[๕๐๗] อเทยฺเยสุ อททํ ๓ ทานํ เทยฺเยสุ โย ปเวจฺฉติ
อาปาสุ พฺยสนํ ปตฺโต สหายํ อธิคจฺฉติ ฯ

[๕๐๘] สญฺโญคสมฺโภค วิเสสทสฺสนํ
อนริยธมฺเมสุ สเฐสุ นสฺสติ
กตญฺจ อริเยสุ จ อญฺชเสสุ ๔
มหปฺผลํ โหติ อณุมฺปิ ตาทิสุ ฯ

[๕๐๙] โย ปุพฺเพ กตกลฺยาโณ อกา โลเก สุทุกฺกรํ
ปจฺฉา กยิรา น วา กยิรา อจฺจนฺตํ ปูชนารโหติ ฯ
มหาอสฺสาโรหชาตกํ ทุติยํ ฯ
____________
#๑ สี. อพฺยคฺฆตา ฯ ม. อพฺยคฺคตา ฯ ๒ สี. นิกฺขมนญฺจ ๓ ม. นาเทยฺเยสุ ททํ … ฯ
#๔ สี. ม. อชฺชเวสุ ฯ
๓ เอกราชชาตกํ

[๕๑๐] อนุตฺตเร กามคุเณ สมิทฺเธ
ภุตฺวาน ปุพฺเพ วสิ ๑ เอกราช
โสทานิ ทุคฺเค นรกมฺหิ ขิตฺโต
นปฺปชฺชเห วณฺณพลํ ปุราณํ ฯ

[๕๑๑] ปุพฺเพว ขนฺตี จ ตโป จ มยฺหํ
สมฺปตฺถิตา ทุพฺภิเสน ๒ อโหสิ
ตนฺทานิ ลทฺธาน กถนฺนุ ราช
ชเห อหํ วณฺณพลํ ปุราณํ ฯ

[๕๑๒] สพฺพา กิเรว ๓ ปรินิฏฺฐิตานิ
ยสสฺสินํ ปญฺญวนฺตํ วิสยฺห
ยโส จ ลทฺธา ปุริมํ อุฬารํ
นปฺปชฺชเห วณฺณพลํ ปุราณํ ฯ

[๕๑๓] ปนุชฺช ทุกฺเขน สุขํ ชนินฺท
สุเขน วา ทุกฺขมสยฺหสาหิ
อุภยตฺถ สนฺโต อภินิพฺพุตตฺตา
สุเข จ ทุกฺเข จ ภวนฺติ ตุลฺยาติ ฯ
เอกราชชาตกํ ตติยํ ฯ
#๑ ม. วสี ฯ ๒ สี. ยุ. ทพฺพเสนา ฯ ๓ ม. กิเรวํ ฯ
๔ ททฺทรชาตกํ

[๕๑๔] อิมานิ มํ ททฺทร ตาปยนฺติ
วาจาทุรุตฺตานิ มนุสฺสโลเก
มณฺฑูกภกฺขา อุทกนฺตเสวี
อสีวิสํ ๑ มํ อวิสา สปนฺติ ฯ

[๕๑๕] สกา รฏฺฐา ปพฺพาชิโต อญฺญํ ชนปทํ คโต
มหนฺตํ โกฏฺฐํ กยิราถ ทุรุตฺตานํ นิเธตเว ฯ

[๕๑๖] ยตฺถ โปสํ น ชานนฺติ ชาติยา วินเยน วา
น ตตฺถ มานํ กยิราถ วสํ อญฺญาตเก ชเน ฯ