[๔๘๗] โก นฺวายํ ๒ โลณโตยสฺมึ สมนฺตา ปริธาวติ
มจฺเฉ มกเร จ วาเรติ อูมีสุ จ วิหญฺญติ ฯ

[๔๘๘] อนนฺตปายี สกุโณ อติตฺโตติ ทิสา สุโต
สมุทฺทํ ปาตุมิจฺฉามิ สาครํ สริตปฺปตึ ฯ

[๔๘๙] โสยํ หายตี เจว ปูรเตว มโหทธิ
นาสฺส นายติ ปีตนฺโต อเปยฺโย กิร สาคโรติ ฯ
สมุทฺทชาตกํ ฉฏฺฐํ ฯ
___________
๗ กามวิลาปชาตกํ

[๔๙๐] อุจฺเจ สกุณ เฑมาน ปตฺตยาน วิหงฺคม
วชฺชาสิ โข ตฺวํ วามูรุํ จิรํ โข สา กริสฺสติ ฯ

[๔๙๑] อิทํ โข สา น ชานาติ อสึ สตฺติญฺจ โอฑฺฑิตํ
สา จณฺฑี กาหตี โกธํ ตํ เม ตปฺปติ โน อิธ ๓ ฯ
#๑ สี. โกตฺถุโก ฯ ม. สิคาโล ฯ ๒ ม. นายํ ฯ ๓ ม. อิทํ ฯ

[๔๙๒] เอส อุปฺปลสนฺนาโห นิกฺขญฺจุสฺสีสเก กตํ ๑
กาสิกญฺจ มุทุํ วตฺถํ ตปฺเปตุ ธนกามิยาติ ๒
กามวิลาปชาตกํ สตฺตมํ ฯ
____________
๘ อุทุมฺพรชาตกํ

[๔๙๓] อุทุมฺพรา จิเม ปกฺกา นิโคฺรธา จ กปิตฺถนา
เอหิ นิกฺขมฺม ภุญฺชสฺสุ กึ ชิฆจฺฉาย มิยฺยสิ ฯ

[๔๙๔] เอวํ โส สุหิโต โหติ โย วุฑฺฒมปจายติ
ยถาหมชฺช สุหิโต ทุมปกฺกานิ มาสิโต ฯ

[๔๙๕] ยํ วเนโช วเนชสฺส วญฺเจยฺย กปิโน กปิ
ทหโรปิ น สทฺเธยฺย ๓ นหิ ชิณฺโณ ชรากปีติ ฯ
อุทุมฺพรชาตกํ อฏฺฐมํ ฯ
____________
๙ โกมาริยปุตฺตชาตกํ ๔

[๔๙๖] ปุเร ตุวํ สีลวตํ สกาเส
โอกฺกนฺทิกํ ๕ กีฬสิ อสฺสมมฺหิ
กโรหเร มกฺกฏิยานิ มกฺกฏ
น ตํ มยํ สีลวตํ รมาม ฯ
#๑ ม. … นิกฺขญฺจุสฺสีสโกหิตํ ฯ ๒ ม. ธนิกา ปิยาติ ฯ ๓ ม. ทหโร กปิ สทฺเธยฺย ฯ
#๔ ม. โกมารปุตฺต … ฯ ๕ ม. โอกฺกนฺติกํ ฯ