ
ทุทฺทุภายชาตกํ ๒ ทุติยํ ฯ
_______________
๓ พฺรหฺมทตฺตชาตกํ

[๕๙๐] ทฺวยํ ยาจนโก ราช พฺรหฺมทตฺต นิคจฺฉติ
อลาภํ ธนลาภํ วา เอวํธมฺมา หิ ยาจนา ฯ

[๕๙๑] ยาจนํ โรทนํ อาหุ ปญฺจาลานํ รเถสภ
โย ยาจนํ ปจฺจกฺขาติ ตมาหุ ปฏิโรทนํ ฯ

[๕๙๒] มํ มาทฺทสํสุ ๓ โรทนฺตํ ปญฺจาลา สุสมาคตา
ตุวํ วา ปฏิโรทนฺตํ ตสฺมา อิจฺฉามหํ รโห ฯ

[๕๙๓] ททามิ เต พฺราหฺมณ โรหิณีนํ
ควํ สหสฺสํ สห ปุงฺคเวน
อริโย หิ อริยสฺส กถํ น ทชฺชา
สุตฺวาน คาถา ตว ธมฺมยุตฺตาติ ฯ
พฺรหฺมทตฺตชาตกํ ตติยํ ฯ
#๑ ม. ปนาทปรมา ฯ ๒ สี. ยุ. ททฺทภ-ชาตกํ ฯ ๓ ม. มามทฺทสํสุ ฯ
๔ จมฺมสาฏกชาตกํ

[๕๙๔] กลฺยาณรูโป วตายํ จตุปฺปโท
สุภทฺทโก เจว สุเปสโล จ
โย พฺราหฺมณํ ชาติมนฺตูปปนฺนํ
อปจายติ เมณฺฑวโร ยสสฺสี ฯ

[๕๙๕] มา พฺราหฺมณ อิตฺตรทสฺสเนน
วิสฺสาสมาปชฺชิ จตุปฺปทสฺส
ทฬฺหปฺปหารํ อภิกตฺตุกาโม ๑
อวสกฺกติ ๒ ทสฺสติ สุปฺปหารํ ฯ

[๕๙๖] อุรุฏฺฐี ภคฺคา ปติโต ๓ ขาริภาโร
สพฺพํ ภณฺฑํ พฺราหฺมณสฺเสว ๔ ภินฺนํ
อุโภปิ พาหา ปคฺคเยฺหว ๕ กนฺทติ
อภิธาวตํ หญฺญติ พฺรหฺมจารึ ๖ ฯ