[๓๔๗] เอวํ สพฺเพหิ ญาเณหิ เยสํ ธมฺมา อชานิตา
เต เว ธมฺเมสุ กงฺขนฺติ กึสุกสฺมึว ภาตโรติ ฯ
กึสุโกปมชาตกํ อฏฺฐมํ ฯ
___________
๙ สาลกชาตกํ

[๓๔๘] เอกปุตฺตโก ภวิสฺสสิ
ตฺวญฺจ โน เหสฺสสิ อิสฺสโร กุเล
โอโรห ทุมสฺมา สาลก
เอหิ ทานิ ฆรกํ วเชมเส ฯ

[๓๔๙] นนุ มํ สุหทโยติ ๒ มญฺญสิ
ยญฺจ มํ หนสิ เวฬุยฏฺฐิยา
ปกฺกมฺพวเน รมามเส
คจฺฉ ตฺวํ ฆรกํ ยถาสุขนฺติ ฯ
สาลกชาตกํ นวมํ ฯ
#๑ ม. สารถี ฯ ๒ สี. ยุ. นนุ มํ หทเยติ ฯ
๑๐ กปิชาตกํ

[๓๕๐] อยํ อิสิ อุปสมสญฺญเม รโต
ส ติฏฺฐติ สิสิรภเยน อทฺธิโต ๑
หนฺท อยํ ปวิสตุมํ อคารกํ
วิเนตุ สีตํ ทรถญฺจ เกวลํ ฯ

[๓๕๑] นายํ อิสิ ๒ อุปสมสญฺญเม รโต
กปิ อยํ ทุมฺพรสาขโคจโร ๓
โส ทูสโก โรสโก จาปิ ชมฺโม
สเจ วเช อิมมฺปิ ทูสเย ฆรนฺติ ๔ ฯ
กปิชาตกํ ทสมํ ฯ
สิคาลวคฺโค ทสโม ฯน
__________
ตสฺสุทฺทานํ
อถ ราชา สิคาลวโร สุนโข
ตถา โกสิย อิจฺฉติ กาลฆโส
อถ ทานวโรฏฺฐปิ สารถินา
ปุนมฺปวนญฺจ สิสิรกปิ ทส ฯ
_______________
#๑ ม. อฏฺฏิโต ฯ ๒ ม. อิสี ฯ ๓ สี. ม. ทุมวรสาขโคจโร ฯ ๔ ม. สเจ วเชมมฺปิ
#ทูเสยฺย ฆรนฺติ ฯ
วคฺคุทฺทานํ ฯ
ทฬฺหญฺจ วคฺคํ อปเรน สนฺถวํ
กลฺยาณวคฺคาสทิโส จ รุหกํ
นตํทฬฺหํ พีรณตฺถมฺภกา ปุน
กาสาวุปาหนสิคาลเกน ทสาติ ฯ
ทุกนิปาตํ นิฏฺฐิตํ ฯ
__________
ติกนิปาตชาตกํ
๑ สงฺกปฺปวคฺโค
๑ สงฺกปฺปราคชาตกํ

[๓๕๒] สงฺกปฺปราคโธเตน วิตกฺกนิสิเตน จ
เนวาลงฺกตภเทฺรน ๑ (น) อุสุการกเตน จ ฯ

[๓๕๓] น กณฺณายตมุตฺเตน นปิ ๒ โมรุปเสวินา
เตนมฺหิ หทเย วิทฺโธ สพฺพงฺคปริทาหินา ฯ

[๓๕๔] อาเวธญฺจ น ปสฺสามิ ยโต รุหิรมสฺสเว
ยาว อโยนิโส จิตฺตํ สยํ เม ทุกฺขมาภตนฺติ ฯ
สงฺกปฺปราคชาตกํ ปฐมํ ฯ
___________
๒ ติลมุฏฺฐิชาตกํ

[๓๕๕] อชฺชาปิ เม ตํ มนสิ ยํ มํ ตฺวํ ติลมุฏฺฐิยา
พาหายํ มํ คเหตฺวาน ลฏฺฐิยา อนุตาลยิ ฯ

[๓๕๖] นนุ ชีวิเต น รมสิ เยนาสิ พฺราหฺมณาคโต
ยํ มํ พาหา คเหตฺวาน ติกฺขตฺตุํ อนุตาลยิ ฯ