[๔๔๗] อิทํ วตฺวา มหาราชา กํโส พาราณสิคฺคโห
ธนน ตุณฺฑิญฺจ ๔ นิกฺขิปฺป สญฺญมํ อชฺฌุปาคมีติ ฯ
เสยฺยชาตกํ ทุติยํ ฯ
#๑ สี. ยุ. ตฺวญฺจ ฯ ๒ สี. ยุ. จาสิ ฯ ๓ ม. เอกโต ฯ ๔ ม. กณฺฑญฺจ ฯ
๓ วฑฺฒกีสูกรชาตกํ

[๔๔๘] วรํ วรํ ตฺวํ นิหนํ ปุเร จริ
อสฺมึ ปเทเส อภิภุยฺย สูกเร
โสทานิ เอโก พฺยคฺฆ ปคมฺม ฌายสิ
พลนฺนุ เต พฺยคฺฆ น จชฺช วิชฺชติ ฯ

[๔๔๙] อิมสฺสุตา ๑ ยนฺติ ทิโสทิสํ ปุเร
ภยทฺธิตา ๒ เลณคเวสิโน ปุถู
เตทานิ สงฺคมฺม วสนฺติ เอกโต
ยตฺถฏฺฐิตา ทุปฺปสหชฺชิเม มยา ฯ

[๔๕๐] นมตฺถุ สงฺฆาน สมาคตานํ
ทิสฺวา สยํ สํขฺย วทามิ อพฺภุตํ
พฺยคฺฆํ มิคา ยตฺถ ชินึสุ ทาฐิโน
สามคฺคิยา ทาฐพเลสุ มุจฺจเรติ ฯ
วฑฺฒกีสูกรชาตกํ ตติยํ ฯ
___________
๔ สิริชาตกํ

[๔๕๑] ยํ อุสฺสุกฺกา สงฺฆรนฺติ อลกฺขิกา พหุํ ธนํ
สิปฺปวนฺโต อสิปฺปา วา ลกฺขิกา ตานิ ภุญฺชเร ๓ ฯ
#๑ สี. ม. อิเม สุทํ ฯ ๒ ม. ภยฏฺฏิตา ฯ ๓ สี. ลกฺขีว ตานิ ภุญฺชติ ฯ ม. ลกฺขิวา
#ตานิ ภุญฺชติ ฯ

[๔๕๒] สพฺพตฺถ กตปุญฺญสฺส อติจฺจญฺเญว ปาณิโน
อุปฺปชฺชนฺติ พหู โภคา อปิ นายตเนสุปิ ฯ

[๔๕๓] กุกฺกุโฏ มณโย ทณฺโฑ ถิโย จ ปุญฺญลกฺขณา
อุปฺปชฺชนฺติ อปาปสฺส กตปุญฺญสฺส ชนฺตุโนติ ฯ
สิริชาตกํ จตุตฺถํ ฯ
__________
๕ มณิสูกรชาตกํ

[๔๕๔] ทริยา สตฺต วสฺสานิ ตึสมตฺตา วสามเส
หญฺญาม มณิโน อาภํ อิติ โน มนฺติตํ อหุ ฯ

[๔๕๕] ยาวตา มณิ ฆํสาม ๑ ภิยฺโย โวทายเต มณิ
อิทญฺจิทานิ ปุจฺฉาม กึ กิจฺจํ อิธ มญฺญสิ ฯ

[๔๕๖] อยํ มณิ เวฬุริโย อกาโจ วิมโล สุโภ
นาสฺส สกฺกา สิรึ หนฺตุํ อปกฺกมถ สูกราติ ฯ
มณิสูกรชาตกํ ปญฺจมํ ฯ
___________
๖ สาลุกชาตกํ