[๕๕๗] โสหํ นูน อิโต คนฺตฺวา โยนึ ลทฺธาน มานุสึ
วทญฺญู สีลสมฺปนฺโน กาหามิ กุสลํ พหุนฺติ ฯ
โลหกุมฺภิชาตกํ จตุตฺถํ ฯ
___________
๕ มํสชาตกํ ๒

[๕๕๘] ผรุสา วต เต วาจา มํสํ ยาจนโก อสิ
กิโลมสทิสี วาจา กิโลมํ สมฺม ทมฺมิ เต ฯ

[๕๕๙] องฺคเมตํ มนุสฺสานํ ภาตา โลเก ปวุจฺจติ
องฺคสฺส สทิสี วาจา องฺคํ สมฺม ททามิ เต ฯ

[๕๖๐] ตาตาติ ปุตฺโต วทมาโน กมฺเปติ หทยํ ปิตุ
หทยสฺส สทิสี วาจา หทยํ สมฺม ทมฺมิ เต ฯ

[๕๖๑] ยสฺส คาเม สขา นตฺถิ ยถารญฺญํ ตเถว ตํ
สพฺพสฺส สทิสี วาจา สพฺพํ สมฺม ททามิ เตติ ฯ
มํสชาตกํ ปญฺจมํ ฯ
___________
๖ สสปณฺฑิตชาตกํ

[๕๖๒] สตฺต เม โรหิตา มจฺฉา อุทกา ถลมุพฺภตา
อิทํ พฺราหฺมณ เม อตฺถิ เอตํ ภุตฺวา วเน วส ฯ

[๕๖๓] ทุสฺส เม เขตฺตปาลสฺส รตฺตึ ภตฺตํ อปาภตํ
#๑ ม. มาริสา ฯ ๒ ม. สพฺพมํสลาภชาตกํ ฯ
มํสสูลา จ เทฺว โคธา เอกญฺจ ทธิวารกํ
อิทํ พฺราหฺมณ เม อตฺถิ เอตํ ภุตฺวา วเน วส ฯ

[๕๖๔] อมฺพปกฺกํ ๑ ทกํ สีตํ สีตจฺฉายํ ๒ มโนรมํ
อิทํ พฺราหฺมณ เม อตฺถิ เอตํ ภุตฺวา วเน วส ฯ

[๕๖๕] น สสสฺส ติลา อตฺถิ น มุคฺคา นปิ ตณฺฑุลา
อิมินา อคฺคินา ปกฺกํ มมํ ภุตฺวา วเน วสาติ ฯ
สสปณฺฑิตชาตกํ ฉฏฺฐํ ฯ
____________
๗ มตโรทนชาตกํ

[๕๖๖] มตมตเมว ๓ โรทถ น หิ ตํ โรทถ โย มริสฺสติ
สพฺเพว ๔ สรีรธาริโน อนุปุพฺเพน ชหนฺติ ชีวิตํ ฯ