[๓๕๗] อริโย อนริยํ กุพฺพํ ๓ โย ทณฺเฑน นิเสธติ
สาสนํ ตํ ๔ น ตํ เวรํ อิติ นํ ปณฺฑิตา วิทูติ ฯ
ติลมุฏฺฐิชาตกํ ทุติยํ ฯ
#๑ ม. นาลงฺกเตน ภเทฺรน ฯ ๒ ม. นาปิ ฯ ๓ ม. กุพฺพนฺตํ ฯ สี. ยุ. กุพฺพานํ ฯ
#๔ สี. สาสนตฺถํ ฯ
๓ มณิกณฺฐชาตกํ

[๓๕๘] มมนฺนปานํ วิปุลํ อุฬารํ
อุปฺปชฺชตีมสฺส มณิสฺส เหตุ
ตนฺเต น ทสฺสํ อติยาจโกสิ
น จาปิ เต อสฺสมมาคมิสฺสํ ฯ

[๓๕๙] สุสู ยถา สกฺขรโธตปาณี
ตาเสสิมํ เสลํ ยาจมาโน
ตนฺเต น ทสฺสํ อติยาจโกสิ
น จาปิ เต อสฺสมมาคมิสฺสํ ฯ

[๓๖๐] น ตํ ยาเจ ยสฺส ปิยํ ชิคึเส ๑
เทสฺโส โหติ อติยาจนาย
นาโค มณึ ยาจิโต พฺราหฺมเณน
อทสฺสนํเยว ตทชฺฌคมาติ ฯ
มณิกณฺฐชาตกํ ตติยํ ฯ
___________
๔ กุณฺฑกกุจฺฉิสินฺธวชาตกํ

[๓๖๑] ภุตฺวา ติณปริฆาสํ ภุตฺวา อาจามกุณฺฑกํ
เอตํ เต โภชนํ อาสิ กสฺมาทานิ น ภุญฺชสิ ฯ

[๓๖๒] ยตฺถ โปสํ น ชานนฺติ ชาติยา วินเยน วา
ปหุํ ๒ ตตฺถ มหาพฺรหฺเม อปิ อาจามกุณฺฑกํ ฯ
#๑ ม. คิคีเส ฯ ๒ ม. พหุํ ฯ สี. ยุ. พหู ฯ

[๓๖๓] ตฺวญฺจ โข มํ ปชานาสิ ยาทิสายํ หยุตฺตโม
ชานนฺโต ชานมาคมฺม น เต ภกฺขามิ กุณฺฑกนฺติ ฯ
กุณฺฑกกุจฺฉิสินฺธวชาตกํ จตุตฺถํ ฯ
____________
๕ สุกชาตกํ

[๓๖๔] ยาว โส มตฺตมญฺญาสิ โภชนสฺมึ วิหงฺคโม
ตาว อทฺธานมาปาทิ มาตรญฺจ อโปสยิ ฯ

[๓๖๕] ยโต จ โข โส ๑ พหุตรํ โภชนํ อชฺฌวาหริ ๒
ตโต ตตฺเถว สํสีทิ อมตฺตญฺญู หิ โส อหุ ฯ

[๓๖๖] ตสฺมา มตฺตญฺญุตา สาธุ โภชนสฺมึ อคิทฺธิตา ๓
อมตฺตญฺญู หิ สีทนฺติ มตฺตญฺญูว ๔ น สีทเรติ ฯ
สุกชาตกํ ปญฺจมํ ฯ
____________
๖ ชรูทปานชาตกํ