[๔๕๗] มา สาลุกสฺส ปิหยิ อาตุรนฺนานิ ภุญฺชติ
อปฺโปสฺสุกฺโก ภุสํ ขาท เอตํ ทีฆายุลกฺขณํ ฯ

[๔๕๘] อิทานิ โส อิธาคนฺตฺวา อติถิ ๒ ยุตฺตเสวโก
อถ ทกฺขสิ สาลุกํ สยนฺตํ มูสลุตฺตรํ ฯ
#๑ สี. ยุ. ยาว ยาว นิฆํสาม ฯ ๒ ม. อติถี ฯ

[๔๕๙] วิกนฺตํ สูกรํ ทิสฺวา สยนฺตํ มูสลุตฺตรํ
ชรคฺควา อจินฺเตสุํ วรมฺหากํ ภุสามิวาติ ฯ
สาลุกชาตกํ ฉฏฺฐํ ฯ
__________
๗ ลาภครหิกชาตกํ ๑

[๔๖๐] นานุมฺมตฺโต นาปิสุโณ นานโฏ นากุตูหโล
มุเฬฺหสุ ลภเต ลาภํ เอสา เต อนุสาสนี ฯ

[๔๖๑] ธิรตฺถุ ตํ ยสลาภํ ธนลาภญฺจ พฺราหฺมณ
ยา วุตฺติ วินิปาเตน อธมฺมจริยาย ๒ วา ฯ

[๔๖๒] อปิ เจ ปตฺตมาทาย อนาคาโร ปริพฺพเช
เอสาว ชีวิกา เสยฺโย ๓ ยา จาธมฺเมน เอสนาติ ฯ
ลาภครหิกชาตกํ สตฺตมํ ฯ
___________
๘ มจฺฉทานชาตกํ ๔

[๔๖๓] อคฺฆนฺติ มจฺฉา อธิกํ สหสฺสํ
น โส อตฺถิ โย อิมํ สทฺทเหยฺย
มยฺหญฺจ อสฺสู อิธ สตฺต มาสา
อหมฺปิ ตํ มจฺฉทานํ ๕ กิเณยฺยํ ฯ

[๔๖๔] มจฺฉานํ โภชนํ ทตฺวา มม ทกฺขิณมาทิสิ
ตํ ทกฺขิณํ สรนฺติยา กตํ อปจิตึ ตยา ฯ
#๑ สี. … ลาภครหชาตกํ ฯ ๒ ม. อธมฺมจรเณน ฯ ๓ สี. ยุ. เสยฺยา ฯ
#๔ ม. มจฺฉุทฺทานชาตกํ ฯ ๕ ม. มจฺฉุทฺทานํ ฯ

[๔๖๕] ปทุฏฺฐจิตฺตสฺส น ผาติ โหติ
น จาปิ นํ เทวตา ปูชยนฺติ
โย ภาตรํ เปตฺติกํ สาปเตยฺยํ
อวญฺจยี ทุกฺกฏกมฺมการีติ ฯ
มจฺฉทานชาตกํ อฏฺฐมํ ฯ
___________
๙ นานาฉนฺทชาตกํ

[๔๖๖] นานาฉนฺทา มหาราช เอกาคาเร วสามเส
อหํ คามวรํ อิจฺเฉ พฺราหฺมณี จ ควํ สตํ ฯ๋